ਕਈ ਬਿਹਤਰੀਨ ਫਿਲਮਾਂ ਵਿੱਚ ਕੰਮ ਕਰ ਚੁੱਕੀ ਅਭਿਨੇਤਰੀ ਤਾਪਸੀ ਪੰਨੂ ਨੇ ਕਿਹਾ ਹੈ ਕਿ ਸਾੜ੍ਹੀ ਪਹਿਨਣੀ ਮੈਨੂੰ ਪਸੰਦ ਹੈ, ਪਰ ਨੇਲ ਪੇਂਟ ਲਾਉਣਾ ਬਿਲਕੁਲ ਪਸੰਦ ਨਹੀਂ। ਇਹ ਗੱਲ ਤਾਪਸੀ ਨੇ ਇੰਸਟਾਗ੍ਰਾਮ ਅਕਾਊਂਟ 'ਤੇ ਇੱਕ ਫੋਟੋ ਪੋਸਟ ਕਰਦਿਆਂ ਲਿਖੀ ਹੈ। ਆਪਣੇ ਘਰ ਵਿੱਚ ਸੈਲਫ ਆਈਸੋਲੇਸ਼ਨ ਦਾ ਸਮਾਂ ਬਿਤਾ ਰਹੀ ਤਾਪਸੀ ਨੇ ਇਸ ਤੋਂ ਪਹਿਲਾਂ ਇੰਸਟਾਗ੍ਰਾਮ 'ਤੇ ਪੋਸਟ ਕਰਦਿਆਂ ਦੱਸਿਆ ਸੀ ਕਿ ਮੈਂ ਰੋਜ਼ ਇੱਕ ਫੋਟੋ ਪੋਸਟ ਕਰਨਾ ਚਾਹੁੰਦੀ ਹਾਂ, ਜਿਨ੍ਹਾਂ ਨੂੰ ਮੈਂ ਪਹਿਲਾਂ ਕਦੇ ਪੋਸਟ ਨਹੀਂ ਕੀਤਾ, ਜਿਨ੍ਹਾਂ ਦੀ ਇੱਕ ਕਹਾਣੀ ਵੀ ਹੈ, ਜੋ ਮੈਨੂੰ ਉਨ੍ਹਾਂ ਦਿਨਾਂ ਦੀ ਯਾਦ ਦਿਵਾਉਣਗੀਆਂ, ਜੋ ਮੈਨੂੰ ਅੱਜ ਯਾਦ ਆ ਰਹੇ ਹਨ। ਮੈਂ ਇਸ ਦੇ ਪਿੱਛੇ ਵਾਲੀ ਕਹਾਣੀ ਵੀ ਆਪਣੇ ਪ੍ਰਸ਼ੰਸਕਾਂ ਨਾਲ ਸਾਂਝੀ ਕਰ ਰਹੀ ਹਾਂ।
ਤਾਪਸੀ ਨੇ ਸਾੜ੍ਹੀ ਵਾਲੀ ਇੱਕ ਫੋਟੋ ਸ਼ੇਅਰ ਕਰਦਿਆਂ ਲਿਖਿਆ-‘‘ਇਹ ਮੇਰੇ ਕਰੀਅਰ ਦੇ ਸ਼ੁਰੂ ਦੀਆਂ ਘਟਨਾਵਾਂ ਵਿੱਚੋਂ ਇੱਕ ਹੈ। ਮੇਰੇ ਮੇਕਅਪ ਅਤੇ ਹੇਅਰ ਸਕਿੱਲਜ਼ ਦੀ ਪ੍ਰੀਖਿਆ ਸੀ। ਹਾਂ, ਇਸ ਵਿੱਚ ਮੇਰੀ ਸਾੜ੍ਹੀ ਡ੍ਰੈਪਿੰਗ ਸਕਿੱਲ ਵੀ ਸ਼ਾਮਲ ਸੀ। ਮੈਂ ਪਾਸ ਹੋ ਗਈ। ਸਾੜ੍ਹੀ ਮੇਰੀ ਮਨਪਸੰਦ ਬਣੀ ਹੋਈ ਹੈ ਅਤੇ ਵਾਲਾਂ ਵਿੱਚ ਫੁੱਲ ਲਾਉਣਾ ਵੀ ਮੈਨੂੰ ਪਸੰਦ ਹੈ, ਪਰ ਅਜੇ ਵੀ ਮੈਂ ਨੇਲ ਪੇਂਟ ਲਾਉਣਾ ਪਸੰਦ ਨਹੀਂ ਕਰਦੀ। ਇਸ ਲਈ ਮੈਂ ਇਸ ਫੋਟੋ ਵਿੱਚ ਆਪਣੀਆਂ ਉਂਗਲਾਂ ਲੁਕੋ ਲਈਆਂ ਹਨ। ਮੈਂ ਇਨ੍ਹਾਂ ਨੂੰ ਦਿਖਾਉਣਾ ਨਹੀਂ ਚਾਹੁੰਦੀ।''