ਨਵੀਂ ਦਿਲੀ, 26 ਮਈ (ਪੋਸਟ ਬਿਊਰੋ) : ਊਬਰ ਵੱਲੋਂ ਮੰਗਲਵਾਰ ਨੂੰ ਇਹ ਐਲਾਨ ਕੀਤਾ ਗਿਆ ਹੈ ਕਿ ਉਹ ਭਾਰਤ ਵਿੱਚ 600 ਨੌਕਰੀਆਂ ਵਿੱਚ ਕਟੌਤੀ ਕਰ ਰਿਹਾ ਹੈ। ਭਾਰਤ ਵਿੱਚ ਇਹ ਊਬਰ ਦਾ 25 ਫੀ ਸਦੀ ਬਣਦਾ ਹੈ।
ਕੰਪਨੀ ਲਈ ਡਰਾਈਵਰ ਤੇ ਰਾਈਡਰ ਸਪੋਰਟ ਤੋਂ ਇਲਾਵਾ ਕਈ ਹੋਰਨਾਂ ਤਰ੍ਹਾਂ ਦੇ ਕੰਮ ਕਰਨ ਵਾਲੇ ਵਿਅਕਤੀ ਇਸ ਨਾਲ ਪ੍ਰਭਾਵਿਤ ਹੋਣਗੇ। ਭਾਰਤ ਤੇ ਸਾਊਥ ਏਸ਼ੀਆ ਲਈ ਊਬਰ ਦੇ ਪ੍ਰੈਜ਼ੀਡੈਂਟ ਪ੍ਰਦੀਪ ਪਰਮੇਸ਼ਵਰਨ ਨੇ ਇਸ ਨੂੰ ਕੰਪਨੀ ਲਈ ਬੁਰਾ ਦਿਨ ਦੱਸਦਿਆਂ ਕੰਮ ਤੋਂ ਕੱਢੇ ਜਾ ਰਹੇ ਕਰਮਚਾਰੀਆਂ ਤੋਂ ਮੁਆਫੀ ਮੰਗੀ। ਉਨ੍ਹਾਂ ਆਖਿਆ ਕਿ ਊਬਰ 10 ਹਫਤੇ ਦੀ ਪੇਅ ਦੇ ਨਾਲ ਨਾਲ ਪ੍ਰਭਾਵਿਤ ਸਟਾਫ ਨੂੰ ਛੇ ਮਹੀਨਿਆਂ ਦੀ ਮੈਡੀਕਲ ਇੰਸ਼ੋਰੈਂਸ ਵੀ ਦੇਵੇਗੀ।
ਜਿ਼ਕਰਯੋਗ ਹੈ ਕਿ ਪਿਛਲੇ ਹਫਤੇ ਊਬਰ ਵੱਲੋਂ ਇਨ੍ਹਾਂ ਛਾਂਗੀਆਂ ਦਾ ਐਲਾਨ ਕੀਤਾ ਗਿਆ ਸੀ। ਕੰਪਨੀ ਮਹਾਂਮਾਰੀ ਕਾਰਨ ਪੂਰੇ ਸਟਾਫ ਵਿੱਚੋਂ 6700 ਕਰਮਚਾਰੀਆਂ ਦੀ ਛਾਂਗੀ ਕਰਨ ਜਾ ਰਹੀ ਹੈ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਭਾਰਤ ਦੇ 50 ਸ਼ਹਿਰਾਂ ਵਿੱਚ ਊਬਰ ਵੱਲੋਂ ਆਪਣੀਆਂ ਸੇਵਾਵਾਂ ਜਾਰੀ ਰੱਖੀਆਂ ਗਈਆਂ ਸਨ ਪਰ ਦੇਸ਼ ਦਾ ਬਹੁਤਾ ਹਿੱਸਾ ਲਾਕਡਾਊਨ ਵਿੱਚ ਹੋਣ ਕਾਰਨ ਊਬਰ ਨੂੰ ਇਹ ਫੈਸਲਾ ਲੈਣਾ ਪੈ ਰਿਹਾ ਹੈ।