ਵਾਸ਼ਿੰਗਟਨ, 24 ਫਰਵਰੀ (ਪੋਸਟ ਬਿਊਰੋ)- ਅਮਰੀਕਾ ਵਿਚ ਅਗਲੇ ਸੋਮਵਾਰ ਤੋਂ ਉਹ ਤਜਵੀਜ਼ ਲਾਗੂ ਹੋ ਜਾਵੇਗੀ, ਜਿਸ ਨਾਲ ਓਥੇ ਗ੍ਰੀਨ ਕਾਰਡ ਵਾਲੇ ਪ੍ਰਵਾਸੀਆਂ ਨੂੰ ਅਮਰੀਕੀ ਨਾਗਰਿਕਾਂ ਵਾਲੇ ਲਾਭ ਮਿਲਣੇ ਬੰਦ ਹੋ ਜਾਣਗੇ।
ਇਸ ਤਜਵੀਜ਼ ਨਾਲ ਅਮਰੀਕਾ ਵਿਚ ਪੱਕੇ ਰਹਿੰਦ ਬੰਗਲਾ ਦੇਸ਼ੀ (61 ਫ਼ੀਸਦੀ) ਤੇ ਪਾਕਿਸਤਾਨੀ (48 ਫ਼ੀਸਦੀ) ਸਭ ਤੋਂ ਵੱਧ ਪ੍ਰਭਾਵਿਤ ਹੋਣਗੇ, ਜਦ ਕਿ ਸਰਕਾਰੀ ਸਹੂਲਤਾਂ ਦਾ ਲਾਭ ਲੈਣ ਵਾਲੇ 11 ਫ਼ੀਸਦੀ ਭਾਰਤੀ ਲੋਕ ਵੀ ਪ੍ਰਭਾਵਿਤ ਹੋਣਗੇ। ਇਹ ਅੰਕੜਾ ਸਿਰਫ਼ ਦੱਖਣ ਏਸ਼ੀਆਈ ਦੇਸ਼ਾਂ ਦਾ ਹੈ। ਗ੍ਰੀਨ ਕਾਰਡ ਕੁਝ ਸ਼ਰਤਾਂ ਦੇ ਨਾਲ ਅਮਰੀਕਾ ਵਿਚ ਪੱਕੇ ਰਹਿਣ ਦੀ ਸਹੂਲਤ ਹੈ। ਗ੍ਰੀਨ ਕਾਰਡ ਵਾਲੇ ਪ੍ਰਵਾਸੀਆਂ ਲਈ ਸਰਕਾਰੀ ਸਹੂਲਤਾਂ ਦੀ ਇਹ ਰੋਕ ਸੁਪਰੀਮ ਕੋਰਟ ਦੇ ਇਕ ਆਦੇਸ਼ ਨਾਲ ਲੱਗੇਗੀ। ਇਹ ਆਦੇਸ਼ ਬੀਤੇ ਸ਼ੁੱਕਰਵਾਰ ਆਇਆ ਹੈ।
ਵ੍ਹਾਈਟ ਹਾਊਸ ਦੀ ਪ੍ਰੈੱਸ ਸੈਕਟਰੀ ਸਟੈਫਨੀ ਗ੍ਰੀਸ਼ਮ ਨੇ ਇਸ ਬਾਰੇ ਕਿਹਾ ਕਿ ਸੁਪਰੀਮ ਕੋਰਟ ਦਾ ਇਹ ਆਦੇਸ਼ ਮਿਹਨਤੀ ਅਮਰੀਕੀ ਟੈਕਸ ਦਾਤਾਵਾਂ ਦੇ ਹਿੱਤਾਂ ਦੀ ਰਾਖੀ ਕਰੇਗਾ। ਇਸ ਨਾਲ ਅਮਰੀਕਾ ਦੇ ਸਰਕਾਰੀ ਖਜ਼ਾਨੇ ਦਾ ਘਾਟਾ ਘੱਟ ਕਰਨ ਵਿਚ ਮਦਦ ਮਿਲੇਗੀ। ਵਰਨਣ ਯੋਗ ਹੈ ਕਿ ਅਮਰੀਕਾ ਵਿਚ ਗ੍ਰੀਨ ਕਾਰਡ ਵਾਲਿਆਂ ਨੂੰ ਹਾਲੇ ਤਕ ਮੈਡੀਕਲ, ਖੁਰਾਕੀ ਤੇ ਹੋਰ ਸਰਕਾਰੀ ਸਹੂਲਤਾਂ ਦਾ ਲਾਭ ਮਿਲਦਾ ਸੀ। ਇਸ ਨਾਲ ਉਹ ਐੱਚ-1 ਵੀਜ਼ਾ ਪ੍ਰਾਪਤ ਤਜਰਬੇਕਾਰ ਪੇਸ਼ੇਵਰ ਵੀ ਪ੍ਰਭਾਵਿਤ ਹੋਣਗੇ, ਜਿਹੜੇ ਗ੍ਰੀਨ ਕਾਰਡ ਹਾਸਲ ਕਰਨ ਲਈ ਅਰਜ਼ੀ ਦੇ ਚੁੱਕੇ ਹਨ।
ਸੁਪਰੀਮ ਕੋਰਟ ਦਾ ਆਦੇਸ਼ ਪਿਛਲੇ 14 ਅਗਸਤ 2014 ਨੂੰ ਨੋਟੀਫਾਈ ਹੋ ਗਿਆ ਸੀ। ਇਸ ਨੇ 15 ਅਕਤੂਬਰ 2019 ਤੋਂ ਲਾਗੂ ਹੋਣਾ ਸੀ, ਪਰ ਵੱਖ-ਵੱਖ ਅਦਾਲਤਾਂ ਵਿਚ ਪੈਂਡਿੰਗ ਪਟੀਸ਼ਨਾਂ ਕਾਰਨ ਇਹ ਲਾਗੂ ਨਹੀਂ ਸੀ ਹੋ ਸਕਿਆ।