ਮਿਲਵੌਕੀ, 26 ਫਰਵਰੀ (ਪੋਸਟ ਬਿਊਰੋ) : ਬੁੱਧਵਾਰ ਨੂੰ ਮੌਲਸਨ ਕੂਰਜ਼ ਬਰੂਇੰਗ ਕੰਪਨੀ ਦੇ ਕੈਂਪਸ ਵਿੱਚ ਚੱਲੀ ਗੋਲੀ ਕਾਰਨ ਕਈ ਲੋਕ ਮਾਰੇ ਗਏ। ਇਹ ਜਾਣਕਾਰੀ ਮਿਲਵੌਕੀ ਦੇ ਮੇਅਰ ਟੌਮ ਬੈਰੇਟ ਨੇ ਦਿੱਤੀ।
ਮ੍ਰਿਤਕਾਂ ਵਿੱਚ ਸ਼ੂਟਰ ਵੀ ਸ਼ਾਮਲ ਸੀ। ਬੈਰੇਟ ਨੇ ਮਰਨ ਵਾਲਿਆਂ ਦੀ ਸਹੀ ਗਿਣਤੀ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ। ਮੇਅਰ ਨੇ ਆਖਿਆ ਕਿ ਇੱਥੇ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਲਈ ਬਹੁਤ ਹੀ ਖਤਰਨਾਕ ਦਿਨ ਸੀ। ਪੁਲਿਸ ਨੇ ਟਵੀਟ ਕਰਕੇ ਦੱਸਿਆ ਕਿ ਹੁਣ ਕਿਸੇ ਵੀ ਤਰ੍ਹਾਂ ਦਾ ਕੋਈ ਖਤਰਾ ਨਹੀਂ ਰਹਿ ਗਿਆ ਹੈ। ਅਧਿਕਾਰੀਆਂ ਨੇ ਫੌਰੀ ਸ਼ੂਟਰ ਸਬੰਧੀ ਵੇਰਵਾ ਜਾਰੀ ਨਹੀਂ ਕੀਤਾ ਤੇ ਨਾ ਹੀ ਇਹ ਦੱਸਿਆ ਕਿ ਗੋਲੀ ਕਿਵੇਂ ਚਲੀ।
ਇਹ ਘਟਨਾ ਕਾਰਪੋਰੇਟ ਆਫਿਸਿਜ਼ ਤੇ ਬਰੂਇੰਗ ਫੈਸਿਲਿਟੀਜ਼ ਵਾਲੇ ਕਾਂਪਲੈਕਸ ਵਿੱਚ ਵਾਪਰੀ। ਇਸ ਕਾਂਪਲੈਕਸ ਵਿੱਚ 600 ਲੋਕ ਕੰਮ ਕਰਦੇ ਹਨ। ਇਸ ਇਲਾਕੇ ਨੂੰ ਮਿਲਰ ਵੈਲੀ ਵੀ ਆਖਿਆ ਜਾਂਦਾ ਹੈ। ਜੇਮਜ਼ ਬੌਇਲ ਨੇ ਮਿਲਵੌਕੀ ਦੇ ਜਰਨਲ ਸੈਂਟੀਨਲ ਨੂੰ ਦੱਸਿਆ ਕਿ ਉਸ ਦੀ ਪਤਨੀ ਲਾਸੋਨਿਆ ਰੈਗਡੇਲਜ਼ ਮੌਲਸਨ ਕੂਰਜ਼ ਦੇ ਕਲੇਮਜ਼ ਡਿਪਾਰਟਮੈਂਟ ਵਿੱਚ ਕੰਮ ਕਰਦੀ ਹੈ। ਉਸ ਨੇ ਫੈਸਿਲਿਟੀ ਦੇ ਅੰਦਰੋ ਹੀ ਟੈਕਸਟ ਭੇਜ ਕੇ ਆਪਣੇ ਪਤੀ ਨੂੰ ਦੱਸਿਆ ਕਿ ਫੈਸਿਲਿਟੀ ਦੇ ਅੰਦਰ ਸ਼ੂਟਰ ਘੁੰਮ ਰਿਹਾ ਹੈ ਤੇ ਉਹ ਇੱਕ ਕਮਰੇ ਵਿਚ ਆਪਣੇ ਸਹਿਯੋਗੀਆਂ ਨਾਲ ਬੰਦ ਹੈ।
ਵਿਸਕੌਨਸਿਨ ਦੇ ਗਵਰਨਰ ਟੋਨੀ ਐਵਰਜ਼ ਮੌਕੇ ਦਾ ਜਾਇਜ਼ਾ ਲੈਣ ਲਈ ਪਹੁੰਚੇ। ਅਟਾਰਨੀ ਜਨਰਲ ਜੋਸ਼ ਕੌਲ ਨੇ ਇਸ ਗੋਲੀਕਾਂਡ ਨੂੰ ਮੰਦਭਾਗੀ ਘਟਨਾ ਦੱਸਿਆ। ਮਿਲਰ ਵੈਲੀ 160 ਸਾਲ ਪੁਰਾਣੀ ਬਰੂਅਰੀ ਹੈ। ਜਿੱਥੇ ਪੈਕੇਜਿੰਗ ਸੈਂਟਰ ਵੀ ਹੈ ਤੇ ਹਰੇਕ ਮਿੰਟ ਹਜ਼ਾਰਾਂ ਦੀ ਗਿਣਤੀ ਵਿੱਚ ਕੈਨ ਤੇ ਬੋਤਲਾਂ ਭਰੀਆਂ ਜਾਂਦੀਆਂ ਹਨ ਤੇ ਇਕ ਵੰਡ ਸੈਂਟਰ ਵੀ ਹੈ ਜਿਸ ਦਾ ਆਕਾਰ ਪੰਜ ਫੁਟਬਾਲ ਦੇ ਮੈਦਾਨਾਂ ਜਿੰਨਾ ਹੈ।