ਨਾਭਾ, 31 ਮਾਰਚ (ਪੋਸਟ ਬਿਊਰੋ)- ਭਾਰਤੀ ਮੂਲ ਦੇ ਪਿਓ-ਧੀ ਦੀ ਲੰਡਨ ਵਿੱਚ ਕੋਰੋਨਾ ਨਾਲ ਮੌਤ ਹੋ ਗਈ ਹੈ। ਉਨ੍ਹਾਂ ਦੀ ਪਛਾਣ 61 ਸਾਲਾ ਸੁਧੀਰ ਸ਼ਰਮਾ ਤੇ ਉਸ ਦੀ 33 ਸਾਲਾ ਧੀ ਪੂਜਾ ਵਜੋਂ ਦੱਸੀ ਗਈ ਰਹੀ ਹੈ। ਨਾਭਾ ਨਾਲ ਸੰਬੰਧਤ ਇਹ ਲੋਕ 1989 'ਚ ਲੰਡਨ ਜਾ ਕੇ ਵਸ ਗਏ ਸਨ। ਮ੍ਰਿਤਕ ਸੁਧੀਰ ਸ਼ਰਮਾ ਦਾ ਭਰਾ ਲੁਧਿਆਣਾ ਵਿੱਚ ਹੈ।
ਸੋਸ਼ਲ ਮੀਡੀਆ ਦੇ ਅਨੁਸਾਰ ਸੁਧੀਰ ਸ਼ਰਮਾ ਹੀਥਰੋ ਏਅਰਪੋਰਟ 'ਤੇ ਇਮੀਗਰੇਸ਼ਨ ਦੇ ਫਰੰਟਲਾਈਨ ਅਧਿਕਾਰੀ ਵਜੋਂ ਤੈਨਾਤ ਸੀ। ਉਸ ਦੀ ਧੀ ਪੂਜਾ ਯੂ ਕੇ ਈਸਟ ਸੁਸੈਕਸ ਦੇ ਡਿਸਟਿ੍ਰਕਟ ਜਨਰਲ ਆਫਿਸ ਵਿੱਚ ਫਾਰਮਾਸਿਸਟ ਦੀਆਂ ਸੇਵਾਵਾਂ ਨਿਭਾਅ ਰਹੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਯੂ ਕੇ ਏਅਰਪੋਰਟ ਅਧਿਕਾਰੀ ਇਸ ਗੱਲ ਨੂੰ ਗੱਲ ਥੱਲੋਂ ਨਹੀਂ ਲੰਘਾ ਪਾ ਰਹੇ ਕਿ ਸੱਤ ਜਨਵਰੀ ਨੂੰ ਕੰਮ ਤੋਂ ਛੁੱਟੀ ਲੈਣ ਵਾਲਾ ਸੁਧੀਰ ਸ਼ਰਮਾ ਕੋਰੋਨਾ ਤੋਂ ਪੀੜਤ ਸੀ। ਉਸ ਦੀ ਮੌਤ ਬੁੱਧਵਾਰ ਨੂੰ ਹੋਈ ਦੱਸੀ ਗਈ ਹੈ। ਉਸ ਤੋਂ ਕੁਝ ਘੰਟਿਆਂ ਬਾਅਦ ਹੀ ਉਸ ਦੀ ਲੜਕੀ ਪੂਜਾ ਨੇ ਵੀ ਦਮ ਤੋੜ ਦਿੱਤਾ।