ਨਵੀਂ ਦਿੱਲ਼ੀ, 27 ਫਰਵਰੀ (ਪੋਸਟ ਬਿਊਰੋ)- ਨਿਰਭੈਆ ਕਤਲ ਅਤੇ ਬਲਾਤਕਾਰ ਕੇਸ ਦੇ ਚਾਰਾਂ ਦੋਸ਼ੀਆਂ ਦੀ ਫਾਂਸੀ ਦੀ ਤਾਰੀਕ ਨੇੜੇ ਆਈ ਵੇਖ ਕੇ ਤਿਹਾੜ ਜੇਲ੍ਹ ਪ੍ਰਸ਼ਾਸਨ ਹੋਰ ਚੌਕਸ ਹੋ ਗਿਆ ਹੈ। ਤਿਹਾੜ ਜੇਲ੍ਹ ਵਿੱਚ ਬੰਦ ਨਿਰਭੈਆ ਕੇਸ ਦੇ ਚਾਰੇ ਦੋਸ਼ੀ ਖ਼ੁਦ ਨੂੰ ਕੋਈ ਨੁਕਸਾਨ ਨਾ ਪਹੁੰਚਾ ਲੈਣ, ਇਸ ਲਈ ਜੇਲ੍ਹ ਪ੍ਰਸ਼ਾਸਨ ਪੂਰੀ ਸਾਵਧਾਨੀ ਵਰਤ ਰਿਹਾ ਹੈ। ਇਕੋ ਸੈੱਲ ਵਿੱਚ ਰੱਖਣ ਦੇ ਬਜਾਏ ਇਨ੍ਹਾਂ ਦੇ ਸੈੱਲ ਰੋਜ਼ ਬਦਲੇ ਜਾ ਰਹੇ ਹਨ।
ਇਹ ਸਾਰੇ ਦੋਸ਼ੀ ਭਾਵੇਂ ਸਕਿਓਰਟੀ ਵਾਰਡ ਵਾਲੀ ਇਕੋ ਬੈਰਕ ਵਿੱਚ ਹਨ, ਪਰ ਇਨ੍ਹਾਂ ਨੂੰ ਏਦਾਂ ਰੱਖਿਆ ਗਿਆ ਹੈ ਕਿ ਦੋ ਦੋਸ਼ੀਆਂ ਦੇ ਸੈੱਲ਼ ਵਿਚਾਲੇ ਇਕ ਸੈੱਲ ਖਾਲੀ ਰਹੇ। ਇਸ ਦਾ ਮਕਸਦ ਇਨ੍ਹਾਂ ਵਿਚਕਾਰ ਕਿਸੇ ਤਰ੍ਹਾਂ ਦੇ ਸੰਪਰਕ ਦੀ ਸੰਭਾਵਨਾ ਖ਼ਤਮ ਕਰਨਾ ਹੈ। ਜੇਲ੍ਹ ਦੇ ਸੂਤਰਾਂ ਦਾ ਕਹਿਣਾ ਹੈ ਕਿ ਕਈ ਵਾਰ ਦੋਸ਼ੀ ਉੱਚੀ ਆਵਾਜ਼ ਵਿੱਚ ਬੋਲ ਕੇ ਆਪਣਾ ਸੰਦੇਸ਼ ਦੂਜੇ ਨੂੰ ਪੁਚਾਉਣ ਦੀ ਕੋਸ਼ਿਸ਼ ਕਰਦੇ ਹਨ। ਇਸ ਨੂੰ ਦੇਖ ਕੇ ਇਨ੍ਹਾਂ ਨੂੰ ਸਿਰਫ ਵੱਖ-ਵੱਖ ਸੈੱਲ ਵਿੱਚ ਰੱਖਿਆ ਹੈ, ਸਗੋਂ ਕੁਝ ਫਾਸਲੇ ਉੱਤੇ ਬਣੇ ਸੈੱਲ ਵਿੱਚ ਰੱਖਿਆ ਗਿਆ ਹੈ। ਇਨ੍ਹਾਂ ਸੂਤਰਾਂ ਦਾ ਕਹਿਣਾ ਹੈ ਕਿ ਸੈੱਲ ਤੋਂ ਦੋਸ਼ੀਆਂ ਨੂੰ ਕੁਝ ਦੇਰ ਲਈ ਬਾਹਰ ਕੱਢਿਆ ਜਾਂਦਾ ਹੈ। ਉਦੋਂ ਖ਼ਾਸ ਖਿਆਲ ਰੱਖਿਆ ਜਾਂਦਾ ਹੈ ਕਿ ਇਹ ਦੂਸਰੇ ਨੂੰ ਨਾ ਦੇਖ ਸਕਣ। ਇਨ੍ਹਾਂ ਉੱਤੇ ਨਜ਼ਰ ਰੱਖਣ ਲਈ ਸੈੱਲ ਨੇੜੇ ਸੁਰੱਖਿਆ ਮੁਲਾਜ਼ਮਾਂ ਦੀ ਗਿਣਤੀ ਵਧਾਈ ਗਈ ਹੈ। ਇਨ੍ਹਾਂ ਉੱਤੇ ਹਮੇਸ਼ਾ ਸੁਰੱਖਿਆ ਮੁਲਾਜ਼ਮਾਂ ਦੀ ਨਜ਼ਰ ਹੁੰਦੀ ਹੈ। ਸੁਰੱਖਿਆ ਮੁਲਾਜ਼ਮ ਇਸ ਤਰ੍ਹਾਂ ਰੱਖੇ ਜਾਂਦੇ ਹਨ ਕਿ ਇਨ੍ਹਾਂ ਉੱਤੇ ਕਦੇ ਵੀ ਕਾਬੂ ਪਾ ਸਕਣ। ਜ਼ਰੂਰਤ ਪੈਣ ਉੱਤੇ ਸੈੱਲ਼ ਦੇ ਅੰਦਰ ਵੀ ਸੁਰੱਖਿਆ ਮੁਲਾਜ਼ਮਾਂ ਦੀ ਡਿਊਟੀ ਲਾਈ ਜਾਂਦੀ ਹੈ।