ਓਟਵਾ, 21 ਮਈ (ਪੋੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀਰਵਾਰ ਨੂੰ ਆਖਿਆ ਕਿ ਜੇ ਕੈਨੇਡੀਅਨਜ਼ ਮਹਾਂਮਾਰੀ ਕਾਰਨ ਲਾਏ ਜਾਣ ਵਾਲੇ ਲਾਕਡਾਊਨਜ਼ ਤੇ ਕੋਵਿਡ-19 ਸੰਕ੍ਰਮਣ ਦੀ ਦੂਜੀ ਸੰਭਾਵੀ ਲਹਿਰ ਤੋਂ ਬਚਣਾ ਚਾਹੁੰਦੇ ਹਨ ਤਾਂ ਉਨ੍ਹਾਂ ਨੂੰ ਮਾਸਕ ਪਾ ਕੇ ਰੱਖਣੇ ਚਾਹੀਦੇ ਹਨ ਤੇ ਆਪਣੀ ਭੂਮਿਕਾ ਨਿਭਾਉਣੀ ਚਾਹੀਦੀ ਹੈ।
ਟਰੂਡੋ ਨੇ ਆਖਿਆ ਕਿ ਅਧਿਕਾਰੀ ਕੋਵਿਡ-19 ਸੰਕ੍ਰਮਣ ਦੇ ਦੂਜੇ ਸੰਭਾਵੀ ਗੇੜ ਲਈ ਇਸ ਸਾਲ ਦੇ ਅੰਤ ਤੱਕ ਤਿਆਰੀ ਕਰ ਰਹੇ ਹਨ। ਟਰੂਡੋ ਨੇ ਆਖਿਆ ਕਿ ਜਿੱਥੇ ਫਿਜ਼ੀਕਲ ਡਿਸਟੈਂਸਿੰਗ ਸੰਭਵ ਨਾ ਹੋਵੇ ੳੱੁਥੇ ਮਾਸਕ ਪਾ ਕੇ ਨਾਗਰਿਕ ਆਪਣੀ ਨਿਜੀ ਜਿ਼ੰਮੇਵਾਰੀ ਪੂਰੀ ਕਰ ਸਕਦੇ ਹਨ। ਇਸ ਨਾਲ ਭਵਿੱਖ ਵਿੱਚ ਅਜਿਹੀਆਂ ਆਊਟਬ੍ਰੇਕਸ ਤੋਂ ਬਚਿਆ ਜਾ ਸਕਦਾ ਹੈ। ਉਨ੍ਹਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਮਹਾਂਮਾਰੀਆਂ ਅਕਸਰ ਦੂਹਰੀ ਵਾਰੀ ਮਾਰ ਕਰਦੀਆਂ ਹਨ। ਇਸ ਲਈ ਦੇਸ਼ ਭਰ ਦੀਆਂ ਸਰਕਾਰਾਂ ਨੂੰ ਤੇਜ਼ੀ ਨਾਲ ਲੋਕਾਂ ਦੇ ਟੈਸਟ ਕਰਨ, ਉਨ੍ਹਾਂ ਦੇ ਕਾਂਟੈਕਟਸ ਤਲਾਸ਼ਣ ਤੇ ਪਾਜ਼ੀਟਿਵ ਕੇਸਾਂ ਨੂੰ ਵੱਖ ਕਰਨ ਦੀ ਕੋਸਿ਼ਸ਼ ਕਰਨੀ ਚਾਹੀਦੀ ਹੈ।
ਪਰ ਉਨ੍ਹਾਂ ਆਖਿਆ ਕਿ ਇਸ ਸਭ ਦੇ ਨਾਲ ਨਾਲ ਲੋਕਾਂ ਨੂੰ ਵੀ ਆਪਣੀ ਸਰਗਰਮ ਭੂਮਿਕਾ ਨਿਭਾਉਣੀ ਚਾਹੀਦੀ ਹੈ। ਉਨ੍ਹਾਂ ਆਖਿਆ ਕਿ ਅਸੀਂ ਜਾਣਦੇ ਹਾਂ ਕਿ ਅਜੇ ਹੋਰ ਕਾਫੀ ਕੁਝ ਕੀਤਾ ਜਾਣਾ ਬਾਕੀ ਹੈ। ਹੁਣ ਜਦੋਂ ਅਰਥਚਾਰਾ ਮੁੜ ਖੁਲ੍ਹਣ ਜਾ ਰਿਹਾ ਹੈ ਤਾਂ ਨਾਗਰਿਕ ਪੂਰੀ ਤਰ੍ਹਾਂ ਚੌਕਸ ਹੋਣਗੇ ਤੇ ਇਸ ਗੱਲ ਦਾ ਧਿਆਨ ਰੱਖਣਗੇ ਕਿ ਉਹ ਕਿਸ ਤਰ੍ਹਾਂ ਵਿਚਰਨ ਕਿਉਂਕਿ ਇਸ ਉੱਤੇ ਹੀ ਸਾਡਾ ਸੁਰੱਖਿਅਤ ਢੰਗ ਨਾਲ ਅੱਗੇ ਵਧਣਾ ਸੰਭਵ ਹੋ ਸਕੇਗਾ।