ਓਨਟਾਰੀਓ, 22 ਮਈ (ਪੋਸਟ ਬਿਊਰੋ) : ਓਨਟਾਰੀਓ ਤੇ ਕਿਊਬਿਕ ਦੀਆਂ ਲਾਂਗ ਟਰਮ ਕੇਅਰ ਫੈਸਿਲਿਟੀਜ਼ ਵਿੱਚ ਕੰਮ ਕਰਦੇ ਸਮੇਂ ਘੱਟੋ ਘੱਟ 28 ਸੈਨਿਕ ਕੋਵਿਡ-19 ਦਾ ਸਿ਼ਕਾਰ ਹੋ ਗਏ। ਇਸ ਦਾ ਖੁਲਾਸਾ ਕੈਨੇਡੀਅਨ ਆਰਮਡ ਫੋਰਸਿਜ਼ ਵੱਲੋਂ ਕੀਤਾ ਗਿਆ।
ਵੀਰਵਾਰ ਨੂੰ ਫੌਜ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਵਿੱਚ ਆਖਿਆ ਗਿਆ ਕਿ 28 ਸਰਵਿਸ ਮੈਂਬਰਾਂ ਨੂੰ ਅਜਿਹੀਆਂ ਫੈਸਿਲਿਟੀਜ਼ ਵਿੱਚ ਕੰਮ ਕਰਨ ਕਾਰਨ ਸਾਹ ਸਬੰਧੀ ਬਿਮਾਰੀ ਹੋਣ ਉਪਰੰਦ ਜਦੋਂ ਟੈਸਟ ਕੀਤਾ ਗਿਆ ਤਾਂ ਉਹ ਕੋਵਿਡ-19 ਪਾਜ਼ੀਟਿਵ ਨਿਕਲੇ। ਪਿਛਲੇ ਹਫਤੇ ਪੰਜ ਸੈਨਿਕਾਂ ਨੂੰ ਕੋਵਿਡ-19 ਹੋਇਆ ਸੀ ਜਦਕਿ ਇਸ ਹਫਤੇ ਇਨ੍ਹਾਂ ਦੀ ਗਿਣਤੀ ਵਿੱਚ ਕਾਫੀ ਇਜਾਫਾ ਹੋਇਆ ਹੈ।
ਇਸ ਤੋਂ ਪਹਿਲਾਂ ਫੌਜੀ ਅਧਿਕਾਰੀਆਂ ਨੇ ਆਖਿਆ ਸੀ ਕਿ ਉਹ ਹਰ ਦੋ ਹਫਤੇ ਬਾਅਦ ਇਨ੍ਹਾਂ ਅੰਕੜਿਆਂ ਬਾਰੇ ਅਪਡੇਟ ਵਾਰੀ ਦਿਆ ਕਰਨਗੇ। ਹੁਣ ਹਥਿਆਰਬੰਦ ਸੈਨਾਵਾਂ ਦਾ ਕਹਿਣਾ ਹੈ ਕਿ ਉਹ ਰੋਜ਼ਾਨਾ ਇਹ ਅਪਡੇਟ ਪਬਲਿਸ਼ ਕਰਨਗੇ। ਫੌਜ ਨੂੰ ਖਦਸ਼ਾ ਹੈ ਕਿ ਲਾਂਗ ਟਰਮ ਕੇਅਰ ਹੋਮਜ਼ ਵਿੱਚ ਕੰਮ ਕਰਨ ਵਾਲੇ ਸਰਵਿਸ ਮੈਂਬਰਾਂ ਦੇ ਕੋਵਿਡ-19 ਪਾਜ਼ੀਟਿਵ ਪਾਏ ਜਾਣ ਦੀ ਹੋਰ ਸੰਭਾਵਨਾ ਹੈ। ਵੀਰਵਾਰ ਨੂੰ ਰਿਪੋਰਟ ਕੀਤੇ ਗਏ ਸੋਲਾਂ ਪਾਜ਼ੀਟਿਵ ਕੇਸ ਕਿਊਬਿਕ ਦੇ ਲਾਂਗ ਟਰਮ ਕੇਅਰ ਹੋਮਜ਼ ਵਿੱਚ ਤਾਇਨਾਤ ਸਰਵਿਸ ਮੈਂਬਰਾਂ ਦੇ ਹਨ ਜਦਕਿ 12 ਮਾਮਲੇ ਓਨਟਾਰੀਓ ਦੇ ਹਨ।
ਇਥੇ ਦਸਣਾ ਬਣਦਾ ਹੈ ਕਿ 30 ਲਾਂਗ ਟਰਮ ਕੇਅਰ ਹੋਮਜ ਵਿਚ ਸੈਨਾਂ ਦੇ 1700 ਮੈਂਬਰ ਕੰਮ ਕਰ ਕਰ ਰਹੇ ਹਨ। ਇਨ੍ਹਾਂ ਲਾਂਗ ਟਰਮ ਹੋਮਜ ਵਿਚ ਉਹ ਸਿਰਫ ਮੈਡੀਕਲ ਸਹਾਇਤਾ ਹੀ ਦਿੰਦੇ ਹਨ ਸਗੋਂ ਸਾਫ ਸਫਾਈ, ਫੂਡ ਸਰਵ ਕਰਨਾ ਤੇ ਰੈਜੀਡੈਂਟਸ ਦੀਆਂ ਮੁਢਲੀਆਂ ਲੋੜਾਂ ਵੀ ਪੂਰੀਆਂ ਕਰਦੇ ਹਨ।