ਸਮਿਦਰਜ਼, ਬੀਸੀ, 27 ਫਰਵਰੀ (ਪੋਸਟ ਬਿਊਰੋ) : ਵੈਟਸੂਵੈਟਨ ਦੇ ਹੈਰੇਡਿਟਰੀ ਚੀਫਜ਼ ਨੇ ਵੀਰਵਾਰ ਨੂੰ ਸਰਕਾਰ ਦੇ ਸੀਨੀਅਰ ਮੰਤਰੀਆਂ ਨਾਲ ਬੈਠ ਕੇ ਪਾਈਪਲਾਈਨ ਵਿਵਾਦ ਬਾਰੇ ਗੱਲਬਾਤ ਦੀ ਸ਼ੁਰੂਆਤ ਕੀਤੀ। ਇਸ ਪਾਈਪਲਾਈਨ ਵਿਵਾਦ ਕਾਰਨ ਦੇਸ਼ ਭਰ ਵਿੱਚ ਮੁਜ਼ਾਹਰੇ ਹੋ ਰਹੇ ਹਨ ਤੇ ਕਈ ਥਾਂਵਾਂ ਉੱਤੇ ਮਾਲ ਤੇ ਯਾਤਰੀ ਗੱਡੀਆਂ ਦੀ ਸੇਵਾ ਬੰਦ ਕਰ ਦਿੱਤੀ ਗਈ ਹੈ।
ਫੈਡਰਲ ਕ੍ਰਾਊਨ ਇੰਡੀਜੀਨਸ ਰਿਲੇਸ਼ਨਜ਼ ਮੰਤਰੀ ਕੈਰੋਲਿਨ ਬੈਨੇਟ ਤੇ ਬ੍ਰਿਟਿਸ਼ ਕੋਲੰਬੀਆ ਦੇ ਇੰਡੀਜੀਨਸ ਰਿਲੇਸ਼ਨਜ਼ ਮੰਤਰੀ ਸਕੌਟ ਫਰੇਜ਼ਰ ਹੈਰੇਡਿਟਰੀ ਚੀਫਜ਼ ਨਾਲ ਮੁਲਾਕਾਤ ਕਰਨ ਲਈ ਵੱਖਰੇ ਤੌਰ ੳੱੁਤੇ ਪਹੁੰਚੇ। ਮੀਟਿੰਗ ਸ਼ੁਰੂ ਹੋਣ ਤੋਂ ਪਹਿਲਾਂ ਆਰਸੀਐਮਪੀ ਤੇ ਕੋਸਟਲ ਗੈਸਲਿੰਕ ਨੇ ਆਖਿਆ ਕਿ ਉਹ ਗੱਲਬਾਤ ਲਈ ਚੀਫਜ਼ ਵੱਲੋਂ ਕੀਤੀ ਗਈ ਗੁਜ਼ਾਰਿਸ਼ ਵਾਸਤੇ ਸਹਿਮਤ ਹਨ। ਜਿ਼ਕਰਯੋਗ ਹੈ ਕਿ ਨੈਚੂਰਲ ਗੈਸ ਕੰਪਨੀ ਉੱਤਰਪੱਛਮੀ ਬੀਸੀ ਵਿੱਚ ਚੱਲ ਰਹੀਆਂ ਆਪਣੀਆਂ ਗਤੀਵਿਧੀਆਂ ਦੋ ਦਿਨ ਲਈ ਬੰਦ ਕਰਨ ਉੱਤੇ ਰਾਜ਼ੀ ਹੋਈ ਹੈ ਜਦਕਿ ਆਰਸੀਐਮਪੀ ਵੱਲੋਂ ਸੰਵੇਦਨਸ਼ੀਲ ਹਿੱਸਿਆਂ ਵਿੱਚ ਕੀਤੀ ਜਾ ਰਹੀ ਗਸ਼ਤ ਬੰਦ ਕੀਤੀ ਗਈ ਹੈ।
ਗੱਲਬਾਤ ਸ਼ੁਰੂ ਹੋਣ ਤੋਂ ਪਹਿਲਾਂ ਦੋਵਾਂ ਧਿਰਾਂ ਵੱਲੋਂ ਦਿੱਤੇ ਜਾ ਰਹੇ ਅਜਿਹੇ ਸਹਿਯੋਗ ਦੀ ਚੀਫਜ਼ ਵੱਲੋਂ ਸ਼ਲਾਘਾ ਕੀਤੀ ਗਈ। ਚੀਫਜ਼ ਵੱਲੋਂ ਜਾਰੀ ਬਿਆਨ ਵਿੱਚ ਆਖਿਆ ਗਿਆ ਕਿ ਸਾਡਾ ਮੰਨਣਾ ਹੈ ਕਿ ਅਜਿਹੇ ਹਾਲਾਤ ਕਾਰਨ ਗੱਲਬਾਤ ਲਈ ਜੋ ਮਾਹੌਲ ਚਾਹੀਦਾ ਹੈ ਉਹ ਬਣ ਸਕੇਗਾ ਤੇ ਸਾਡੀ ਗੱਲਬਾਤ ਸਕਾਰਾਤਮਕ ਰਹੇਗੀ। ਚੀਫਜ਼ ਨੇ ਆਖਿਆ ਕਿ ਬੈਨੇਟ ਤੇ ਫਰੇਜ਼ਰ ਨਾਲ ਸਾਡੀ ਮੁਲਾਕਾਤ ਪਹਿਲਾ ਕਦਮ ਹੈ। ਜਿ਼ਕਰਯੋਗ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਬੀਸੀ ਦੇ ਪ੍ਰੀਮੀਅਰ ਜੌਹਨ ਹੌਰਗਨ ਨੇ ਇਨ੍ਹਾਂ ਮੁੱਦਿਆਂ ਉੱਤੇ ਗੱਲ ਕਰਨ ਦਾ ਸੱਦਾ ਕਬੂਲ ਨਹੀਂ ਸੀ ਕੀਤਾ।
ਬੈਨੇਟ ਤੇ ਫਰੇਜ਼ਰ ਨੇ ਆਖਿਆ ਕਿ ਉਨ੍ਹਾਂ ਨੂੰ ਆਸ ਹੈ ਕਿ ਇਨ੍ਹਾਂ ਮੀਟਿੰਗਾਂ ਨਾਲ ਵਿਵਾਦ ਤੇ ਮੁਜ਼ਾਹਰੇ ਖਤਮ ਕਰਨ ਦਾ ਮੁੱਢ ਬੱਝੇਗਾ। ਇੰਡੀਜੀਨਸ ਸਰਵਿਸਿਜ਼ ਮੰਤਰੀ ਮਾਰਕ ਮਿਲਰ ਨੇ ਆਖਿਆ ਕਿ ਇਹ ਮੀਟਿੰਗ ਖੁੱਲ੍ਹੀ ਗੱਲਬਾਤ ਤੇ ਸ਼ਾਂਤਮਈ ਹੱਲ ਲਈ ਜਿੱਤ ਹੈ ਪਰ ਇਹ ਤਾਂ ਅਜੇ ਸ਼ੁਰੂਆਤ ਹੈ। ਅਜਿਹੇ ਕਈ ਮੁੱਦੇ ਹਨ ਜਿਨ੍ਹਾਂ ਨੂੰ ਹੱਲ ਕਰਨ ਵਿੱਚ ਸਮਾਂ ਲੱਗੇਗਾ।