ਮੋਹਾਲੀ, 1 ਅਪ੍ਰੈਲ (ਪੋਸਟ ਬਿਊਰੋ)- ਚੰਡੀਗੜ੍ਹ ਦੀ ਜੜ੍ਹ ਕੋਲ ਵੱਸੇ ਹੋਏ ਪੰਜਾਬ ਦੇ ਪਿੰਡ ਨਇਆ ਗਾਉਂ ਦੇ 65 ਸਾਲ ਦੇ ਓਮ ਪ੍ਰਕਾਸ਼ ਦੀ ਕੋਰੋਨਾ ਵਾਇਰਸ ਨਾਲ ਮੌਤ ਪਿੱਛੋਂ ਤਰਥੱਲੀ ਮਚੀ ਹੋਈ ਹੈ। ਕੱਲ੍ਹ ਦੁਪਹਿਰ ਪੀ ਜੀ ਆਈ ਨੇ ਮੌਤ ਦਾ ਐਲਾਨ ਕੀਤਾ ਤਾਂ ਪੀ ਜੀ ਆਈ ਦੀ ਐਂਬੂਲੈਂਸ ਵਿੱਚ ਲਾਸ਼ ਮੋਹਾਲੀ ਦੇ ਸ਼ਮਸ਼ਾਨਘਾਟ ਲਿਜਾਈ ਗਈ, ਪਰ ਉਸ ਬਜ਼ੁਰਗ ਦੇ ਅੰਤਮ ਸੰਸਕਾਰ ਦੇ ਵਕਤ ਅਰਥੀ ਨੂੰ ਮੋਢਾ ਦੇਣ ਵਾਲੇ ਚਾਰ ਜਣੇ ਵੀ ਨਹੀਂ ਮਿਲ ਸਕੇ।
ਵਰਨਣ ਯੋਗ ਹੈ ਕਿ ਜਦੋਂ ਪੀ ਜੀ ਆਈ ਤੋਂ ਲਾਸ਼ ਲਿਆਂਦੀ ਗਈ ਤਾਂ ਨਇਆ ਗਾਉਂ ਦੀ ਨਗਰ ਕੌਂਸਲ ਦੇ ਐੱਸ ਡੀ ਓ ਨਾਲ ਸਨ। ਮੋਹਾਲੀ ਦੇ ਸੈਕਟਰ 69 ਦੇ ਵਸਨੀਕ ਓਮ ਪ੍ਰਕਾਸ਼ ਦਾ ਵੱਡਾ ਬੇਟਾ ਆਪਣੀ ਗੱਡੀ ਵਿੱਚ ਐਂਬੂਲੈਂਸ ਦੇ ਪਿੱਛੇ-ਪਿੱਛੇ ਸੀ। ਲਾਸ਼ ਸ਼ਮਸ਼ਾਨਘਾਟ ਵਿੱਚ ਪਹੁੰਚੀ ਤਾਂ ਅਫਸਰ ਗੱਡੀ ਵਿੱਚ ਬੈਠੇ ਰਹੇ। ਲਾਸ਼ ਨੂੰ ਇਕੱਲਾ ਪੁੱਤਰ ਉਤਾਰ ਨਹੀਂ ਸਕਦਾ ਸੀ, ਇਸ ਲਈ ਉਹ ਲਾਸ਼ ਉਤਾਰਨ ਲਈ ਸ਼ਮਸ਼ਾਨਘਾਟ ਵਿੱਚ ਕੰਮ ਕਰਦੇ ਲੋਕਾਂ ਦੇ ਤਰਲੇ ਕਰਦਾ ਰਿਹਾ, ਪਰ ਕੋਈ ਤਿਆਰ ਨਹੀਂ ਹੋਇਆ। ਜਿਸ ਐਂਬੂਲੈਂਸ ਵਿੱਚ ਲਾਸ਼ ਸੀ, ਉਹ ਸ਼ਮਸ਼ਾਨਘਾਟ ਦੀ ਇਲੈਕਟਿ੍ਰਕ ਭੱਠੀ ਤੋਂ ਸਿਰਫ 15 ਕਦਮ ਦੂਰ ਖੜ੍ਹੀ ਸੀ, ਪਰ ਉਥੋਂ ਤੱਕ ਵੀ ਲੈ ਜਾਣ ਲਈ ਨਾ ਨਇਆ ਗਾਉਂ ਨਗਰ ਕੌਂਸਲ ਦੇ ਕਰਮਚਾਰੀ ਅੱਗੇ ਆਏ ਅਤੇ ਨਾ ਸਿਹਤ ਵਿਭਾਗ ਦਾ ਸਟਾਫ ਨਾਲ ਤੁਰਿਆ। ਡੇਢ ਘੰਟੇ ਬਾਅਦ ਨਿਗਮ ਕਮਿਸ਼ਨਰ ਮੋਹਾਲੀ ਨੇ ਮੌਕੇ 'ਤੇ ਨਿਗਮ ਦੇ ਜੇ ਈ ਨੂੰ ਭੇਜਿਆ। ਉਨ੍ਹਾਂ ਨੇ ਪਹਿਲਾਂ ਲਾਸ਼ ਨੂੰ ਸੈਨੇਟਾਈਜ ਕਰਵਾਇਆ ਤੇ ਫਿਰ ਸ਼ਮਸ਼ਾਨਘਾਟ ਦੇ ਦੋ ਮੁਲਾਜ਼ਮਾਂ ਨੂੰ ਬੁਲਾ ਕੇ ਉਨ੍ਹਾਂ ਨੂੰ ਪੀ ਪੀ ਈ ਕਿੱਟ ਪੁਆਈ। ਇਸ ਦੇ ਬਾਅਦ ਤਿੰਨ ਲੋਕਾਂ ਦੀ ਮਦਦ ਨਾਲ ਲਾਸ਼ ਨੂੰ ਐਂਬੂਲੈਂਸ ਤੋਂ ਬਾਹਰ ਕੱਢ ਕੇ ਇਲੈਕਟਿ੍ਰਕ ਭੱਠੀ ਤੱਕ ਲਿਜਾਇਆ ਗਿਆ। ਸਖਤ ਮੁਸ਼ੱਕਤ ਮਗਰੋਂ ਓਮ ਪ੍ਰਕਾਸ਼ ਦਾ ਅੰਤਿਮ ਸਸਕਾਰ ਕੀਤਾ ਗਿਆ। ਇਸ ਬਜ਼ੁਰਗ ਨੂੰ ਆਖਰੀ ਸਮੇਂ ਅਰਥੀ ਲਈ ਚਾਰ ਮੋਢੇ ਵੀ ਨਸੀਬ ਨਹੀਂ ਹੋਏ।
ਮ੍ਰਿਤਕ ਓਮ ਪ੍ਰਕਾਸ਼ ਦੇ ਬੇਟੇ ਰਜਿੰਦਰ ਕੁਮਾਰ ਰਾਜਪੂਤ ਦੇ ਮੁਤਾਬਕ ਨਗਰ ਕੌਂਸਲ ਨਇਆ ਗਾਉਂ ਦੇ ਅਧਿਕਾਰੀ ਗੱਡੀ ਵਿੱਚ ਹੀ ਬੈਠੇ ਰਹੇ। ਮੈਂ ਉਨ੍ਹਾਂ ਨੂੰ ਕਿਹਾ ਕਿ ਉਹ ਪ੍ਰਬੰਧ ਅਤੇ ਲਾਸ਼ ਦਾ ਅੰਤਿਮ ਸਸਕਾਰ ਕਰਵਾਉਣ, ਪਰ ਜਵਾਬ ਮਿਲਿਆ ਕਿ ਸਿਵਲ ਸਰਜਨ ਦਫਤਰ ਤੋਂ ਟੀਮ ਆਏਗੀ। ਇੱਕ ਘੰਟਾ ਬੀਤਣ ਦੇ ਬਾਅਦ ਵੀ ਕੋਈ ਨਹੀਂ ਆਇਆ ਅਤੇ ਨਾ ਕੌਂਸਲ ਦੇ ਅਧਿਕਾਰੀ ਗੱਡੀ 'ਚੋਂ ਬਾਹਰ ਨਿਕਲੇ। ਮੈਂ ਨੇੜੇ ਜਾਂਦਾ ਸੀ ਤਾਂ ਉਹ ਗੱਡੀ ਦੇ ਸ਼ੀਸ਼ੇ ਬੰਦ ਕਰ ਲੈਂਦੇ ਸਨ।