ਓਟਵਾ, 21 ਮਈ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਕੋਵਿਡ-19 ਮਹਾਂਮਾਰੀ ਕਾਰਨ ਰੱਦ ਹੋਈਆਂ ਉਡਾਨਾਂ ਤੋਂ ਬਾਅਦ ਪੈਸੈਂਜਰਜ਼ ਨੂੰ ਰਿਫੰਡ ਦੇਣ ਦੀ ਥਾਂ ੳੱੁਤੇ ਟਰੈਵਲ ਵਾਊਚਰਜ਼ ਦੀ ਪੇਸ਼ਕਸ਼ ਕਰਨ ਵਾਲੀਆਂ ਏਅਰਲਾਈਨਜ਼ ਦੇ ਇਸ ਮਾਮਲੇ ਦੀ ਸਰਕਾਰ ਜਾਂਚ ਕਰ ਰਹੀ ਹੈ।
ਟਰੂਡੋ ਨੇ ਆਖਿਆ ਕਿ ਸਰਕਾਰ ਨੂੰ ਏਅਰਲਾਈਨਜ਼ ਦੇ ਨਾਲ ਬਹੁਤ ਹੀ ਸਾਵਧਾਨੀ ਨਾਲ ਇਸ ਸਬੰਧ ਵਿੱਚ ਗੱਲ ਕਰਨੀ ਹੋਵੇਗੀ ਤੇ ਇਸ ਦੇ ਨਾਲ ਹੀ ਟਰੈਵਲਰਜ਼ ਨਾਲ ਵੀ ਇਸ ਬਾਬਤ ਢੰਗ ਨਾਲ ਗੱਲ ਕਰਨੀ ਹੋਵੇਗੀ। ਅਜਿਹਾ ਇਸ ਲਈ ਤਾਂ ਕਿ ਟਰੈਵਲਰਜ਼ ਨਾਲ ਵੀ ਸਹੀ ਵਰਤਾਓ ਹੋ ਸਕੇ ਤੇ ਇੰਡਸਟਰੀ ਨੂੰ ਵੀ ਕੋਈ ਨੁਕਸਾਨ ਨਾ ਪਹੁੰਚੇ ਅਤੇ ਸੰਤੁਲਨ ਬਣਿਆ ਰਹੇ।
ਕੈਨੇਡਾ ਦੀਆਂ ਵੱਡੀਆਂ ਏਅਰਲਾਈਨਜ਼ ਵਿੱਚੋਂ ਕਿਸੇ ਵੱਲੋਂ ਵੀ ਮਾਰਚ ਦੇ ਮੱਧ ਤੋਂ ਰੱਦ ਹੋਈਆਂ ਉਡਾਨਾਂ ਬਦਲੇ ਆਪਣੇ ਪੈਸੈਂਜਰਜ਼ ਨੂੰ ਨਕਦੀ ਵਾਪਿਸ ਨਹੀਂ ਕੀਤੀ ਜਾ ਰਹੀ ਸਗੋਂ ਏਅਰਲਾਈਨਜ਼ 24 ਮਹੀਨਿਆਂ ਲਈ ਵਾਊਚਰ ਦੀ ਪੇਸ਼ਕਸ਼ ਕਰ ਰਹੀਆਂ ਹਨ। ਜਿਸ ਕਾਰਨ ਕਈ ਕਸਟਮਰਜ਼ ਇਸ ਲਈ ਪਰੇਸ਼ਾਨ ਹਨ ਕਿ ਉਨ੍ਹਾਂ ਨੂੰ ਪੂਰੇ ਪੈਸੇ ਦੇਣ ਦੇ ਬਾਵਜੂਦ ਉਹ ਸੇਵਾਵਾਂ ਨਹੀਂ ਮਿਲੀਆਂ ਜਿਨ੍ਹਾਂ ਦੀ ਉਨ੍ਹਾਂ ਨੂੰ ਦਰਕਾਰ ਸੀ। ਇਸ ਸਬੰਧ ਵਿੱਚ ਦਾਇਰ ਪਟੀਸ਼ਨਾਂ ਵਿੱਚ ਏਅਰਲਾਈਨਜ਼ ਦੀ ਵਿੱਤੀ ਮਦਦ ਕੀਤੇ ਜਾਣ ਤੋਂ ਪਹਿਲਾਂ ਕੈਨੇਡੀਅਨਾਂ ਦਾ ਪੂਰਾ ਪੈਸਾ ਰਿਫੰਡ ਕਰਵਾਉਣ ਦੀ ਮੰਗ ਕੀਤੀ ਗਈ ਹੈ।