ਮੁਹਾਲੀ, 24 ਮਈ (ਪੋਸਟ ਬਿਊਰੋ)- ਪੰਜਾਬ ਪੁਲਸ ਦੇ ਸਾਬਕਾ ਮੁਖੀ ਸੁਮੇਧ ਸਿੰਘ ਸੈਣੀ ਦੇ ਖਿਲਾਫ ਬਣੇ ਕੇਸ ਵਿੱਚ ਕੱਲ੍ਹ ਸਾਬਕਾ ਪੁਲਸ ਅਫਸਰ ਗੁਰਮੀਤ ਸਿੰਘ ਪਿੰਕੀ (ਜਿਸ ਨੂੰ ਪਿੰਕੀ ਕੈਟ ਕਿਹਾ ਜਾਂਦਾ ਹੈ) ਵਿਸ਼ੇਸ਼ ਜਾਂਚ ਟੀਮ (ਸਿੱਟ) ਕੋਲ ਪੇਸ਼ ਹੋਏ ਅਤੇ ਉਨ੍ਹਾਂ ਨੇ ਬਲਵੰਤ ਸਿੰਘ ਮੁਲਤਾਨੀ ਦੇ ਲਾਪਤਾ ਹੋਣ ਬਾਰੇ ਬਿਆਨ ਦਰਜ ਕਰਵਾਏ।
ਪਿੰਕੀ ਕੱਲ੍ਹ ਸਵੇਰੇ ਇਸ ਜਿ਼ਲੇ ਦੇ ਥਾਣਾ ਮਟੌਰ ਵਿਖੇ ਪੁੱਜੇ ਅਤੇ ਸਿੱਟ ਦੇ ਸਵਾਲਾਂ ਦੀ ਪੁੱਛਗਿੱਛ ਪਿੱਛੋਂ ਦੁਪਹਿਰ ਬਾਅਦ ਵਾਪਸ ਗਏ। ਪਤਾ ਲੱਗਾ ਹੈ ਕਿ ਪਿੰਕੀ ਕੈਟ ਨੇ ਪੁਲਸ ਨੂੰ ਇਹ ਵੀ ਦੱਸਿਆ ਕਿ ਉਹ ਸੁਮੇਧ ਸਿੰਘ ਸੈਣੀ ਨੂੰ ਕਿਵੇਂ ਮਿਲਿਆ ਸੀ, ਸੈਣੀ ਨਾਲ ਉਸ ਦੀ ਨੇੜਤਾ ਕਿਵੇਂ ਹੋਈ ਅਤੇ ਫਿਰ ਪੁਲਸ ਹਿਰਾਸਤ 'ਚ ਤਸੀਹੇ ਦੇਣ ਕਾਰਨਬਲਵੰਤ ਸਿੰਘ ਮੁਲਤਾਨੀ ਦੀ ਮੌਤ ਕਿਵੇਂ ਹੋਈ। ਇਸ ਜਿ਼ਲੇ ਦੇ ਮਟੌਰ ਥਾਣੇ ਦੀ ਪੁਲਸ ਨੇ ਬੀਤੀ 6 ਮਈ ਨੂੰ ਮੁਲਤਾਨੀ ਦੇ ਭਰਾ ਪਲਵਿੰਦਰ ਸਿੰਘ ਮੁਲਤਾਨੀ ਵੱਲੋਂ ਦਿੱਤੀ ਸ਼ਿਕਾਇਤ ਉੱਤੇ ਸੁਮੇਧ ਸਿੰਘ ਸੈਣੀ ਦੇ ਖਿਲਾਫ ਕੇਸ ਦਰਜ ਕੀਤਾ ਗਿਆ ਸੀ। ਇਹ ਕੇਸ ਪਿੰਕੀ ਕੈਟ ਵੱਲੋਂ ਸਾਲ 2015 ਵਿੱਚ ਇੱਕ ਮੈਗਜ਼ੀਨ ਨੂੰ ਦਿੱਤੀ ਗਈ ਇੰਟਰਵਿਊ ਵਿੱਚ ਕੀਤੇ ਖ਼ੁਲਾਸਿਆਂ ਦੇ ਆਧਾਰ ਉੱਤੇ ਬਣਾਇਆ ਗਿਆ ਸੀ, ਜਿਸ ਵਿੱਚ ਸੁਮੇਧ ਸੈਣੀ ਤੋਂ ਇਲਾਵਾ ਸਾਬਕਾ ਡੀ ਐੱਸ ਪੀ ਬਲਦੇਵ ਸਿੰਘ ਸੈਣੀ, ਇੰਸਪੈਕਟਰ ਸਤਵੀਰ ਸਿੰਘ, ਸਬ-ਇੰਸਪੈਕਟਰ ਹਰ ਸਹਾਏ ਸ਼ਰਮਾ, ਜਗੀਰ ਸਿੰਘ ਅਤੇ ਅਨੂਪ ਸਿੰਘ, ਏ ਐਸ ਆਈ ਕੁਲਦੀਪ ਸਿੰਘ ਅਤੇ ਇੱਕ ਅਣਪਛਾਤੇ ਵਿਅਕਤੀ ਨੂੰ ਵੱਖ-ਵੱਖ ਧਾਰਾਵਾਂ ਹੇਠ ਨਾਮਜ਼ਦ ਕੀਤਾ ਗਿਆ ਸੀ। ਮਟੌਰ ਪੁਲਸ ਇਸ ਬਾਰੇ ਇਸ ਵਕਤ ਪੱਕੇ ਸਬੂਤ ਇਕੱਠੇ ਕਰਨ ਲੱਗੀ ਹੋਈ ਹੈ।