ਮੁੰਬਈ, 22 ਮਈ (ਪੋਸਟ ਬਿਊਰੋ)- ਮਹਾਰਾਸ਼ਟਰ ਵਿੱਚ ਚੱਲਾੇ ਸਿਆਸੀ ਘਟਨਾਕ੍ਰਮ ਇਸ ਸੂਬੇ ਵਿੱਚ ਵੀ ਬੰਗਾਲ ਦੀ ਤਰ੍ਹਾਂ ਮੁੱਖ ਮੰਤਰੀ ਅਤੇ ਗਵਰਨਰ ਵਿੱਚ ਟਕਰਾਅ ਸ਼ੁਰੂ ਹੋਣ ਦਾ ਸੰਕੇਤ ਦੇਣ ਲੱਗਾ ਹੈ। ਬੁੱਧਵਾਰ ਰਾਤ ਗਵਰਨਰ ਵੱਲੋਂ ਬੁਲਾਈ ਬੈਠਕ ਵਿੱਚ ਮੁੱਖ ਮੰਤਰੀ ਊਧਵ ਠਾਕਰੇ ਦਾ ਦੂਰੀ ਬਣਾਉਣਾ ਇਸੇ ਦਾ ਸੰਕੇਤ ਹੈ।
ਗਵਰਨਰ ਭਗਤ ਸਿੰਘ ਕੋਸ਼ਿਆਰੀ ਨੇ ਬੁੱਧਵਾਰ ਰਾਤ ਨੌਂ ਵਜੇ ਮਹਾਰਾਸ਼ਟਰ ਵਿੱਚ ਕੋਵਿਡ ਦੀ ਸਥਿਤੀ ਦੀ ਘੋਖ ਲਈ ਬੈਠਕ ਬੁਲਾਈ ਸੀ। ਇਸ ਵਿੱਚ ਉਨ੍ਹਾਂ ਨੇ ਸੂਬੇ ਦੇ ਪ੍ਰਮੁੱਖ ਅਧਿਕਾਰੀਆਂ ਦੇ ਨਾਲ ਮੁੱਖ ਮੰਤਰੀ ਊਧਵ ਠਾਕਰੇ ਨੂੰ ਵੀ ਸੱਦਾ ਦਿੱਤਾ ਸੀ, ਪਰ ਓਥੇ ਸ਼ਿਵ ਸੈਨਾ ਦੇ ਸੈਕਟਰੀ ਮਿਲਿੰਦ ਨਾਰਵੇਕਰ ਗਏ। ਬਾਅਦ ਵਿੱਚ ਪਤਾ ਲੱਗਾ ਕਿ ਮੁੱਖ ਮੰਤਰੀ ਨੇ ਸ਼ਾਮ ਸੱਤ ਵਜੇ ਗਵਰਨਰ ਨੂੰ ਫੋਨ ਕਰ ਕੇ ਨਾ ਆਉਣ ਦੀ ਸੂਚਨਾ ਦੇ ਦਿੱਤੀ ਸੀ। ਵਰਨਣ ਯੋਗ ਹੈ ਕਿ ਕੱਲ੍ਹ ਭਾਜਪਾ ਦੇ ਸੀਨੀਅਰ ਨੇਤਾ ਅਤੇ ਰਾਜ ਸਭਾ ਮੈਂਬਰ ਸੁਬਰਾਮਨੀਅਮ ਸਵਾਮੀ ਨੇ ਇੱਕ ਟਵੀਟ ਕਰ ਕੇ ਮਹਾਰਾਸ਼ਟਰ ਵਿੱਚ ਕੋਰੋਨਾ ਦੀ ਵਿਗੜੀ ਦਸ਼ਾ ਕਾਰਨ ਰਾਸ਼ਟਰਪਤੀ ਸ਼ਾਸਨ ਲਾਉਣ ਦੀ ਮੰਗ ਕੀਤੀ ਸੀ। ਗਵਰਨਰ ਤੇ ਸਰਕਾਰ ਵਿੱਚ ਮਤਭੇਦ ਕੁਝ ਸਮਾਂ ਪਹਿਲਾਂ ਊਧਵ ਠਾਕਰੇ ਨੂੰ ਵਿਧਾਨ ਪ੍ਰੀਸ਼ਦ ਵਿੱਚ ਨਾਮਜ਼ਦ ਕਰਨ ਵੇਲੇ ਵੀ ਦਿਖਾਈ ਦੇ ਚੁੱਕੇ ਹਨ। ਓਦੋਂ ਰਾਜ ਸਰਕਾਰ ਨੇ ਊਧਵ ਠਾਕਰੇ ਨੂੰ ਗਵਰਨਰ ਕੋਟੇ 'ਚੋਂ ਵਿਧਾਨ ਪ੍ਰੀਸ਼ਦ ਵਿੱਚ ਨਾਮਜ਼ਦ ਕਰਨ ਦਾ ਪ੍ਰਸਤਾਵ ਭੇਜਿਆ ਸੀ, ਪਰ ਗਵਰਨਰ ਨੇ ਠੁਕਰਾ ਦਿੱਤਾ ਸੀ। ਉਨ੍ਹਾਂ ਨੇ ਚੋਣ ਕਮਿਸ਼ਨ ਨੂੰ ਵਿਧਾਨ ਪ੍ਰੀਸ਼ਦ ਦੀ ਚੋਣ ਕਰਾਉਣ ਲਈ ਕਹਿ ਦਿੱਤਾ ਸੀ। ਊਧਵ ਨੂੰ ਪਿਛਲੇ ਹਫਤੇ ਚੋਣ ਵਿੱਚ ਹਿੱਸਾ ਲੈ ਕੇ ਵਿਧਾਨ ਪ੍ਰੀਸ਼ਦ ਦੀ ਮੈਂਬਰਸ਼ਿਪ ਮਿਲੀ ਹੈ। ਊਧਵ ਦੀ ਅਗਵਾਈ ਵਿੱਚ ਚੱਲ ਰਹੀ ਤਿੰਨ ਪਾਰਟੀਆਂ ਦੀ ਮਹਾਰਾਸ਼ਟਰ ਵਿਕਾਸ ਅਘਾੜੀ ਸਰਕਾਰ ਨੂੰ ਭਾਜਪਾ ਨੇਤਾਵਾਂ ਦਾ ਵਾਰ-ਵਾਰ ਰਾਜ ਭਵਨ ਜਾਣਾ ਰਾਸ ਨਹੀਂ ਆ ਰਿਹਾ। ਬੀਤੇ ਮੰਗਲਵਾਰ ਵਿਰੋਧੀ ਧਿਰ ਦੇ ਆਗੂ ਦੇਵੇਂਦਰ ਫੜਨਵੀਸ ਦੀ ਅਗਵਾਈ ਵਿੱਚ ਭਾਜਪਾ ਦਾ ਵਫਦ ਮੰਡਲ ਗਵਰਨਰ ਨੂੰ ਮਿਲਿਆ ਸੀ। ਇਹ ਵਫਦ ਇਸ ਰਾਜ ਵਿੱਚ ਕੋਵਿਡ 19 ਦੀ ਵਿਗੜਦੀ ਸਥਿਤੀ ਬਾਰੇ ਸ਼ਿਕਾਇਤ ਕਰਨ ਗਿਆ ਸੀ। ਕਿਹਾ ਜਾ ਰਿਹਾ ਹੈ ਕਿ ਇਸ ਵਫਦ ਦੀ ਸ਼ਿਕਾਇਤ ਦੇ ਬਾਅਦ ਗਵਰਨਰ ਨੇ ਊਧਵ ਦੇ ਨਾਲ ਬੈਠਕ ਦਾ ਫੈਸਲਾ ਕੀਤਾ ਹੋਵੇਗਾ, ਜਿਸ ਵਿੱਚ ਹਿੱਸਾ ਲੈਣ ਤੋਂ ਮੁੱਖ ਮੰਤਰੀ ਪਾਸਾ ਵੱਟ ਗਏ ਹਨ।