ਲੁਧਿਆਣਾ, 27 ਮਈ (ਪੋਸਟ ਬਿਊਰੋ)- ਪੁਲਸ ਲਾਈਨ ਦੇ ਸਰਕਾਰੀ ਕਵਾਰਟਰ ਵਿੱਚ ਮਹਿਲਾ ਟਰੈਫਿਕ ਕਾਂਸਟੇਬਲ ਨੇ ਖੁਦਕੁਸ਼ੀ ਕਰ ਲਈ ਹੈ। ਉਸ ਦੀ ਪਛਾਣ ਡੇਹਲੋਂ ਨੇੜਲੇ ਪਿੰਡ ਖਟੜਾ ਚੋਹਰਾਮ ਦੀ ਕਮਲਜੀਤ ਕੌਰ (29) ਵਜੋਂ ਹੋਈ ਹੈ, ਜੋ ਟਰੈਫਿਕ ਪੁਲਸ ਵਿੱਚ ਮਹਿਲਾ ਕਾਂਸਟੇਬਲ ਵਜੋਂ ਤੈਨਾਤ ਸੀ।
ਦੱਸਿਆ ਜਾਂਦਾ ਹੈ ਕਿ ਮਹਿਲਾ ਦਾ ਆਪਣੇ ਪਤੀ ਨਾਲ ਪਿਛਲੇ ਕਈ ਸਾਲਾਂ ਤੋਂ ਝਗੜਾ ਚੱਲਦਾ ਸੀ। ਇਸ ਘਟਨਾ ਦੀ ਸੂਚਨਾ ਮਿਲਦੇ ਸਾਰ ਥਾਣਾ ਡਵੀਜ਼ਨ ਨੰਬਰ ਅੱਠ ਦੀ ਪੁਲਸ ਮੌਕੇ 'ਤੇ ਪਹੁੰਚੀ। ਡਵੀਜ਼ਨ ਨੰਬਰ ਅੱਠ ਦੇ ਐੱਸ ਐੱਚ ਓ ਜਰਨੈਲ ਸਿੰਘ ਨੇ ਦੱਸਿਆ ਕਿ ਉਕਤ ਮਹਿਲਾ ਪੰਜਾਬ ਪੁਲਸ ਵਿੱਚ ਸਾਲ 2011 ਵਿੱਚ ਕਾਂਸਟੇਬਲ ਭਰਤੀ ਹੋਈ ਸੀ। ਉਸ ਦਾ ਵਿਆਹ 2013 ਵਿੱਚ ਰਘੂਬੀਰ ਸਿੰਘ ਨਾਲ ਹੋਇਆ ਸੀ, ਪਰ ਕੁਝ ਸਮੇਂ ਬਾਅਦ ਪਰਵਾਰਕ ਕਲੇਸ਼ ਸ਼ੁਰੂ ਹੋ ਗਿਆ ਸੀ। ਮਹਿਲਾ ਦਾ ਸੱਤ ਸਾਲਾ ਬੇਟਾ ਮਾਤਾ-ਪਿਤਾ ਨਾਲ ਰਹਿ ਰਿਹਾ ਸੀ ਅਤੇ ਪੰਜ ਸਾਲਾ ਬੇਟੀ ਨੂੰ ਕੇਅਰ ਟੇਕਰ ਕੋਲ ਛੱਡਿਆ ਹੋਇਆ ਸੀ। ਮਹਿਲਾ ਨੇ ਸੋਮਵਾਰ ਸ਼ਾਮ ਕਰੀਬ ਸੱਤ ਵਜੇ ਸਰਕਾਰੀ ਕਵਾਰਟਰ ਵਿੱਚ ਜ਼ਹਿਰੀਲਾ ਪਦਾਰਥ ਖਾ ਲਿਆ ਅਤੇ ਫਿਰ ਆਪਣੀ ਬੇਟੀ ਦੀ ਕੇਅਰ ਟੇਕਰ ਨੂੰ ਇਸ ਬਾਰੇ ਫੋਨ ਕਰ ਕੇ ਦੱਸਿਆ। ਤਦ ਕੇਅਰ ਟੇਕਰ ਨੇ ਮਹਿਲਾ ਕਾਂਸਟੇਬਲ ਦੀ ਸਾਥੀ ਮੁਲਾਜ਼ਮ ਨੂੰ ਫੋਨ ਕਰ ਕੇ ਦੱਸਿਆ। ਉਸ ਨੇ ਓਥੇ ਪਹੁੰਚ ਕੇ ਮਹਿਲਾ ਕਾਂਸਟੇਬਲ ਨੂੰ ਡੀ ਐੱਮ ਸੀ ਹਸਪਤਾਲ ਪਹੁੰਚਾਇਆ, ਜਿੱਥੇ ਉਸ ਦੀ ਦੇਰ ਰਾਤ ਮੌਤ ਹੋ ਗਈ। ਉਕਤ ਮਹਿਲਾ ਕਾਂਸਟੇਬਲ ਤੋਂ ਕੋਈ ਸੁਸਾਈਡ ਨੋਟ ਨਹੀਂ ਮਿਲਿਆ। ਮ੍ਰਿਤਕ ਮਹਿਲਾ ਦੇ ਪਿਤਾ ਨੇ ਸਿਕੰਦਰ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਉਨ੍ਹਾਂ ਦੀ ਬੇਟੀ ਦਾ ਪਤੀ ਦੇ ਨਾਲ ਝਗੜਾ ਚੱਲ ਰਿਹਾ ਸੀ, ਜਿਸ ਕਾਰਨ ਉਹ ਪ੍ਰੇਸ਼ਾਨ ਸੀ।