ਅੰਮ੍ਰਿਤਸਰ, 21 ਮਈ, (ਪੋਸਟ ਬਿਊਰੋ)- ਅਮਰੀਕਾ ਤੋਂ ਇੱਕ ਦਿਨ ਪਹਿਲਾਂ 167 ਲੋਕਾਂ ਨੂੰ ਲਿਆਏ ਜਹਾਜ਼ ਵਿੱਚ ਇਕ ਅਲ-ਕਾਇਦਾ ਦਾ ਖਤਰਨਾਕ ਅੱਤਵਾਦੀ ਇਬਰਾਹੀਮ ਜ਼ੁਬੇਰ ਮੁਹੰਮਦ ਨਿਕਲਿਆ ਹੈ। ਪਤਾ ਲੱਗਾ ਹੈ ਕਿ ਜ਼ੁਬੈਰ ਮੁਹੰਮਦ ਇਸ ਅੱਤਵਾਦੀ ਜਥੇਬੰਦੀ ਦਾ ਫਾਈਨਾਂਸ ਵਿੰਗ ਦੇਖਦਾ ਸੀ। ਪੇਸ਼ੇ ਤੋਂ ਇੰਜੀਨੀਅਰ ਇਸ ਅੱਤਵਾਦੀ ਨੂੰ ਇੱਕ ਅਮਰੀਕੀ ਅਦਾਲਤ ਅੱਤਵਾਦੀ ਸਰਗਰਮੀਆਂ ਵਿੱਚ ਸ਼ਾਮਲ ਹੋਣ ਦਾ ਦੋਸ਼ੀ ਕਰਾਰ ਦੇ ਚੁੱਕੀ ਹੈ।
ਇਸ ਬਾਰੇ ਅੰਮ੍ਰਿਤਸਰ ਪੁਲਿਸ ਦੇ ਕਮਿਸ਼ਨਰ ਸੁਖਚੈਨ ਸਿੰਘ ਗਿੱਲ ਨੇ ਦੱਸਿਆ ਕਿ ਇਬਰਾਹੀਮ ਦੇ ਪਿਛੋਕੜ ਤੇ ਪੁਰਾਣੀ ਹਿਸਟਰੀ ਬਾਰੇ ਉਨ੍ਹਾਂ ਨੂੰ ਪਤਾ ਨਹੀਂ ਤੇ ਬਾਕੀਆਂ ਵਾਂਗ ਉਸ ਨੂੰ ਕੁਆਰੰਟਾਈਨ ਕੀਤਾ ਗਿਆ ਹੈ। ਅੰਮ੍ਰਿਤਸਰ ਦੇ ਸਿਵਲ ਸਰਜਨ ਜੁਗਲ ਕਿਸ਼ੋਰ ਨੇ ਮੰਨਿਆ ਕਿ ਇਬਰਾਹੀਮ ਜ਼ੁਬੇਰ ਮੁਹੰਮਦ ਨਾਂ ਦਾ ਬੰਦਾ ਕੁਆਰੰਟਾਈਨ ਕੀਤਾ ਗਿਆ ਹੈ। ਅਮਰੀਕਾ ਤੋਂ ਡੀਪੋਰਟ ਹੋਏ 167 ਲੋਕਾਂ ਵਿੱਚ ਇਬਰਾਹੀਮ ਮੁਹੰਮਦ ਦਾ ਨਾਂ 163 ਨੰਬਰ ਉੱਤੇ ਦਰਜ ਹੈ। ਉਹ ਮੂਲ ਰੂਪ ਵਿੱਚ ਹੈਦਰਾਬਾਦ ਦਾ ਵਸਨੀਕ ਅਤੇ ਪੇਸ਼ੇ ਤੋਂ ਇੰਜੀਨੀਅਰ ਹੈ। ਦੱਸਿਆ ਜਾਂਦਾ ਹੈ ਕਿ ਉਹ 2001 ਵਿੱਚ ਭਾਰਤ ਤੋਂ ਅਮਰੀਕਾ ਗਿਆ ਤੇ ਓਥੇ ਓਹੀਓ ਰਾਜ ਵਿੱਚ ਆਪਣੀ ਪੜ੍ਹਾਈ ਕਰਦਿਆਂ ਅੱਤਵਾਦੀ ਸੰਗਠਨ ਅਲ ਕਾਇਦਾ ਦੇ ਸੰਪਰਕ ਵਿੱਚ ਆ ਗਿਆ ਸੀ। ਇਸ ਪਿੱਛੋਂ ਉਹ ਅਰਬ ਦੇਸ਼ਾਂ ਵਿੱਚ ਘੁੰਮਦਾ ਰਿਹਾ ਤੇ ਸਾਲ 2006 ਵਿੱਚ ਉਸ ਨੇ ਇੱਕ ਅਮਰੀਕੀ ਲੜਕੀ ਨਾਲ ਵਿਆਹ ਕੀਤਾ ਸੀ। ਅਮਰੀਕੀ ਸਰਕਾਰ ਨੂੰ ਪਤਾ ਲੱਗਾ ਸੀ ਕਿ ਇਬਰਾਹੀਮ ਅਲ-ਕਾਇਦਾ ਦਾ ਫਾਈਨਾਂਸ ਵਿੰਗ ਦੇਖਦਾ ਹੈ ਤੇ ਅੱਤਵਾਦੀ ਵਾਰਦਾਤਾਂ ਲਈ ਫੰਡਿੰਗ ਦਾ ਕੰਮ ਸੰਭਾਲ ਰਿਹਾ ਹੈ।