ਫਿਲਮ 'ਚ ਆਪਣੇ ਦਮਦਾਰ ਅਭਿਨੈ ਲਈ ਪਛਾਣੀ ਜਾਣ ਵਾਲੀ ਤਾਪਸੀ ਪਨੂੰ ਨੇ ਦੋ ਸਾਲਾਂ ਵਿੱਚ ‘ਨਾਮ ਸ਼ਬਾਨਾ’, ‘ਬੇਬੀ’, ‘ਪਿੰਕ’, ਸਾਂਢ ਕੀ ਆਂਖ’, ‘ਮਿਸ਼ਨ ਮੰਗਲ’, ‘ਸੂਰਮਾ’, ‘ਮੁਲਕ’, ‘ਬਦਲਾ’, ‘ਮਨਮਰਜ਼ੀਆਂ’ ਆਦਿ ਫਿਲਮਾਂ ਦੇ ਦਮ ਉਤੇ ਮਾਇਆ ਨਗਰੀ ਵਿੱਚ ਸ਼ਾਨਦਾਰ ਮੁਕਾਮ ਹਾਸਲ ਕੀਤਾ ਹੈ। ਇਹੀ ਕਾਰਨ ਹੈ ਕਿ ਅੱਗੇ ਵੀ ਉਸ ਨੂੰ ਇੱਕ ਤੋਂ ਵੱਧ ਇੱਕ ਭੂਮਿਕਾਵਾਂ ਮਿਲ ਰਹੀਆਂ ਹਨ। ਅਜਿਹੀ ਹੀ ਦਮਦਾਰ ਭੂਮਿਕਾ ਵਾਲੀ ਫਿਲਮ ਹੈ ‘ਥੱਪੜ’ ਜੋ ਜਲਦੀ ਰਿਲੀਜ਼ ਹੋਵੇਗੀ। ਪੇਸ਼ ਹਨ ਤਾਪਸੀ ਨਾਲ ਇਸੇ ਸਿਲਸਿਲੇ ਵਿੱਚ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ਤੁਹਾਡੀ ਫਿਲਮ ‘ਥੱਪੜ’ ਦੇ ਟ੍ਰੇਲਰ ਨੂੰ ਕਾਫੀ ਪਸੰਦ ਕੀਤਾ ਗਿਆ ਹੈ। ਇਸ ਵਿੱਚ ਆਪਣੇ ਰੋਲ ਬਾਰੇ ਦੱਸੋ?
- ਇਸ 'ਚ ਮੈਂ ਇੱਕ ਅਜਿਹੀ ਔਰਤ ਦਾ ਕਿਰਦਾਰ ਨਿਭਾਇਆ ਹੈ, ਜੋ ਆਪਣੀ ਜ਼ਿੰਦਗੀ 'ਚ ਹਿੰਸਾ ਨੂੰ ਬਿਲਕੁਲ ਬਰਦਾਸ਼ਤ ਨਹੀਂ ਕਰਦੀ ਅਤੇ ਆਪਣੇ ਪਤੀ ਤੋਂ ਇੱਕ ਪਾਰਟੀ 'ਚ ਥੱਪੜ ਖਾਣ ਤੋਂ ਬਾਅਦ ਉਸ ਨੂੰ ਛੱਡ ਦੇਣ ਦਾ ਫੈਸਲਾ ਕਰਦੀ ਹੈ। ਇਹ ਕਰੈਕਟਰ ਮੇਰੇ ਲਈ ਕਾਫੀ ਵੱਖਰਾ ਸੀ ਅਤੇ ਮੈਂ ਇਸ ਨੂੰ ਚੈਲੇਂਜ ਦੀ ਤਰ੍ਹਾਂ ਲਿਆ। ਇਸ ਦੀ ਸ਼ੂਟਿੰਗ ਦੇ 15 ਦਿਨਾਂ ਬਾਅਦ ਮੈਂ ਕਾਫੀ ਘੁਟਣ ਮਹਿਸੂਸ ਕਰਨ ਲੱਗੀ ਸੀ। ਮੇਰੇ ਵਰਗੀ ਤੇਜ਼ ਤਰਾਰ ਪਰਸਨੈਲਿਟੀ ਹੈ, ਉਸ ਨਾਲ ਮੈਨੂੰ ਅੰਮ੍ਰਿਤਾ (ਉਸ ਦੇ ਕਿਰਦਾਰ ਦਾ ਨਾਂਅ) ਦੀ ਪਰਸਨੈਲਿਟੀ ਵਿੱਚ ਢਲਣ ਲਈ ਕਾਫੀ ਮਿਹਨਤ ਕਰਨੀ ਪਈ।
* ਸੁਣਿਆ ਹੈ ਕਿ ਇਸ ਫਿਲਮ 'ਚ ਇੱਕ ਥੱਪੜ ਵਾਲੇ ਸੀਨ ਲਈ ਤੁਹਾਨੂੰ ਸੱਤ ਥੱਪੜ ਖਾਣੇ ਪਏ?
- ਇਸ ਫਿਲਮ ਦਾ ਥੱਪੜ ਵਾਲਾ ਸੀਨ ਬਹੁਤ ਮਹੱਤਵ ਪੂਰਨ ਸੀ, ਇਸ ਲਈ ਇਸ ਸ਼ਾਟ ਨੂੰ ਪ੍ਰਫੈਕਟ ਕਰਨ ਲਈ ਸੱਤ ਥੱਪੜ ਖਾਧੇ ਸਨ। ਸ਼ਾਇਦ ਮੈਂ ਫਿਲਮ ਦੇ ਕਿਸੇ ਹੋਰ ਸੀਨ ਲਈ ਇੰਨੇ ਰੀਟੇਕ ਨਹੀਂ ਦਿੱਤੇ ਹੋਣਗੇ।
* ਅਨੁਭਵ ਸਿਨਹਾ ਇੱਕ ਬਿਹਤਰੀਨ ਫਿਲਮਕਾਰ ਹੈ। ਫਿਲਮ ‘ਮੁਲਕ’ ਤੋਂ ਬਾਅਦ ਤੁਹਾਨੂੰ ਉਨ੍ਹਾਂ ਦੀ ਫਿਲਮ ‘ਥੱਪੜ’ ਕਿਵੇਂ ਮਿਲੀ?
- ਫਿਲਮ ‘ਮੁਲਕ’ ਦੀ ਸ਼ੂਟਿੰਗ ਦੌਰਾਨ ਹੀ ਉਨ੍ਹਾਂ ਨੇ ਕਿਹਾ ਸੀ ਕਿ ਉਹ ਆਪਣੀ ਅਗਲੀ ਫਿਲਮ 'ਚ ਮੈਨੂੰ ਲੈਣਗੇ। ‘ਆਰਟੀਕਲ 15’ ਦੀ ਰਿਲੀਜ਼ ਤੋਂ ਬਾਅਦ ਉਨ੍ਹਾਂ ਨੇ ਮੇਰੇ ਨਾਲ ਸੰਪਰਕ ਕੀਤਾ ਤੇ ਫਿਲਮ ‘ਥੱਪੜ’ ਦੀ ਕਹਾਣੀ ਸੁਣਾਈ। ਕਿਉਂਕਿ ਫਿਲਮ ਦੀ ਕਹਾਣੀ ਨਾਲ ਹਰ ਮਹਿਲਾ ਰਿਲੇਟ ਕਰੇਗੀ, ਇਸ ਲਈ ਮੈਂ ਇਸ ਨੂੰ ਕਰਨਾ ਚਾਹਿਆ।
* ਕੀ ਤੁਸੀਂ ਕਦੇ ਕਿਸੇ ਨੂੰ ਥੱਪੜ ਮਾਰਿਆ ਹੈ? ਕਾਲਜ ਦੇ ਦਿਨਾਂ 'ਚ ਛੇੜਖਾਨੀ ਦਾ ਜਵਾਬ ਕਿਵੇਂ ਦਿੰਦੇ ਸੀ?
- ਤੁਹਾਨੂੰ ਜਾਣ ਕੇ ਹੈਰਾਨੀ ਹੋਵੇਗੀ ਕਿ ਮੈਂ ਆਪਣੀ 32 ਸਾਲਾ ਜ਼ਿੰਦਗੀ ਵਿੱਚ ਅੱਜ ਤੱਕ ਕਿਸੇ ਨੂੰ ਥੱਪੜ ਨਹੀਂ ਮਾਰਿਆ। ਮੈਂ ਕਿਸੇ ਨੂੰ ਥੱਪੜ ਮਾਰਾਂ ਅਜਿਹਾ ਕੋਈ ਕਾਰਨ ਨਹੀਂ। ਦੂਜੀ ਵਜ੍ਹਾ ਹੈ ਕਿ ਮੈਂ ਅਹਿੰਸਾਵਾਦੀ ਹਾਂ ਤੇ ਤੀਜੀ ਵਜ੍ਹਾ ਇਹ ਕਿ ਇਹ ਮੇਰੇ ਸੰਸਕਾਰਾਂ ਵਿੱਚ ਸ਼ਾਮਲ ਨਹੀਂ। ਜੇ ਮੈਨੂੰ ਕਦੇ ਕਿਸੇ ਛੇੜ ਵੀ ਦਿੱਤਾ ਤਾਂ ਮੇਰਾ ਬੋਲਣਾ ਕਿਸੇ ਥੱਪੜ ਤੋਂ ਘੱਟ ਨਹੀਂ ਸੀ। ਮੇਰਾ ਬੋਲਣਾ ਥੱਪੜ ਦਾ ਕੰਮ ਕਰਦਾ ਸੀ। ਮੈਂ ਗੱਲਾਂ ਨਾਲ ਥੱਪੜ ਦੀ ਕਮੀ ਪੂਰੀ ਕਰ ਸਕਦੀ ਹਾਂ।
* ਵਿਆਹ ਤੋਂ ਬਾਅਦ ਤੁਹਾਡੀਆਂ ਆਪਣੇ ਪਤੀ ਤੋਂ ਕੀ ਉਮੀਦਾਂ ਹੋਣਗੀਆਂ?
- ਉਮੀਦ ਤਾਂ ਹੁੰਦੀ ਹੈ ਕਿ ਸਭ ਕੁਝ ਚੰਗਾ ਹੋਵੇ, ਨਾਰਮਲ ਹੋਵੇ, ਪਰ ਕੁਝ ਗਲਤ ਹੁੰਦੀ ਹੈ ਤਾਂ ਮੈਂ ਬਰਦਾਸ਼ਤ ਕਰਨ ਵਾਲਿਆਂ 'ਚੋਂ ਨਹੀਂ। ਵਿਆਹੁਤਾ ਰਿਸ਼ਤੇ 'ਚ ਪਤੀ ਤੋਂ ਇੱਛਾਂ ਕਰਾਂਗੀ ਸਨਮਾਨ ਦੀ। ਰਿਸ਼ਤੇ 'ਚ ਆਪਸੀ ਸਨਮਾਨ ਹੋਵੇ। ਮੇਰਾ ਪਤੀ ਮੈਨੂੰ ਦੂਜੇ ਦਰਜੇ 'ਤੇ ਨਾ ਸਮਝੇ। ਜਿੱਥੇ ਰਿਸ਼ਤੇ 'ਚ ਸਨਮਾਨ ਹੈ, ਉਥੇ ਪਿਆਰ ਟਿਕਿਆ ਰਹਿੰਦਾ ਹੈ।
* ਆਪਣੇ ਨਾਂਅ ਦਾ ਮਤਲਬ ਦੱਸੋ?
- ਤਪਸਵਨੀ, ਸੰਸਕ੍ਰਿਤ ਸ਼ਬਦ ਹੈ, ਜੋ ਕੋਚੀ 'ਚ ਕਿਸੇ ਕੁੜੀ ਦਾ ਨਾਂਅ ਸੁਣਿਆ ਸੀ ਮੇਰੇ ਭੂਆ ਤੇ ਫੁੱਫੜ ਜੀ ਨੇ, ਸ਼ਾਇਦ ਮੇਰੇ ਪੈਦਾ ਹੋਣ ਤੋਂ ਪਹਿਲਾਂ ਜਾਂ ਉਸੇ ਟਾਈਮ। ਅੱਜ ਲੋਕ ਸੋਚਦੇ ਹਨ ਬੰਗਾਲੀ ਹੈ, ਪਤਾ ਨਹੀਂ ਕੀ ਹੈ, ਪਰ ਇੱਕ ਚੀਜ਼ ਤਾਂ ਹੈ ਕਿ ਲੋਕ ਸਰਦਾਰਨੀ ਨਹੀਂ ਸੋਚਦੇ। ਬਾਕੀ ਬਹੁਤ ਸਾਰੇ ਲੋਕਾਂ ਨੂੰ ਲੱਗਦਾ ਹੈ ਕਿ ਪਤਾ ਨਹੀਂ ਕੀ ਹੈ। ਕਈ ਲੋਕ ਤਾਂ ਮਿਸਟਰ ਲਾ ਦਿੰਦੇ ਹਨ, ਮਿਸਟਰ ਤਾਪਸੀ, ਨਵਾਂ ਨਾਂਅ ਹੈ, ਪਰ ਖੁਸ਼ ਹਾਂ।