ਮਹਾਭਾਰਤ ਵਿੱਚ ਯੁਧਿਸ਼ਟਰ ਦੀ ਭੂਮਿਕਾ ਨਿਭਾਉਣ ਵਾਲੇ ਅਭਿਨੇਤਾ ਗਜੇਂਦਰ ਚੌਹਾਨ ਲਾਕਡਾਊਨ ਤੋਂ ਪਹਿਲਾਂ ਆਪਣੀ ਫਿਲਮ ‘ਮਹਾਪੁਰਸ਼’ ਦੀ ਸ਼ੂਟਿੰਗ ਕਰ ਰਹੇ ਸਨ। ਉਨ੍ਹਾਂ ਦੀ ਇਹ ਫਿਲਮ ਜੈਨ ਸੰਤ ਵਿਦਿਆ ਸਾਗਰ ਦੀ ਜੀਵਨੀ 'ਤੇ ਆਧਾਰਤ ਹੈ। ਉਹ ਉਨ੍ਹਾਂ ਦੇ ਪਿਤਾ ਦਾ ਰੋਲ ਕਰ ਰਹੇ ਹਨ। 18 ਮਾਰਚ ਨੂੰ ਗਜੇਂਦਰ ਜੈਪੁੁਰ ਤੋਂ ਮੁੜੇ ਸਨ। ਹੋਮ ਆਈਸੋਲੇਸ਼ਨ ਬਾਰੇ ਉਹ ਕਹਿੰਦੇ ਹਨ, ‘‘ਇਹ ਦੇਸ਼ ਦੇ ਪ੍ਰਧਾਨ ਮੰਤਰੀ ਦਾ ਹੁਕਮ ਹੈ, ਮੈਂ ਘਰ ਵਿੱਚ ਰਹਿਣਾ ਆਪਣੀ ਜ਼ਿੰਮੇਵਾਰੀ ਮੰਨਦਾ ਹਾਂ।'' ਉਹ ਦੱਸਦੇ ਹਨ ਕਿ ਉਨ੍ਹਾਂ ਦਾ ਬੇਟਾ ਮੁੰਬਈ ਦੇ ਸਾਇਨ ਹਸਪਤਾਲ ਤੇ ਨੂੰਹ ਹਿੰਦੂਜਾ ਹਸਪਤਾਲ ਵਿੱਚ ਡਾਕਟਰ ਹਨ। ਮੈਨੂੰ ਮਾਣ ਹੈ ਕਿ ਉਹ ਯੋਧਾ ਦੀ ਤਰ੍ਹਾਂ ਸਭ ਤੋਂ ਅੱਗੇ ਆ ਕੇ ਮੁਸ਼ਕਲ ਨਾਲ ਲੜ ਰਹੇ ਹਨ। ਮੈਂ ਦੋਵਾਂ ਦੇ ਚਿਹਰਿਆਂ 'ਤੇ ਕੋਈ ਪ੍ਰੇਸ਼ਾਨੀ ਨਹੀਂ ਦੇਖੀ। ਦੋਵੇਂ ਬਹਾਦੁਰ ਬੱਚੇ ਹਨ। ਪੁਲਸ ਤੇ ਡਾਕਟਰਾਂ ਵਾਂਗ ਮੀਡੀਆ ਮੁਲਾਜ਼ਮ ਵੀ ਜਿਸ ਤਰ੍ਹਾਂ ਦੀ ਜਾਗਰੂਕਤਾ ਫੈਲਾ ਰਹੇ ਹਨ, ਉਸ ਦੇ ਲਈ ਮੈਂ ਉਨ੍ਹਾਂ ਨੂੰ ਸਲਾਮ ਕਰਦਾ ਹਾਂ।”
ਗਜੇਂਦਰ ਦੱਸਦੇ ਹਨ ਕਿ ਉਹ ਹਸਪਤਾਲ ਦੇ ਹਾਲਾਤ ਤੋਂ ਜਾਣੂ ਹਨ, ਕਿਉਂਕਿ ਉਹ ਸ਼ੁਰੂਆਤੀ ਦੌਰ ਦੇ ਕੁਝ ਸਿਟੀ ਸਕੈਨ ਸਪੈਸ਼ਲਿਸਟਾਂ ਨਾਲ ਸਨ। ਉਹ ਦੱਸਦੇ ਹਨ ਕਿ ਮੈਂ ਖੁਦ ਪੈਰਾਮੈਡੀਕਲ ਹਾਂ। ਦਿੱਲੀ ਦੇ ਆਲ ਇੰਡੀਆ ਮੈਡੀਕਲ ਇੰਸਟੀਚਿਊਟ ਤੋਂ ਕੋਰਸ ਕੀਤਾ ਹੈ। ਏਮਜ਼ ਵਿੱਚ ਕਈ ਨਾਮਵਰ ਲੋਕਾਂ ਦਾ ਸਿਟੀ ਸਕੈਨ ਕਰ ਚੁੱਕਾ ਹਾਂ। ਹਸਪਤਾਲ ਦੇ ਅੰਦਰ ਦੀ ਡਿਊਟੀ ਕਿੰਨੀ ਅਹਿਮ ਹੁੰਦੀ ਹੈ, ਇਸ ਤੋਂ ਵਾਕਿਫ ਹਾਂ। ਕੋਰੋਨਾ ਵਾਇਰਸ ਬਾਰੇ ਉਹ ਕਹਿੰਦੇ ਹਨ, ‘ਇਹ ਦੌਰ ਦੇਖ ਕੇ ਸਾਲ 1971 ਦੀ ਜੰਗ ਯਾਦ ਆ ਜਾਂਦੀ ਹੈ। ਸ਼ਾਮ ਨੂੰ ਖਿੜਕੀ ਤੋਂ ਰੋਸ਼ਨੀ ਬਾਹਰ ਨਾ ਜਾਏ, ਇਸ ਲਈ ਪੂਰਾ ਬਲੈਕ ਆਊਟ ਕਰ ਦਿੱਤਾ ਜਾਂਦਾ ਸੀ। ਹਿੰਦੁਸਤਾਨੀਆਂ ਨੇ ਵੱਡੀਆਂ ਲੜਾਈਆਂ ਲੜੀਆਂ ਹਨ। ਇਸ ਵਿੱਚ ਵੀ ਜਿੱਤਣਗੇ।’