ਨਵੀਂ ਦਿੱਲੀ, 8 ਨਵੰਬਰ (ਪੋਸਟ ਬਿਊਰੋ)- ਕੀ ਕੋਈ ਅੰਦਾਜ਼ਾ ਲਾ ਸਕਦੇ ਹੈ ਕਿ ਸਬਜ਼ੀ ਵੇਚਦੀ ਇਕ ਮਹਿਲਾ ਅਚਾਨਕ 17 ਕੰਪਨੀਆਂ ਦੀ ਮਾਲਕ ਬਣ ਜਾਏ ਤੇ ਉਸ ਦਾ ਇਕ ਹਜ਼ਾਰ ਕਰੋੜ ਦਾ ਟਰਨਓਵਰ ਹੋ ਜਾਵੇ। ਤਿਰੂਪਤੀ ਦੇ ਦੱਖਣੀ ਹਿੱਸੇ `ਚ ਆਪਣੀ ਮਾਂ ਨਾਲ ਸਬਜ਼ੀਆਂ ਵੇਚਣ ਵਾਲੀ ਇਸ ਮਹਿਲਾ ਨੇ ਠੱਗੀ ਨਾਲ ਇਸ ਤਰ੍ਹਾਂ ਕੀਤਾ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਠੱਗੀ ਸਕੀਮ ਚਲਾਉਣ ਵਾਲੀ ਇਸ ਮਹਿਲਾ ਦਾ ਨਾਮ ਨੌਹੇਰਾ ਸ਼ੇਖ ਹੈ ਅਤੇ ਉਹ ਠੱਗੀ ਸਕੀਮ ਚਲਾਉਂਦੀ ਹੈ ਅਤੇ 2 ਲੱਖ ਤੋਂ ਵੱਧ ਨਿਵੇਸ਼ਕ ਇਸ ਨਾਲ ਜੁੜੇ ਸਨ। ਇਸ ਮਹਿਲਾ ਨੂੰ 500 ਕਰੋੜ ਦੇ ਘਪਲੇ ਦੇ ਦੋਸ਼ ਵਿਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਇਸ ਦੌਰਾਨ ਨੌਹੇਰਾ ਨੇ ਲੜਕੀਆਂ ਲਈ ਮਦਰਸਾ ਖੋਲ੍ਹਿਆ ਤੇ ਇਕ ਪਾਰਟੀ ਵੀ ਬਣਾਈ, ਪਰ ਬੀਤੇ 7 ਸਾਲਾਂ ਵਿਚ ਨੌਹੇਰਾ ਸ਼ੇਖ `ਤੇ ਨਿਵੇਸ਼ਕਾਂ ਦਾ ਪੈਸਾ ਹੜੱਪਣ ਦਾ ਵੀ ਦੋਸ਼ ਲੱਗਾ ਹੈ। ਦਰਅਸਲ ਠੱਗੀ ਸਕੀਮ ਨਾਲ ਨੌਹੇਰਾ ਦੀਆਂ ਕੰਪਨੀਆਂ ਨਿਵੇਸ਼ਕਾਂ ਨੂੰ 36 ਤੋਂ 42 ਫੀਸਦੀ ਦਾ ਰਿਟਰਨ ਦੇਣ ਦਾ ਭਰੋਸਾ ਦਿੰਦੀਆਂ ਸਨ ਤੇ ਮਈ 2018 `ਚ ਉਸ ਨੇ ਫੰਡ ਨਾਲ ਹੇਰਾਫੇਰੀ ਕਰਨੀ ਸ਼ੁਰੂ ਕਰ ਦਿੱਤੀ ਸੀ। ਕੁੱਲ ਮਿਲਾ ਕੇ ਸ਼ੇਖ ਉਤੇ 500 ਕਰੋੜ ਦੀ ਹੇਰਾਫੇਰੀ ਦਾ ਦੋਸ਼ ਹੈ। ਮੁੰਬਈ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰਨ ਪਿੱਛੋਂ ਹੈਦਰਾਬਾਦ ਪੁਲਸ ਦੇ ਹਵਾਲੇ ਕਰ ਦਿੱਤਾ ਹੈ।