* 14 ਲੋਕਾਂ ਨੂੰ ਸ਼ਹੀਦ ਦਾ ਦਰਜਾ ਦਿੱਤਾ ਗਿਆ
ਬੀਜਿੰਗ, 4 ਅਪਰੈਲ, (ਪੋਸਟ ਬਿਊਰੋ)- ਵੂਹਾਨ ਦੇ ਸ਼ਹਿਰ ਵਿੱਚੋਂ ਉੱਠੀ ਕੋਰੋਨਾ ਦੀ ਮਹਾਮਾਰੀ ਦੌਰਾਨ ਜਾਨ ਗੁਆਉਣ ਵਾਲੇ ਮਰੀਜ਼ਾਂ ਅਤੇ ਸਿਹਤ ਕਾਮਿਆਂ ਦੀ ਯਾਦ ਵਿਚ ਸ਼ਨਿਚਰਵਾਰ ਨੂੰ ਚੀਨ ਵਿਚ 30 ਮਿੰਟ ਦਾ ਮੌਨ ਰੱਖ ਕੇ ਕੌਮੀ ਸੋਗ ਮਨਾਇਆ ਗਿਆ। ਇਸ ਦੌਰਾਨ ਦੇਸ਼ ਦਾ ਝੰਡਾ ਅੱਧਾ ਝੁਕ ਗਿਆ ਤੇ ਸੜਕਾਂ ਉੱਤੇ ਆਵਾਜਾਈ ਰੁਕ ਗਈ। ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦੀ ਅਗਵਾਈ ਵਿਚ ਮਨਾਏ ਗਏ ਕੌਮੀ ਸੋਗ ਵਿਚ ਜਿਨ੍ਹਾਂ ਲੋਕਾਂ ਨੂੰ ਸ਼ਰਧਾਂਜਲੀ ਦਿੱਤੀ ਗਈ, ਉਨ੍ਹਾਂ ਵਿਚ ਵਾਇਰਸ ਦੇ ਖ਼ਤਰੇ ਬਾਰੇ ਸਭ ਤੋਂ ਪਹਿਲੇ ਦੱਸਣ ਵਾਲੇ ਡਾ. ਲੀ ਵੇਨਲਿਆਂਗ ਸ਼ਾਮਲ ਹਨ।
ਨੈਸ਼ਨਲ ਹੈਲਥ ਕਮਿਸ਼ਨ ਮੁਤਾਬਿਕ ਚੀਨ ਵਿਚ ਅਜੇ ਤਕ ਇਸ ਮਹਾਮਾਰੀ ਨਾਲ 3,326 ਲੋਕਾਂ ਦੀ ਮੌਤ ਹੋਈ ਹੈ ਅਤੇ 81,326 ਲੋਕ ਇਸ ਤੋਂ ਪ੍ਰਭਾਵਿਤ ਹੋਏ ਹਨ। ਵਰਨਣ ਯੋਗ ਹੈ ਕਿ ਇਸ ਤੋਂ ਪਹਿਲੇ ਚੀਨ ਵਿਚ ਤਿੰਨ ਵਾਰ ਕੌਮੀ ਸੋਗ ਦਿਵਸ ਮਨਾਇਆ ਗਿਆ ਹੈ।
ਅੱਜ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 10 ਵਜੇ ਬੀਜਿੰਗ ਵਿਚ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਤੇ ਹੋਰ ਚੀਨ ਆਗੂਆਂ ਨੇ ਕੋਰੋਨਾ ਦੇ ਮ੍ਰਿਤਕਾਂ ਨੂੰ ਸ਼ਰਧਾਂਜਲੀ ਦੇਣ ਲਈ ਕੌਮੀ ਸੋਗ ਸਮਾਗਮ ਵਿਚ ਹਿੱਸਾ ਲਿਆ। ਆਪਣੀ ਛਾਤੀ ਉੱਤੇ ਸਫੈਦ ਫੁੱਲ ਲਾ ਕੇ ਇਨ੍ਹਾਂ ਆਗੂਆਂ ਨੇ ਅੱਧੇ ਝੁਕੇ ਕੌਮੀ ਝੰਡੇ ਅੱਗੇ ਖੜੋ ਕੇ ਮ੍ਰਿਤਕਾਂ ਨੂੰ ਸ਼ਰਧਾਂਜਲੀ ਦਿੱਤੀ। ਤਿੰਨ ਮਿੰਟ ਵਾਲੇ ਮੌਨ ਦੌਰਾਨ ਦੁਨੀਆ ਦੀ ਸਭ ਤੋਂ ਵੱਧ ਆਬਾਦੀ ਵਾਲੇ ਇਸ ਦੇਸ਼ ਵਿਚ ਸਾਇਰਨ ਵੱਜਣ ਉੱਤੇ ਸੜਕਾਂ ਉੱਤੇ ਆਵਾਜਾਈ ਪੂਰੀ ਤਰ੍ਹਾਂ ਰੁਕ ਗਈ ਤੇ ਚੀਨ ਦੇ ਸਾਰੇ ਦੂਤਘਰਾਂ ਅਤੇ ਵਪਾਰਕ ਕੌਂਸਲੇਟਾਂ ਵਿਚ ਵੀ ਕੌਮੀ ਝੰਡਾ ਅੱਧਾ ਝੁਕ ਗਿਆ। ਇਸ ਮੌਕੇ ਚੀਨ ਵਿੱਚ ਹਰ ਤਰ੍ਹਾਂ ਦੇ ਮਨੋਰੰਜਨ ਪ੍ਰੋਗਰਾਮ ਰੋਕ ਦਿੱਤੇ ਗਏ।
ਮਹਾਮਾਰੀ ਨਾਲ ਸਭ ਤੋਂ ਵੱਧ ਪ੍ਰਭਾਵਿਤ ਵੁਹਾਨ ਵਿਚ ਸ਼ਰਧਾਂਜਲੀ ਦੇਣ ਲਈ ਵੱਡੀ ਗਿਣਤੀ ਲੋਕ ਇਕੱਠੇ ਹੋਏ। ਇਸ ਦੇ ਸ਼ਹਿਰੀ ਖੇਤਰਾਂ ਦੀਆਂ ਸਾਰੀਆਂ ਟ੍ਰੈਫਿਕ ਲਾਈਟਾਂ 10 ਵਜੇ ਸਵੇਰੇ ਲਾਲ ਕੀਤੀਆਂ ਜਾਣ ਪਿੱਛੋਂ ਸੜਕਾਂ ਉਤੇ ਤਿੰਨ ਮਿੰਟ ਆਵਾਜਾਈ ਰੁਕੀ ਰਹੀ। ਕੋਰੋਨਾ ਦਾ ਸਭ ਤੋਂ ਪਹਿਲਾ ਕੇਸ ਹੁਬੇਈ ਸੂਬੇ ਦੀ ਰਾਜਧਾਨੀ ਵੁਹਾਨ ਤੋਂ ਪਤਾ ਲੱਗਾ ਸੀ ਤੇ ਇਕੱਲੇ ਵੁਹਾਨ ਵਿਚ ਇਸ ਨਾਲ 2,567 ਲੋਕਾਂ ਦੀ ਮੌਤ ਹੋਈ ਸੀ। ਚੀਨ ਵਿਚ ਕੋਰੋਨਾ ਦੇ ਖ਼ਿਲਾਫ਼ ਜੰਗ ਵਿਚ ਪੁਲਿਸ ਦੇ 95 ਮੁਲਾਜ਼ਮਾਂ ਤੇ 46 ਸਿਹਤ ਮੁਲਾਜ਼ਮਾਂ ਦੀ ਮੌਤ ਹੋਈ ਹੈ। ਵਾਇਰਸ ਦੇ ਬਾਰੇ ਵਿਚ ਸਭ ਤੋਂ ਪਹਿਲਾਂ ਦੱਸਣ ਵਾਲੇ ਡਾ. ਲੀ ਵੇਨਲਿਆਂਗ ਸਣੇ 14 ਲੋਕਾਂ ਨੂੰ ਸ਼ਹੀਦ ਕਰਾਰ ਦਿੱਤਾ ਗਿਆ ਹੈ, ਜਿਨ੍ਹਾਂ ਵਿਚ 12 ਸਿਹਤ ਕਰਮਚਾਰੀ, ਇਕ ਪੁਲਿਸ ਅਧਿਕਾਰੀ ਅਤੇ ਇਕ ਕਮਿਊਨਿਟੀ ਵਰਕਰ ਸ਼ਾਮਲ ਹਨ।