ਜਮੂਈ, 24 ਫਰਵਰੀ (ਪੋਸਟ ਬਿਊਰੋ)- ਝਾਰਖੰਡ ਤੋਂ ਗ਼੍ਰਿਫ਼ਤਾਰ ਕਰਕੇ ਲਿਆਂਦੇ ਗਏ ਇੱਕ ਮਾਓਵਾਦੀ ਆਗੂ ਦੀ ਕੁਝ ਹੀ ਘੰਟਿਆਂ ਬਾਅਦ ਬਿਹਾਰ ਪੁਲਸ ਦੀ ਹਿਰਾਸਤ ਵਿੱਚ ਮੌਤ ਹੋ ਗਈ ਹੈ। ਇਸ ਮਾਓਵਾਦੀ ਆਗੂ ਦੇ ਸਿਰ 'ਤੇ ਗਿਆਰਾਂ ਲੱਖ ਰੁਪਏ ਦਾ ਇਨਾਮ ਸੀ ਅਤੇ ਪੁਲਸ ਨੇ ਇਸ ਗ੍ਰਿਫਤਾਰੀ ਨੂੰ ਇੱਕ ਵੱਡੀ ਪ੍ਰਾਪਤੀ ਕਿਹਾ ਸੀ।
ਬਿਹਾਰ ਪੁਲਸ ਦੇ ਡੀ ਆਈ ਜੀ ਮਨੂੰ ਮਹਾਰਾਜ ਨੇ ਦੱਸਿਆ ਕਿ ਸੀ ਪੀ ਆਈ (ਮਾਓਵਾਦੀ) ਦੇ ਜ਼ੋਨਲ ਕਮਾਂਡਰ ਸਿੱਧੂ ਕੋੜਾ (40) ਦੀ ਇੱਕ ਹਸਪਤਾਲ ਵਿੱਚ ਮੌਤ ਹੋ ਗਈ। ਉਸ ਨੂੰ ਛਾਤੀ ਤੇ ਪੇਟ ਦਰਦ ਦੀ ਸ਼ਿਕਾਇਤ 'ਤੇ ਕੱਲ੍ਹ ਰਾਤ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਸੀ। ਜਮੂਈ ਜ਼ਿਲ੍ਹੇ ਦੇ ਬਾਲਕ ਚਕਾਈ ਨਾਲ ਸੰਬਧਤ ਕੋੜਾ ਨੂੰ ਕੱਲ੍ਹ ਝਾਰਖੰਡ ਦੇ ਦੁਮਕਾ ਰੇਲਵੇ ਸਟੇਸ਼ਨ ਤੋਂ ਐਸ ਟੀ ਐਫ ਦੀ ਟੀਮ ਨੇ ਗ਼੍ਰਿਫ਼ਤਾਰ ਕੀਤਾ ਸੀ। ਇਸ ਟੀਮ ਵਿੱਚ ਪਟਨਾ ਅਤੇ ਜਮੂਈ ਦੇ ਪੁਲਸ ਵਾਲੇ ਸ਼ਾਮਲ ਸਨ। ਡੀ ਆਈ ਜੀ ਨੇ ਕਿਹਾ ਕਿ ਸਿੱਧੂ ਕੋੜਾ ਕਤਲ, ਲੁੱਟ, ਅਗਵਾ ਅਤੇ ਫਿਰੌਤੀ ਮੰਗਣ ਸਣੇ 70 ਗੰਭੀਰ ਕੇਸਾਂ ਵਿੱਚ ਲੋੜੀਂਦਾ ਸੀ। ਉਨ੍ਹਾਂ ਕਿਹਾ ਕਿ ਇਥੇ ਲਿਆਉਣ ਪਿੱਛੋਂ ਉਸ ਤੋਂ ਪੁੱਛਗਿੱਛ ਕੀਤੀ ਗਈ। ਉਸ ਕੋਲੋਂ ਏ ਕੇ-47 ਅਤੇ ਇਨਸਾਸ ਰਾਈਫਲਾਂ ਮਿਲੀਆਂ ਸਨ। ਉਸ ਵੱਲੋਂ ਦਿੱਤੀ ਸੂਚਨਾ ਦੇ ਆਧਾਰ ਤੇ ਨਕਸਲਵਾਦ ਪ੍ਰਭਾਵਿਤ ਜ਼ਿਲ੍ਹਾ ਮੁੰਗੇਰ ਦੇ ਕਈ ਹਿੱਸਿਆਂ ਵਿੱਚ ਮਾਰੇ ਗਏ ਛਾਪਿਆਂ ਦੌਰਾਨ ਵੱਡੀ ਗਿਣਤੀ ਹਥਿਆਰ ਤੇ ਗੋਲਾ ਬਾਰੂਦ ਮਿਲਿਆ ਸੀ। ਉਨ੍ਹਾਂ ਦੱਸਿਆ ਕਿ ਇਸ ਮਾਓਵਾਦੀ ਉੱਤੇ ਬਿਹਾਰ 'ਚ ਇੱਕ ਲੱਖ ਤੇ ਝਾਰਖੰਡ ਵਿੱਚ 10 ਲੱਖ ਰੁਪਏ ਦਾ ਇਨਾਮ ਸੀ।