ਪਿਛਲੇ ਸਾਲ ‘ਕਬੀਰ ਸਿੰਘ’ ਅਤੇ ‘ਗੁੱਡ ਨਿਊਜ਼’ ਵਰਗੀਆਂ ਸੁਪਰਹਿੱਟ ਫਿਲਮਾਂ ਵਿੱਚ ਨਜ਼ਰ ਆਉਣ ਵਾਲੀ ਕਿਆਰਾ ਅਡਵਾਨੀ ਵੱਡੇ ਪਰਦੇ ਦੇ ਨਾਲ ਡਿਜੀਟਲ ਪਲੇਟਫਾਰਮ 'ਤੇ ਵੀ ਸਰਗਰਮ ਹੈ। ਉਹ ਨੈਟਫਲਿਕਸ ਦੀ ਅਗਲੀ ਫਿਲਮ ‘ਗਿਲਟੀ’ ਵਿੱਚ ਨਜ਼ਰ ਆਵੇਗੀ। ਦੋ ਸਾਲ ਪਹਿਲਾਂ ਉਹ ‘ਲਸਟ ਸਟੀਰੋਜ਼’ ਵਿੱਚ ਵੀ ਨਜ਼ਰ ਆ ਚੁੱਕੀ ਹੈ। ਮੁੰਬਈ 'ਚ ਫਿਲਮ ‘ਗਿਲਟੀ’ ਦੇ ਟ੍ਰੇਲਰ ਲਾਂਚ ਮੌਕੇ ਕਿਆਰਾ ਨੇ ਦੱਸਿਆ ਕਿ ਕਰਣ ਜੌਹਰ ਨੇ ਉਸ ਨੂੰ ਇਸ ਫਿਲਮ ਦੀ ਕਹਾਣੀ ਕਾਰ 'ਚ ਕਿਤੇ ਜਾਂਦੇ ਹੋਏ ਸੁਣਾਈ ਸੀ। ਕਰਣ ਨੂੰ ਲੱਗਦਾ ਸੀ ਕਿ ਕੁਝ ਵੱਡੀਆਂ ਫਿਲਮਾਂ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਇਸ ਫਿਲਮ 'ਚ ਕੰਮ ਕਰਨ 'ਚ ਝਿਜਕ ਹੋਵੇਗੀ, ਪਰ ਕਿਆਰਾ ਨੇ ਪਹਿਲੀ ਵਾਰ ਹੀ ਇਸ ਦੀ ਕਹਾਣੀ ਸੁਣ ਕੇ ਆਪਣੀ ਮਨਜ਼ੂਰੀ ਦੇ ਦਿੱਤੀ ਸੀ।
ਫਿਲਮ ਦਾ ਨਿਰਦੇਸ਼ਨ ‘ਹਨੂਮਾਨ ਦਿ ਦਮਦਾਰ’ ਅਤੇ ‘ਮੁੰਬਈ ਕਟਿੰਗ’ ਵਰਗੀਆਂ ਫਿਲਮਾਂ ਦੀ ਨਿਰਦੇਸ਼ਕ ਰੁਚੀ ਨਾਰਾਇਣ ਕਰ ਰਹੀ ਹੈ। ਇਸ ਮੌਕੇ 'ਤੇ ਰੁਚੀ ਨੇ ਬਤੌਰ ਮਹਿਲਾ ਨਿਰਦੇਸ਼ਕ ਆਪਣੀਆਂ ਪ੍ਰੇਸ਼ਾਨੀਆਂ ਦੱਸਦਿਆਂ ਕਿਹਾ ਕਿ ਉਹ ਆਪਣੀ ਇੱਕ ਦੂਜੀ ਫਿਲਮ ਬਾਰੇ ਕਈ ਵੱਡੇ ਸਿਤਾਰਿਆਂ ਕੋਲ ਗਈ ਸੀ, ਪਰ ਮਹਿਲਾ ਨਿਰਦੇਸ਼ਕ ਹੋਣ ਕਾਰਨ ਕਿਸੇ ਨੇ ਉਸ ਫਿਲਮ ਵਿੱਚ ਕੰਮ ਕਰਨਾ ਨਹੀਂ ਮੰਨਿਆ। ਇਸ ਦਾ ਪ੍ਰਭਾਵ ਹੈ ਕਿ ਕਿਆਰਾ ‘ਗਿਲਟੀ’ ਵਿੱਚ ਦਿਸੇਗੀ। ਇਸ ਨੂੰ ਕਰਣ ਜੌਹਰ ਅਤੇ ਨੈਟਫਲਿਕਸ ਨੇ ਮਿਲ ਕੇ ਬਣਾਇਆ ਹੈ। ਇਹ ਫਿਲਮ ਛੇ ਮਾਰਚ ਨੂੰ ਰਿਲੀਜ਼ ਹੋਵੇਗੀ।