ਓਟਵਾ, 6 ਨਵੰਬਰ (ਪੋਸਟ ਬਿਊਰੋ) : ਭਾਰਤ ਵਿੱਚ ਰਾਜ ਸਭਾ ਮੈਂਬਰ ਡਾ. ਸੁਬਰਾਮਨੀਅਮ ਸਵਾਮੀ ਨੇ ਸਿ਼੍ਰੰਗੇਰੀ ਵਿੱਦਿਆ ਭਾਰਤੀ ਫਾਊਂਡੇਸ਼ਨ ਵੱਲੋਂ ਬੀਤੇ ਦਿਨੀਂ ਦਿੱਤੇ ਗਏ ਲੰਚ ਮੌਕੇ ਆਖਿਆ ਕਿ ਭਾਰਤ ਅਗਲੇ ਦਹਾਕੇ ਵਿੱਚ ਆਰਥਿਕ ਪਾਵਰਹਾਊਸ ਵਜੋਂ ਉਭਰ ਕੇ ਸਾਹਮਣੇ ਆ ਸਕਦਾ ਹੈ ਬਸ਼ਰਤੇ ਉਹ ਨਿਵੇਕਲੀਆਂ ਤੇ ਕਾਰੋਬਾਰੀ ਆਰਥਿਕ ਨੀਤੀਆਂ ਦਾ ਪਾਲਣ ਕਰਦਾ ਰਹੇ।
ਇਸ ਮੌਕੇ 400 ਦੇ ਕਰੀਬ ਮਹਿਮਾਨ ਪਹੁੰਚੇ। ਡਾ. ਸਵਾਮੀ, ਜੋ ਕਿ ਹਾਰਵਰਡ ਤੋਂ ਸਿਖਲਾਈ ਪ੍ਰਾਪਤ ਅਰਥਸ਼ਾਸਤਰੀ ਹਨ ਤੇ ਉਸੇ ਯੂਨੀਵਰਸਿਟੀ ਵਿੱਚ ਪ੍ਰੋਫੈਸਰ ਵੀ ਸਨ, ਨੇ ਮਾਰਕਿਟ ਫਰੈਂਡਲੀ ਆਰਥਿਕ ਨੀਤੀਆਂ ਦੀ ਅਹਿਮੀਅਤ ਉੱਤੇ ਜ਼ੋਰ ਦਿੱਤਾ। ਉਨ੍ਹਾਂ ਆਖਿਆ ਕਿ ਚੰਦਰ ਸ਼ੇਖਰ ਸਰਕਾਰ ਨੇ ਭਾਰਤ ਦੇ ਅਚਥਚਾਰੇ ਨੂੰ 1991 ਵਿੱਚ ਉਦਾਰ ਬਣਾਇਆ ਤੇ ਉਸ ਸਮੇਂ ਉਹ ਖੁਦ ਵਿੱਤ ਮੰਤਰੀ ਸਨ। ਪੀਵੀ ਨਰਸਿਮਹਾ ਰਾਓ ਦੀ ਸਰਕਾਰ ਤੇ ਉਸ ਤੋਂ ਬਾਅਦ ਵਾਲੀਆਂ ਸਾਰੀਆਂ ਸਰਕਾਰਾਂ ਨੇ ਵੀ ਇਸੇ ਪ੍ਰਕਿਰਿਆ ਨੂੰ ਜਾਰੀ ਰੱਖਿਆ। ਇਸੇ ਸਦਕਾ ਭਾਰਤ ਦੀ ਵਿਕਾਸ ਦਰ ਰੂਟੀਨ ਵਿੱਚ 8 ਫੀ ਸਦੀ ਰਹਿੰਦੀ ਹੈ।
ਉਨ੍ਹਾਂ ਇਹ ਵੀ ਆਖਿਆ ਕਿ ਮੌਜੂਦਾ ਨਰਿੰਦਰ ਮੋਦੀ ਸਰਕਾਰ ਤਹਿਤ ਵਿਕਾਸ ਦਰ 10 ਤੋਂ 12 ਫੀ ਸਦੀ ਹੈ ਤੇ ਜੇ ਅਗਲੇ ਦਹਾਕੇ ਵੀ ਭਾਰਤ ਇਸੇ ਤਰ੍ਹਾਂ ਵਿਕਾਸ ਦਰ ਬਣਾਈ ਰੱਖਦਾ ਹੈ ਤਾਂ ਇਹ 2030 ਤੱਕ ਵਿਕਸਤ ਮੁਲਕ ਬਣ ਜਾਵੇਗਾ। ਉਨ੍ਹਾਂ ਆਖਿਆ ਕਿ ਭਾਰਤੀਆਂ ਕੋਲ ਨਿਵੇਕਲੀਆਂ ਕਾਢਾਂ ਕੱਢਣ ਦੀ ਸਮਰੱਥਾ ਹੈ ਤੇ ਅਸੀਂ ਦੁਨੀਆਂ ਦੇ ਕਿਸੇ ਵੀ ਬਿਹਤਰੀਨ ਮੁਲਕ ਦੀ ਤਕਨਾਲੋਜੀ ਤੇ ਨਵੀਂਆਂ ਕਾਢਾਂ ਨੂੰ ਟੱਕਰ ਦੇਣ ਦੀ ਸਮਰੱਥਾ ਰੱਖਦੇ ਹਾਂ। ਇਸ ਮੌਕੇ ਟੋਰਾਂਟੋ ਵਿੱਚ ਭਾਰਤ ਦੇ ਕਾਉਂਸਲ ਜਨਰਲ ਤੇ ਸਫੀਰ ਦਿਨੇਸ਼ ਭਾਟੀਆ ਨੇ ਆਖਿਆ ਕਿ ਜਲਦ ਹੀ ਭਾਰਤ ਵੀ ਵਿਕਸਤ ਅਰਥਚਾਰਿਆਂ ਦੀ ਗਿਣਤੀ ਵਿੱਚ ਸ਼ੁਮਾਰ ਹੋ ਜਾਵੇਗਾ। ਉਨ੍ਹਾਂ ਇਹ ਆਸ ਵੀ ਪ੍ਰਗਟਾਈ ਕਿ ਭਾਰਤ ਤੇ ਕੈਨੇਡਾ ਅਰਥਭਰਪੂਰ ਆਰਥਿਕ ਸਬੰਧ ਕਾਇਮ ਰੱਖਣਗੇ।
ਇਸ ਮੌਕੇ ਸਤੀਸ਼ ਠੱਕਰ ਨੇ ਪ੍ਰੋਗਰਾਮ ਦੀ ਜਾਣ-ਪਛਾਣ ਕਰਵਾਈ। ਸੀਆਈਐਫ ਦੇ ਚੇਅਰ ਅਨਿਲ ਸ਼ਾਹ ਨੇ ਫਾਊਂਡੇਸ਼ਨ ਬਾਰੇ ਤਫਸੀਲ ਨਾਲ ਜਾਣਕਾਰੀ ਦਿੱਤੀ। ਮਿਸੀਸਾਗਾ-ਮਾਲਟਨ ਤੋਂ ਐਮਪੀਪੀ ਦੀਪਕ ਆਨੰਦ ਨੇ ਵੀ ਇਸ ਪ੍ਰੋਗਰਾਮ ਵਿੱਚ ਉਚੇਚੇ ਤੌਰ ਉੱਤੇ ਸਿ਼ਰਕਤ ਕੀਤੀ।