ਭੋਪਾਲ, 24 ਫਰਵਰੀ (ਪੋਸਟ ਬਿਊਰੋ)- ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅੱਜ ਸੋਮਵਾਰ ਨੂੰ ਆਪਣੀ ਪਤਨੀ, ਧੀ ਅਤੇ ਜਵਾਈ ਨਾਲ 24 ਅਤੇ 25 ਫਰਵਰੀ ਦੇ ਦੋ ਦਿਨਾਂ ਲਈ ਭਾਰਤ ਆਏ ਹਨ। ਅਹਿਮਦਾਬਾਦ ਹਵਾਈ ਅੱਡੇ ਉੱਤੇ ਪ੍ਰਧਾਨ ਨਰਿੰਦਰ ਮੋਦੀ ਨੇ ਟਰੰਪ ਪਰਵਾਰ ਦਾ ਨਿੱਘਾ ਸਵਾਗਤ ਕੀਤਾ ਹੈ।
ਬਾਅਦ ਵਿੱਚ ਜਦੋਂ ਅਹਿਮਦਾਬਾਦ ਤੋਂ ਆਗਰਾ ਤਕ ਟਰੰਪ-ਟਰੰਪ ਸੁਣਨ ਨੂੰ ਮਿਲ ਰਹੀ ਸੀ, ਓਦੋਂ ਭੋਪਾਲ ਵਿੱਚ ਡੋਨਾਲਡ ਟਰੰਪ ਦੇ ਖਿਲਾਫ ਲੋਕਾਂ ਵਿੱਚ ਗੁੱਸਾ ਭੜਕ ਪਿਆ ਹੈ।
ਦੁਨੀਆ ਭਰ ਦੀ ਭਿਆਨਕ ਉਦਯੋਗਿਕ ਤ੍ਰਾਸਦੀ ਭੋਪਾਲ ਗੈਸ ਕਾਂਡ ਦੇ ਪ੍ਰਭਾਵਿਤ ਲੋਕਾਂ ਤੇ ਉਨ੍ਹਾਂ ਦੇ ਹਿੱਤਾਂ ਲਈ ਕੰਮ ਕਰਨ ਵਾਲੇ ਸੰਗਠਨਾਂ ਨੇ ਰੋਸ ਪ੍ਰਦਰਸ਼ਨ ਕੀਤਾ ਅਤੇ ਦੋਸ਼ ਲਾਇਆ ਕਿ ਭੋਪਾਲ ਗੈਸ ਕਾਂਡ ਲਈ ਜ਼ਿੰਮੇਵਾਰ ਬਹੁ-ਕੌਮੀ ਕੰਪਨੀ ਯੂਨੀਅਨ ਕਾਰਬਾਈਡ ਦੇ ਮਾਲਕ ਡਾਉ ਕੈਮੀਕਲਸ ਨੂੰ ਅਮਰੀਕੀ ਸਰਕਾਰ ਦੀ ਸੁਰੱਖਿਆ ਮਿਲੀ ਹੋਣ ਕਰ ਕੇ ਡਾਓ ਕੈਮੀਕਲਸ ਦੇ ਵਿਰੁੱਧ ਭੋਪਾਲ ਦੀ ਕੋਰਟ ਦੇ ਸੰਮਨ ਦੀ ਤਾਮੀਲ ਨਹੀਂ ਹੋ ਰਹੀ। ਇਸ ਕਾਰਨ ਪੀੜਤਾਂ ਨੇ ਆਪਣੇ ਗੁੱਸੇ ਦਾ ਪ੍ਰਗਟਾਵਾ ਕੀਤਾ ਹੈ। ਇਸ ਪ੍ਰਦਰਸ਼ਨ ਦੌਰਾਨ ਭੋਪਾਲ ਗੈਸ ਪੀੜਤ ਸਟੇਸ਼ਨਰੀ ਕਰਮਚਾਰੀ ਸੰਘ, ਭੋਪਾਲ ਗੈਸ ਪੀੜਤ ਮਹਿਲਾ-ਪੁਰਸ਼ ਸੰਘਰਸ਼ ਮੋਰਚਾ, ਡਾਓ-ਕਾਰਬਾਈਡ ਵਿਰੁੱਧ ਬੱਚੇ ਅਤੇ ਮੱਧ ਪ੍ਰਦੇਸ਼ ਮੁਸਲਿਮ ਵਿਕਾਸ ਪ੍ਰੀਸ਼ਦ ਦੇ ਵਰਕਰਾਂ ਨੇ ਹਿੱਸਾ ਲਿਆ। ਵਰਨਣ ਯੋਗ ਹੈ ਕਿ 2 ਅਤੇ 3 ਦਸੰਬਰ 1984 ਦੀ ਵਿਚਲੀ ਰਾਤ ਨੂੰ ਭੋਪਾਲ ਵਿਚਲੀ ਯੂਨੀਅਨ ਕਾਰਬਾਈਡ ਦੇ ਕੀਟਨਾਸ਼ਕ ਬਣਾਉਣ ਵਾਲੇ ਪਲਾਂਟ ਤੋਂ ਮਿਥਾਈਲ ਆਈਸੋਸਾਈਨਾਈਡ (ਮਿਕ) ਨਾਂ ਦੀ ਜ਼ਹਿਰੀਲੀ ਗੈਸ ਰਿਸਣ ਕਾਰਨ ਹਜ਼ਾਰਾਂ ਲੋਕਾਂ ਦੀ ਮੌਤ ਹੋ ਗਈ ਅਤੇ ਲੱਖਾਂ ਲੋਕ ਪ੍ਰਭਾਵਿਤ ਹੋਏ ਸਨ। ਲੱਗਭਗ 35 ਸਾਲਾਂ ਬਾਅਦ ਵੀ ਅੱਜ ਹਜ਼ਾਰਾਂ ਲੋਕ ਇਸ ਦੇ ਮਾੜੇ ਪ੍ਰਭਾਵ ਨੂੰ ਝੱਲ ਰਹੇ ਹਨ।