ਕੋਰੋਨਾ ਵਾਇਰਸ ਦੇ ਕਾਰਨ ਇੰਡਸਟਰੀ ਦਾ ਪੂਰਾ ਕੰਮ ਬੰਦ ਪਿਆ ਹੈ। ਕਈ ਫਿਲਮਾਂ ਲਟਕੀਆਂ ਪਈਆਂ ਹਨ ਤਾਂ ਕੁਝ ਦਾ ਬਜਟ ਬੁਰੀ ਤਰ੍ਹਾਂ ਪ੍ਰਭਾਵਤ ਹੋਇਆ ਹੈ। ਸੂਤਰਾਂ ਮੁਤਾਬਕ ਬਜਟ ਪ੍ਰਭਾਵਤ ਹੋਣ ਨਾਲ ਕਈ ਮੇਕਰਸ ਐਕਟਰਾਂ ਦੀ ਸੈਲਰੀ ਵਿੱਚ ਕਟੌਤੀ ਕਰ ਸਕਦੇ ਹਨ। ਪਿੱਛੇ ਜਿਹੇ ਇੱਕ ਸਵਾਲ-ਜਵਾਬ ਸੈਸ਼ਨ ਵਿੱਚ ਜਦ ਅਭਿਨੇਤਰੀ ਤਾਪਸੀ ਪੰਨੂ ਨੂੰ ਇਸ ਬਾਰੇ ਪੁੱਛਿਆ ਗਿਆ ਤਾਂ ਉਸ ਨੇ ਕਿਹਾ, ‘‘ਅਜੇ ਕੋਈ ਸ਼ੂਟਿੰਗ ਹੋ ਨਹੀਂ ਰਹੀ ਤਾਂ ਸਾਨੂੰ ਕੋਈ ਸੈਲਰੀ ਨਹੀਂ ਮਿਲ ਰਹੀ ਅਤੇ ਜੇ ਅੱਗੇ ਜਾ ਕੇ ਸਾਡੀ ਸੈਲਰੀ ਵਿੱਚ ਕਟੌਤੀ ਹੋਵੇਗੀ ਤਾਂ ਮੈਂ ਉਸ ਦੇ ਲਈ ਤਿਆਰ ਹਾਂ।”
ਸੈਸ਼ਨ ਦੌਰਾਨ ਤਾਪਸੀ ਨੇ ਸਿੱਧੇ ਓ ਟੀ ਟੀ ਪਲੇਟਫਾਰਮ 'ਤੇ ਫਿਲਮਾਂ ਰਿਲੀਜ਼ ਕਰਨ 'ਤੇ ਥੀਏਟਰ ਚੇਨ ਵਾਲਿਆਂ ਦੇ ਨਾਰਾਜ਼ਗੀ ਪ੍ਰਗਟ ਕਰਨ 'ਤੇ ਕਿਹਾ, ‘‘ਮੈਂ ਹੈਰਾਨ ਨਹੀਂ ਕਿ ਉਹ ਨਾਰਾਜ਼ ਹਨ। ਉਨ੍ਹਾਂ ਦਾ ਗੁੱਸਾ ਜਾਇਜ਼ ਹੈ, ਪਰ ਸਾਨੂੰ ਇੰਤਜ਼ਾਰ ਕਰਨਾ ਚਾਹੀਦਾ ਹੈ। ਮੈਨੂੰ ਯਕੀਨ ਹੈ ਕਿ ਭਾਰਤ ਵਿੱਚ ਥੀਏਟਰ ਕਦੇ ਬਿਜ਼ਨਸ ਤੋਂ ਬਾਹਰ ਨਹੀਂ ਜਾਣਗੇ।”