ਨਵੀਂ ਦਿੱਲੀ, 25 ਮਾਰਚ (ਪੋਸਟ ਬਿਊਰੋ)- 20 ਮਾਰਚ ਏਅਰ ਇੰਡੀਆ ਦੀ ਏਅਰ ਹੋਸਟੈਸ ਨੇਹਾ ਨੂੰ ਸੁਨੇਹਾ ਮਿਲਦਾ ਹੈ ਕਿ ਕੱਲ੍ਹ ਖਾਸ ਫਲਾਈਟ ਰਾਹੀਂ ਇਟਲੀ ਦੇ ਨਾਗਰਿਕਾਂ ਨੂੰ ਲੈ ਕੇ ਰੋਮ ਜਾਣਾ ਹੈ। ਵਾਪਸੀ ਦੌਰਾਨ ਭਾਰਤੀਆਂ ਨੂੰ ਲੈ ਕੇ ਆਉਣਾ ਹੈ। ਨੇਹਾ ਸੋਚ 'ਚ ਪੈ ਜਾਂਦੀ ਹੈ। ਉਸ ਨੂੰ ਪਤਾ ਲੱਗਦਾ ਹੈ ਕਿ ਬਹੁਤ ਸਾਰੇ ਉਨ੍ਹਾਂ ਦੇ ਸਾਥੀਆਂ ਨੇ ਰੋਮ ਜਾਣ ਤੋਂ ਮਨ੍ਹਾ ਕਰ ਦਿੱਤਾ ਹੈ। ਇਸ ਦਾ ਕਾਰਨ ਕੋਰੋਨਾ ਦਾ ਡਰ ਸੀ।
ਇਸ ਦੌਰਾਨ ਪਰਵਾਰ ਦੇ ਮੈਂਬਰ ਵੀ ਸਮਝਾਉਂਦੇ ਹਨ, ਪਰ ਨੇਹਾ ਤੈਅ ਕਰਦੀ ਹੈ ਕਿ ਜੇ ਸਾਰੇ ਡਰ ਜਾਣਗੇ ਤਾਂ ਕੋਰੋਨਾ ਜਿੱਤ ਜਾਵੇਗਾ। ਉਸ ਨੇ ਤੈਅ ਕੀਤਾ ਕਿ ਉਹ ਰੋਮ ਜਾ ਕੇ ਉਥੇ ਫਸੇ 263 ਭਾਰਤੀਆਂ ਨੂੰ ਲਿਆਏਗੀ। 22 ਮਾਰਚ ਨੂੰ ਇਟਲੀ ਤੋਂ ਭਾਰਤੀਆਂ ਨੂੰ ਠੀਕ-ਠਾਕ ਦਿੱਲੀ ਲੈ ਕੇ ਵਾਪਸ ਲਿਆਈ ਏਅਰ ਇੰਡੀਆ ਦੀ ਏਅਰ ਹੋਸਟੈਸ ਨੇਹਾ ਤੇ ਸੁਨੀਤਾ ਨੇ ਖ਼ੁਦ ਨੂੰ ਆਈਸੋਲੇਟ ਕਰ ਲਿਆ ਹੈ। ਦੋਵੇਂ ਨਹੀਂ ਚਾਹੁੰਦੀਆਂ ਕਿ ਉਨ੍ਹਾਂ ਕਾਰਨ ਕਿਸੇ ਨੂੰ ਖ਼ਤਰਾ ਹੋਵੇ। ਸੱਤ ਦਿਨਾਂ 'ਚ ਕੋਰੋਨਾ ਦਾ ਕੋਈ ਅਸਰ ਨਾ ਦਿਸਿਆ ਤਾਂ ਘਰ ਆ ਜਾਣਗੀਆਂ। ਜੇ ਕੁਝ ਲੱਛਣ ਦਿਸੇ ਤਾਂ ਫਿਰ ਸਿਹਤ ਵਿਭਾਗ ਨੂੰ ਸੂਚਿਤ ਕਰ ਦੇਣਗੀਆਂ। ਦਿੱਲੀ 'ਚ ਆਪਣੀ ਦੋਸਤ ਤੇ ਸਹਿਕਰਮੀ ਸੁਨੀਤਾ ਨਾਲ ਕੁਆਰੰਟਾਈਨ 'ਚ ਰਹਿ ਰਹੀ ਏਅਰ ਹੋਸਟਸ ਨੇਹਾ ਨੇ ਦੱਸਿਆ ਕਿ 21 ਮਾਰਚ ਨੂੰ ਉਨ੍ਹਾਂ ਦੀ ਡਿਊਟੀ ਇਟਲੀ ਦੇ ਰੋਮ ਜਾਣ ਵਾਲੀ ਫਲਾਈਟ 'ਚ ਲੱਗੀ। ਦਿੱਲੀ ਤੋਂ ਇਟਲੀ ਦੇ ਨਾਗਰਿਕ ਲੈ ਕੇ ਜਾਣਾ ਸੀ ਤੇ ਉਥੇ ਫਸੇ ਭਾਰਤੀਆਂ ਨੂੰ ਲਿਆਉਣਾ ਸੀ। ਇਟਲੀ ਮੌਜੂਦਾ ਸਮੇਂ ਕੋਰੋਨਾ ਦਾ ਸੈਂਟਰ ਪੁਆਇੰਟ ਬਣਿਆ ਹੋਇਆ ਹੈ, ਇਸ ਲਈ ਤਿਆਰ ਨਹੀਂ ਸਨ। ਉਨ੍ਹਾਂ ਨੂੰ ਵੀ ਸੁਣਦੇ ਸਾਰ ਡਰ ਲੱਗਾ ਪਰ ਫਿਰ ਸੋਚਿਆ ਕਿ ਜੇ ਸਾਰੇ ਡਰ ਜਾਣਗੇ ਤਾਂ ਕੋਰੋਨਾ ਜਿੱਤ ਜਾਵੇਗਾ। ਆਖ਼ਿਰ ਉਨ੍ਹਾਂ ਨੇ ਮਨ ਨੂੰ ਮਜ਼ਬੂਤ ਕੀਤਾ। ਪਰਵਾਰ ਨੂੰ ਵੀ ਸਮਝਾਇਆ। ਏਅਰ ਇੰਡੀਆ ਨੇ ਵੀ ਫਲਾਈਟ ਲਈ ਖਾਸ ਕੱਪੜੇ ਦਿੱਤੇ ਸਨ ਜਿਸ ਨਾਲ ਕੋਰੋਨਾ ਇਨਫੈਕਸ਼ਨ ਨਾ ਹੋਵੇ। ਯਾਤਰੀ ਵੀ ਕਰਿਊ ਮੈਂਬਰਾਂ ਨਾਲ ਦੂਰ ਤੋਂ ਗੱਲ ਕਰ ਰਹੇ ਸਨ। ਸਾਰਿਆਂ ਦੀ ਕੋਸ਼ਿਸ਼ ਸੀ ਕਿ ਘੱਟ ਤੋਂ ਘੱਟ ਇੱਕ-ਦੂਜੇ ਨੂੰ ਛੂਹਣ ਦੀ ਨੌਬਤ ਨਾ ਆਵੇ। ਆਖ਼ਿਰ 22 ਦੀ ਰਾਤ ਵਾਪਸ ਆ ਗਏ। ਦਿੱਲੀ ਪਹੰੁਚਣ ਉੱਤੇ ਲੱਗ ਰਿਹਾ ਸੀ ਜਿਵੇਂ ਉਹ ਮੌਤ ਨਾਲ ਲੜ ਕੇ ਵਾਪਸ ਆਏ ਹੋਣ। ਏਅਰਪੋਰਟ 'ਤੇ ਟੈਸਟ 'ਚ ਸਭ ਕੁਝ ਠੀਕ ਰਿਹਾ। ਫਿਰ ਵੀ ਦੋਵੇਂ ਆਈਸੋਲੇਸ਼ਨ 'ਚ ਰਹਿ ਰਹੀਆਂ ਹਨ। ਨੇੇਹਾ ਨੇ ਦੱਸਿਆ ਕਿ ਸੁਨੀਤਾ ਦਾ ਪਰਵਾਰ ਨਾਗਾਲੈਂਡ 'ਚ ਹੈ। ਉਨ੍ਹਾਂ ਦੋਵਾਂ ਨੂੰ ਕੋਈ ਦਿੱਕਤ ਨਹੀਂ ਹੈ। ਦੋਵੇਂ ਨੇ ਖ਼ੁਦ ਨੂੰ ਆਈਸੋਲੇਟ ਕੀਤਾ ਹੈ।