ਨਵੀਂ ਦਿੱਲੀ, 27 ਮਈ (ਪੋਸਟ ਬਿਊਰੋ)- ਭਾਰਤ ਦੇ ਪ੍ਰਮੁੱਖ ਏਅਰਪੋਰਟ, ਦਿੱਲੀ ਮੈਟਰੋ ਤੇ ਪ੍ਰਮੁੱਖ ਸਰਕਾਰੀ ਅਦਾਰਿਆਂ ਨੂੰ ਸੁਰੱਖਿਆ ਦੇਣ ਵਾਲੇ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ (ਸੀ ਆਈ ਐਸ ਐਫ) ਵਿੱਚ ਵੀ ਕੋਰੋਨਾ ਦੇ ਸ਼ਿਕਾਰ ਹੋਣ ਵਾਲੇ ਜਵਾਨਾਂ ਦਾ ਗਿਣਤੀ 210 ਉੱਤੇ ਪਹੁੰਚ ਗਈ ਹੈ। ਬੀਤੇ 24 ਘੰਟਿਆਂ 'ਚ ਹੀ ਸੁਰੱਖਿਆ ਬਲ ਦੇ ਕੁੱਲ 20 ਜਵਾਨ ਕੋਰੋਨਾ ਪਾਜ਼ੇਟਿਵ ਮਿਲੇ ਹਨ, ਜਿਨ੍ਹਾਂ 'ਚੋਂ 18 ਰਾਜਧਾਨੀ ਦਿੱਲੀ ਦੇ ਆਈ ਜੀ ਆਈ ਏਅਰਪੋਰਟ ਯੂਨਿਟ 'ਤੇ ਤਾਇਨਾਤ ਸਨ। ਇਨ੍ਹਾਂ ਦੇ ਇਨਫੈਕਟਿਡ ਹੋਣ ਤੋਂ ਬਾਅਦ ਇਸ ਯੂਨਿਟ 'ਚ ਪ੍ਰਭਾਵਤਾਂ ਦੀ ਕੁੱਲ ਜਵਾਨਾਂ ਦੀ ਗਿਣਤੀ 21 ਹੋ ਗਈ ਹੈ। ਸਾਰੇ ਨਵੇਂ ਪ੍ਰਭਾਵਿਤਾਂ ਨੂੰ ਇਲਾਜ ਲਈ ਏਮਜ਼ 'ਚ ਦਾਖ਼ਲ ਕਰਵਾਇਆ ਗਿਆ ਹੈ।
ਇਸ ਸੰਬੰਧ ਵਿੱਚ ਸੀ ਆਈ ਐਸ ਐਫ ਦੇ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਸਾਰੇ 18 ਪ੍ਰਭਾਵਿਤ ਜਵਾਨ ਏਅਰਪੋਰਟ ਦੇ ਕਾਰਗੋ ਟਰਮੀਨਲ 'ਤੇ ਤਾਇਨਾਤ ਸਨ। ਸੀ ਆਈ ਐਸ ਐਫ ਤੋਂ ਇਲਾਵਾ ਅੱਜ ਤੱਕ ਸੀ ਆਰ ਪੀ ਐਫ ਦੇ 369 ਜਵਾਨ, ਬੀ ਐਫ ਐਫ ਦੇ 406 ਜਵਾਨ, ਆਈ ਟੀ ਬੀ ਪੀ ਦੇ 186 ਜਵਾਨ ਅਤੇ ਐਸ ਐਸ ਬੀ ਦੇ 30 ਜਵਾਨ ਇਨਫੈਕਟਿਡ ਹੋਏ ਹਨ ਅਤੇ ਕੁੱਲ 14 ਜਵਾਨਾਂ ਦੀ ਮੌਤ ਹੋ ਚੁੱਕੀ ਹੈ। ਇਨ੍ਹਾਂ 'ਚੋਂ ਦੋ-ਦੋ ਸੀ ਆਰ ਪੀ ਐਫ ਅਤੇ ਬੀ ਐਸ ਐਫ ਅਤੇ 10 ਸੀ ਆਈ ਐਸ ਐਫ ਦੇ ਸਨ।