ਟੋਰਾਂਟੋ, 31 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਸਿਹਤ ਅਧਿਕਾਰੀਆਂ ਵੱਲੋਂ ਕੋਵਿਡ-19 ਦੇ 260 ਨਵੇਂ ਮਾਮਲਿਆਂ ਦੀ ਪੁਸ਼ਟੀ ਕੀਤੀ ਗਈ ਹੈ। ਇਸ ਨਾਲ ਪ੍ਰੋਵਿੰਸ ਵਿੱਚ ਕੋਵਿਡ-19 ਦੇ ਕੱੁਲ ਮਾਮਲਿਆਂ ਦੀ ਗਿਣਤੀ 1966 ਤੱਕ ਅੱਪੜ ਗਈ ਹੈ।
ਇਨ੍ਹਾਂ ਨਵੇਂ ਮਰੀਜ਼ਾਂ ਬਾਰੇ ਮੰਗਲਵਾਰ ਨੂੰ ਐਲਾਨ ਕੀਤਾ ਗਿਆ। ਪ੍ਰੋਵਿੰਸ ਨੇ ਦੱਸਿਆ ਕਿ ਇਸ ਸਮੇਂ 4,280 ਲੋਕ ਨੋਵਲ ਕਰੋਨਾਵਾਇਰਸ ਲਈ ਜਾਂਚ ਅਧੀਨ ਹਨ। ਪ੍ਰੋਵਿੰਸ ਵਿੱਚ ਹੁਣ ਤੱਕ ਇਸ ਮਹਾਮਾਰੀ ਕਾਰਨ 33 ਮੌਤਾਂ ਹੋ ਚੱੁਕੀਆਂ ਹਨ ਤੇ ਇਸ ਸਮੇਂ ਸਾਰੇ ਮਰੀਜ਼ਾਂ ਵਿੱਚੋਂ 10.9 ਫੀ ਸਦੀ ਹਸਪਤਾਲਾਂ ਵਿੱਚ ਦਾਖਲ ਹਨ।
ਮੰਗਲਵਾਰ ਦੁਪਹਿਰ ਨੂੰ ਕੁਈਨਜ਼ ਪਾਰਕ ਵਿਖੇ ਕੀਤੀ ਗਈ ਨਿਊਜ਼ ਕਾਨਫਰੰਸ ਵਿੱਚ ਗੱਲ ਕਰਦਿਆਂ ਓਨਟਾਰੀਓ ਦੀ ਐਸੋਸਿਏਟ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਡਾ. ਬਾਰਬਰਾ ਯਾਫੇ ਨੇ ਆਖਿਆ ਕਿ ਇਸ ਮਹਾਮਾਰੀ ਕਾਰਨ ਮਾਰੇ ਗਏ 33 ਲੋਕਾਂ ਵਿੱਚੋਂ 11 ਸੀਨੀਅਰ ਰੈਜ਼ੀਡੈਂਸਿਜ਼ ਤੋਂ ਸਨ। ਯਾਫੇ ਨੇ ਆਖਿਆ ਕਿ ਇਸ ਸਮੇਂ ਓਨਟਾਰੀਓ ਵਿਚ 10 ਲਾਂਗ ਟਰਮ ਕੇਅਰ ਹੋਮਜ਼ ਹਨ ਜਿੱਥੇ ਆਊਟਬ੍ਰੇਕ ਹੋ ਚੱੁਕੀ ਹੈ।