ਸਾਨ ਫਰਾਂਸਿਸਕੋ, 23 ਫਰਵਰੀ (ਪੋਸਟ ਬਿਊਰੋ)- ਟਵਿੱਟਰ ਨੇ ਨਿਊ ਯਾਰਕ ਦੇ ਸਾਬਕਾ ਮੇਅਰ ਮਾਈਕਲ ਬਲੂਮਬਰਗ ਦੇ ਸਮਰਥਨ ਵਿੱਚ ਸਪੈਮ ਵਰਗੀ ਪੋਸਟ ਕਰਨ ਵਾਲੇ ਸੱਤਰ ਅਕਾਊਂਟਾਂ 'ਤੇ ਰੋਕ ਲਾ ਦਿੱਤੀ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਅਮਰੀਕਾ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਰਾਸ਼ਟਰਪਤੀ ਅਹੁਦੇ ਦੀ ਉਮੀਦਵਾਰੀ ਦੇ ਪ੍ਰਮੁੱਖ ਦਾਅਵੇਦਾਰ ਬਲੂਮਬਰਗ ਨੇ ਸੋਸ਼ਲ ਮੀਡੀਆ 'ਤੇ ਆਪਣੀ ਪ੍ਰਚਾਰ ਮੁਹਿੰਮ ਨੂੰ ਹੁਲਾਰਾ ਦੇਣ ਲਈ ਸੈਂਕੜੇ ਲੋਕਾਂ ਨੂੰ ਕੰਮ 'ਤੇ ਰੱਖਿਆ ਹੈ।
ਵਰਨਣ ਯੋਗ ਹੈ ਕਿ ਬਿਨਾਂ ਬੇਨਤੀ ਦੇ ਇੰਟਰਨੈਟ 'ਤੇ ਲੋਕਾਂ ਨੂੰ ਵਾਰ-ਵਾਰ ਸੰਦੇਸ਼ ਜਾਂ ਇਸ਼ਤਿਹਾਰ ਭੇਜਣਾ ਸਪੈਮ ਕਹਾਉਂਦਾ ਹੈ। ਕੰਪਨੀ ਦੇ ਬੁਲਾਰੇ ਨੇ ਕਿਹਾ ਕਿ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ ਅਕਾਊਂਟਾਂ 'ਤੇ ਰੋਕ ਲਾਈ ਗਈ ਹੈ। ਕੁਝ ਅਕਾਊਂਟਾਂ 'ਤੇ ਜਿੱਥੇ ਪੂਰੀ ਤਰ੍ਹਾਂ ਰੋਕ ਲਾਈ ਗਈ, ਉਥੇ ਜ਼ਿਆਦਾਤਰ ਯੂਜ਼ਰ ਦੀ ਪਛਾਣ ਹੋਣ ਪਿੱਛੋਂ ਕੁਝ ਅਕਾਊਂਟਾਂ ਨੂੰ ਰਿਲੀਜ਼ ਕੀਤਾ ਜਾ ਸਕਦਾ ਹੈ। ਵਾਲ ਸਟਰੀਟ ਜਨਰਲ ਨੇ ਬੁੱਧਵਾਰ ਨੂੰ ਖਬਰ ਦਿੱਤੀ ਸੀ ਕਿ ਨਿਊ ਯਾਰਕ ਦੇ ਸਾਬਕਾ ਮੇਅਰ ਨੇ ਸੋਸ਼ਲ ਮੀਡੀਆ 'ਤੇ ਸਮਰਥਨ ਵਿੱਚ ਪੋਸਟ ਕਰਨ ਤੇ ਦੋਸਤਾਂ ਨੂੰ ਮੈਸੇਜ ਭੇਜਣ ਲਈ ਕੈਲੀਫੋਰਨੀਆ 'ਚ 500 ਲੋਕਾਂ ਨੂੰ 2500 ਡਾਲਰ ਮਹੀਨੇ ਦੀ ਤਨਖਾਹ 'ਤੇ ਰੱਖਿਆ ਹੈ। ਰਿਪਬਲੀਕਨ ਪਾਰਟੀ ਦੇ ਆਰ ਐੱਨ ਸੀ ਰਿਸਰਚ ਵੱਲੋਂ ਜਾਰੀ ਅਧਿਕਾਰਤ ਵੀਡੀਓ 'ਤੇ ਟਵਿੱਟਰ ਨੇ ਪਾਬੰਦੀ ਲਗਾ ਦਿੱਤੀ ਹੈ। ਆਈ ਹੈਵ ਸੀਨ ਇਟ ਗੈਟਿੰਗ ਬੈਟਰ ਐਂਡ ਬੈਟਰ ਨਾਂਅ ਦੇ ਸਿਰਲੇਖ ਵਾਲੇ ਇਸ ਵੀਡੀਓ ਵਿੱਚ ਵਿਨਿਰਮਾਣ ਨਾਲ ਜੁੜੇ ਮਜ਼ਦੂਰ ਅਮਰੀਕੀ ਅਰਥਚਾਰੇ ਨੂੰ ਮਜ਼ਬੂਤ ਕਰਨ ਲਈ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਪ੍ਰਸ਼ੰਸਾ ਕਰ ਰਹੇ ਹਨ। ਵੀਡੀਓ 'ਤੇ ਪਾਬੰਦੀ ਲਗਾਏ ਜਾਣ 'ਤੇ ਟਰੰਪ ਜੂਨੀਅਰ ਬੁਰੀ ਤਰ੍ਹਾਂ ਭੜਕ ਗਏ ਹਨ। ਉਨ੍ਹਾਂ ਇਸ ਨੂੰ ਅਪਮਾਨਜਨਕ ਦੱਸਿਆ ਹੈ।