ਲੰਡਨ, 23 ਮਈ (ਪੋਸਟ ਬਿਊਰੋ)- ਕਰਜ਼ੇ ਦੇ ਬੋਝ ਹੇਠ ਡੁੱਬੇ ਰਿਲਾਇੰਸ ਗਰੁੱਪ ਦੇ ਚੇਅਰਮੈਨ ਅਨਿਲ ਅੰਬਾਨੀ ਉੱਤੇ 5300 ਕਰੋੜ ਰੁਪਏ ਤੋਂ ਵੱਧ ਦੀ ਮਾਰ ਪਈ ਹੈ। ਬ੍ਰਿਟੇਨ ਦੀ ਅਦਾਲਤ ਨੇ ਅੰਬਾਨੀ ਨੂੰ ਹੁਕਮ ਦਿੱਤਾ ਹੈ ਕਿ ਉਹ ਚੀਨ ਦੇ ਤਿੰਨ ਬੈਂਕਾਂ ਨੂੰ ਕਰਜ਼ਾ ਸਮਝੌਤੇ ਹੇਠ 21 ਦਿਨਾਂ ਦੇ ਅੰਦਰ ਕਰੀਬ 71.7 ਕਰੋੜ ਡਾਲਰ ਦਾ ਭੁਗਤਾਨ ਕਰਨ।
ਲੰਡਨ ਵਿੱਚ ਇੰਗਲੈਡ ਐਂਡ ਵੇਲਸ ਦੀ ਹਾਈ ਕੋਰਟ ਦੀ ਵਪਾਰਕ ਯੂਨਿਟ ਨੇ ਕਿਹਾ ਕਿ ਕਰਜ਼ੇ 'ਤੇ ਅੰਬਾਨੀ ਨੇ ਨਿੱਜੀ ਗਾਰੰਟੀ ਦਿੱਤੀ ਸੀ, ਜਿਸ ਤੋਂ ਇਸ ਭੁਗਤਾਨ ਲਈ ਉਹ ਬੱਝੇ ਹੋਏ ਹਨ। ਇੰਡਸਟਰੀਅਲ ਐਂਡ ਕਮਰਸ਼ੀਅਲ ਬੈਂਕ ਆਫ ਚਾਈਨਾ ਦੀ ਮੁੰਬਈ ਬ੍ਰਾਂਚ, ਚਾਈਨਾ ਡਿਵੈਲਪਮੈਂਟ ਬੈਂਕ ਤੇ ਐਕਜ਼ਿਡਮ ਬੈਂਕ ਆਫ ਚਾਈਨਾ ਇਹ ਮਾਮਲਾ ਬ੍ਰਿਟੇਨ ਦੀ ਹਾਈ ਕੋਰਟ ਵਿੱਚ ਲੈ ਕੇ ਗਏ ਸਨ। ਇੰਡਸਟਰੀਅਲ ਐਂਡ ਕਮਰਸ਼ੀਅਲ ਬੈਂਕ ਆਫ ਚਾਈਨਾ ਦੀ ਅਗਵਾਈ ਵਿੱਚ ਤਿੰਨਾਂ ਬੈਂਕਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਸਾਲ 2012 ਵਿੱਚ ਅੰਬਾਨੀ ਨੂੰ ਇੱਕ ਕਰਜ਼ਾ ਮੋੜਨ ਦੇ ਲਈ ਉਨ੍ਹਾਂ ਦੀ ਨਿੱਜੀ ਗਾਰੰਟੀ 'ਤੇ ਕਰੀਬ 92.5 ਕਰੋੜ ਡਾਲਰ ਦਾ ਕਰਜ਼ਾ ਦਿੱਤਾ ਸੀ। ਅੰਬਾਨੀ ਇਸ ਮਾਮਲੇ ਵਿੱਚ ਨਿੱਜੀ ਗਾਰੰਟੀ ਤੋਂ ਮੁੱਕਰ ਰਹੇ ਹਨ। ਹੁਕਮਾਂ ਮੁਤਾਬਕ ਅੰਬਾਨੀ ਨੂੰ ਜੋ ਰਕਮ ਮੋੜਨੀ ਹੈ, ਉਸ ਵਿੱਚ ਸਮਝੌਤੇ ਦੇ 54.98 ਕਰੋੜ ਡਾਲਰ, 22 ਮਈ ਤੱਕ ਬਕਾਇਆ ਵਿਆਜ ਦੇ 5.19 ਕਰੋੜ ਡਾਲਰ ਅਤੇ ਡਿਫਾਲਟ ਵਿਆਜ 11.51 ਕਰੋੜ ਡਾਲਰ ਸ਼ਾਮਲ ਹਨ।