ਲੰਡਨ, 22 ਮਈ (ਪੋਸਟ ਬਿਊਰੋ)- ਕੌਂਮਾਂਤਰੀ ਓਲੰਪਿਕ ਕਮੇਟੀ (ਆਈ ਓ ਸੀ) ਦੇ ਮੁਖੀ ਥਾਮਸ ਬਾਕ ਨੇ ਕਿਹਾ ਹੈ ਕਿ ਜੇ ਟੋਕੀਓ ਓਲੰਪਿਕ 2021 ਵਿੱਚ ਨਾ ਹੋਈਆਂ ਤਾਂ ਰੱਦ ਕਰ ਦਿੱਤੀਆਂ ਜਾਣਗੀਆਂ।
ਟੋਕੀਓ ਓਲੰਪਿਕ ਇਸ ਸਾਲ 24 ਜੁਲਾਈ ਤੋਂ ਹੋਣੀਆਂ ਸਨ, ਪਰ ਕੋਰੋਨਾ ਵਾਇਰਸ ਦਾ ਖਤਰੇ ਦੇਖਦੇ ਹੋਏ ਇਨ੍ਹਾਂ ਨੂੰ ਅਗਲੇ ਸਾਲ ਲਈ ਮੁਲਤਵੀ ਕਰ ਦਿੱਤਾ ਸੀ। ਇਹ ਟੋਕੀਓ 23 ਜੁਲਾਈ ਤੋਂ 8 ਅਗਸਤ 2021 ਤੱਕ ਹੋਣਗੀਆਂ। ਅਪ੍ਰੈਲ ਵਿੱਚ 2020 ਦੇ ਸੀ ਈ ਓ ਤੋਸ਼ਿਰੋ ਮੁਤੋ ਨੇ ਓਲੰਪਿਕ ਖੇਡਾਂ ਨੂੰ ਹੋਰ ਕਿਸੇ ਥਾਂ ਕਰਵਾਉਣ ਤੋਂ ਇਨਕਾਰ ਕੀਤਾ ਸੀ ਜਦ ਕਿ ਜਾਪਾਨ ਦੇ ਪ੍ਰਧਾਨ ਮੰਤਰੀ ਸ਼ਿੰਜੋ ਆਬੇ ਨੇ ਬਾਅਦ ਵਿੱਚ ਸਪੱਸ਼ਟ ਕੀਤਾ ਸੀ ਕਿ ਕੋਰੋਨਾ 'ਤੇ ਕਾਬੂ ਪਾਉਣ ਤੱਕ ਓਲੰਪਿਕ ਨਹੀਂ ਹੋਵੇਗਾ। ਬਾਕ ਨੇ ਕਿਹਾ ਕਿ ਤੁਸੀਂ ਹਮੇਸ਼ਾ 3 ਤੋਂ 5 ਹਜ਼ਾਰ ਤੱਕ ਲੋਕਾਂ ਨੂੰ ਆਯੋਜਨ ਕਮੇਟੀ ਵਿੱਚ ਨਹੀਂ ਰੱਖ ਸਕਦੇ, ਤੁਸੀਂ ਹਰ ਸਾਲ ਸਾਡੀਆਂ ਖੇਡ ਫੈਡਰੇਸ਼ਨਾਂ ਦੇ ਦੁਨੀਆ ਭਰ ਵਿੱਚ ਖੇਡ ਪ੍ਰੋਗਰਾਮਾਂ ਨੂੰ ਨਹੀਂ ਬਦਲ ਸਕਦੇ ਤੇ ਤੁਸੀਂ ਖਿਡਾਰੀਆਂ ਨੂੰ ਅਨਸ਼ਿਚਤਤਾ ਦੇ ਮਾਹੌਲ ਵਿੱਚ ਨਹੀਂ ਰੱਖ ਸਕਦੇ। ਟੋਕੀਓ ਓਲੰਪਿਕ ਨੂੰ 23 ਜੁਲਾਈ 2021 ਤੱਕ ਰੱਖੇ ਜਾਣ ਦੇ ਕਾਰਨ ਉਸ ਸਮੇਂ ਆਯੋਜਿਤ ਕਈ ਖੇਡ ਆਯੋਜਨਾਂ ਦਾ ਪ੍ਰੋਗਰਾਮ ਪਹਿਲਾਂ ਹੀ ਬਦਲੇ ਜਾ ਚੁੱਕੇ ਹਨ। ਬਾਕ ਨੇ ਪ੍ਰਤੀਬੱਧਤਾ ਜਤਾਈ ਕਿ ਅਗਲੇ ਸਾਲ ਜੁਲਾਈ ਵਿੱਚ ਓਲੰਪਿਕ ਹੋ ਜਾਵੇਗਾ ਪਰ ਉਸ ਨੇ ਨਾਲ ਸਵੀਕਾਰ ਕੀਤਾ ਕਿ ਉਨ੍ਹਾਂ ਨੂੰ ਸਿਹਤ ਦੇ ਪ੍ਰਬੰਧਾਂ 'ਤੇ ਵੀ ਵਿਚਾਰ ਕਰਨਾ ਪਵੇਗਾ, ਜਿਸ ਵਿੱਚ ਐਥਲੀਟਾਂ ਤੇ ਹੋਰਨਾਂ ਹਿੱਸੇਦਾਰਾਂ ਲਈ ਕੁਆਰੰਟਾਇਨ ਸ਼ਾਮਲ ਹੋ ਸਕਦਾ ਹੈ। ਉਨ੍ਹਾ ਕਿਹਾ ਕਿ ਕਈ ਬਦਲ ਹਨ ਪਰ ਉਨ੍ਹਾਂ ਦਾ ਅਜੇ ਕੋਈ ਹੱਲ ਨਹੀਂ ਕੱਢਿਆ ਜਾ ਸਕਦਾ। ਉਸ ਨੇ ਕਿਹਾ ਕਿ ਕੋਈ ਵੀ ਫੈਸਲਾ ਤਦ ਲਿਆ ਜਾ ਸਕਦਾ ਹੈ ਜਦੋਂ ਅੱਗੇ ਦੀ ਤਸਵੀਰ ਸਪੱਸ਼ਟ ਹੋਵੇ।