ਕੋਲਕਾਤਾ, 24 ਫਰਵਰੀ (ਪੋਸਟ ਬਿਊਰੋ)- ਭੂ-ਵਿਗਿਆਨਕ ਸਰਵੇ ਆਫ ਇੰਡੀਆ (ਜੀ ਐਸ ਆਈ) ਨੇ ਉੱਤਰ ਪ੍ਰਦੇਸ਼ ਦੇ ਸੋਨਭੱਦਰ ਜ਼ਿਲ੍ਹੇ 'ਚ 3,000 ਟਨ ਸੋਨਾ ਮਿਲਣ ਦੇ ਦਾਅਵਿਆਂ ਨੂੰ ਰੱਦ ਕਰ ਕੇ ਕਿਹਾ ਹੈ ਕਿ ਇਥੇ ਵੱਧ ਤੋਂ ਵੱਧ 160 ਕਿਲੋਗ੍ਰਾਮ ਸੋਨਾ ਹੋ ਸਕਦਾ ਹੈ। ਸੋਨਭੱਦਰ ਜ਼ਿਲ੍ਹੇ ਦੇ ਮਾਈਨਿੰਗ ਅਧਿਕਾਰੀ ਕੇ ਕੇ ਰਾਏ ਨੇ ਕੱਲ੍ਹ ਦੱਸਿਆ ਸੀ ਕਿ ਜ਼ਿਲ੍ਹੇ ਦੇ ਸੋਨ ਮਿਲਿਆ ਹੈ ਅਤੇ ਸੋਨ ਪਹਾੜੀ ਖੇਤਰ 'ਚ ਕਰੀਬ 2,943.26 ਟਨ ਤੇ ਹਰਦੀ ਖੇਤਰ 'ਚ 646.16 ਕਿਲੋਗ੍ਰਾਮ ਸੋਨੇ ਦੇ ਭੰਡਾਰ ਮਿਲਣ ਦੀ ਸੰਭਾਵਨਾ ਹੈ, ਪਰ ਸਰਵੇ ਵਿਭਾਗ ਇਸ ਨੂੰ ਨਹੀਂ ਮੰਂਦਾ।
ਜੀ ਐਸ ਆਈ ਦੇ ਡਾਇਰੈਕਟਰ ਜਨਰਲ ਐਮ ਸ੍ਰੀਧਰ ਨੇ ਕੋਲਕਾਤਾ 'ਚ ਕੱਲ੍ਹ ਸ਼ਾਮ ਖ਼ਬਰ ਏਜੰਸੀ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਸੋਨਭੱਦਰ ਦੇ ਖਣਿਜ ਖੇਤਰ 'ਚ ਇੱਕ ਟਨ 'ਚੋਂ ਕੇਵਲ 3.03 ਗ੍ਰਾਮ ਸੋਨਾ ਮਿਲਣ ਦਾ ਸੰਭਾਵਨਾ ਹੈ ਅਤੇ ਇਥੇ ਮੌਜੂਦ 52,806.25 ਟਨ ਖਣਿਜ ਧਾਤੂ ਤੋਂ ਅੰਦਾਜਨ 160 ਕਿਲੋਗ੍ਰਾਮ ਸੋਨਾ ਮਿਲ ਸਕਦਾ ਹੈ, ਪਰ ਜਿਸ ਤਰ੍ਹਾਂ ਮੀਡੀਆ 'ਚ ਦੱਸਿਆ ਜਾ ਰਿਹਾ ਹੈ, ਉਸ ਤਰ੍ਹਾ 3,350 ਟਨ ਨਹੀਂ ਮਿਲ ਸਕਦਾ। ਉਨ੍ਹਾਂ ਸਾਫ ਕੀਤਾ ਕਿ ਜੀ ਐਸ ਆਈ ਨੇ ਕਦੇ ਵੀ ਸੋਨਭੱਦਰ 'ਚ ਏਨਾ ਸੋਨਾ ਹੋਣ ਦਾ ਦਾਅਵਾ ਨਹੀਂ ਕੀਤਾ ਅਤੇ ਅਸੀਂ ਹਮੇਸ਼ਾ ਸੂਬਾ ਇਕਾਈਆਂ ਵੱਲੋਂ ਕੱਚੀ ਧਾਤ ਦੇ ਸੋਮੇ ਮਿਲਣ 'ਤੇ ਸਰਵੇ ਕਰਨ ਉਪਰੰਤ ਹੀ ਕੋਈ ਦਾਅਵਾ ਕਰਦੇ ਹਾਂ।