ਪੈਰਿਸ, 22 ਫਰਵਰੀ (ਪੋਸਟ ਬਿਊਰੋ)- ਅੱਤਵਾਦ ਦੀ ਪਨਾਹਗਾਹ ਪਾਕਿਸਤਾਨ ਦੀਆਂ ਸਾਰੀਆਂ ਪੈਂਤੜੇਬਾਜ਼ੀਆਂ ਇੱਕ ਵਾਰ ਫਿਰ ਫੇਲ ਸਾਬਿਤ ਹੋਈਆਂ ਹਨ। ਉਸ ਨੂੰ ਨਵੀਂ ਚਿਤਾਵਨੀ ਮਿਲ ਗਈ ਹੈ।
ਗਲੋਬਲ ਟੈਰਰ ਫੰਡਿੰਗ ਉੱਤੇ ਨਜ਼ਰ ਰੱਖਣ ਵਾਲੇ ਅਦਾਰੇ ਫਾਈਨਾਂਸ਼ੀਅਲ ਐਕਸ਼ਨ ਟਾਸਕ ਫੋਰਸ (ਐਫ ਏ ਟੀ ਐਫ) ਨੇ ਅੱਤਵਾਦ ਦੀ ਫੰਡਿੰਗ 'ਤੇ ਕਾਬੂ ਪਾਉਣ 'ਚ ਨਾਕਾਮੀ ਕਾਰਨ ਪਾਕਿਸਤਾਨ ਨੂੰ ਅਗਲੇ ਚਾਰ ਮਹੀਨਿਆਂ ਤੱਕ ਸ਼ੱਕੀ ਸੂਚੀ ਵਿੱਚ ਰੱਖਣ ਦਾ ਫ਼ੈਸਲਾ ਕੀਤਾ ਹੈ। ਐਫ ਏ ਟੀ ਐਫ ਨੇ ਨਾਲ ਹੀ ਪਾਕਿਸਤਾਨ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਜੇ ਉਹ ਅੱਤਵਾਦ ਵਿਰੋਧੀ ਕਦਮਾਂ ਸਮੇਤ 23 ਸੂਤਰੀ ਐਕਸ਼ਨ ਪਲਾਨ ਨੂੰ ਪੂਰਾ ਨਹੀਂ ਕਰਦਾ ਤਾਂ ਉਹ ਨੂੰ ਕਾਲੀ ਸੂਚੀ ਵਿੱਚ ਪਾ ਦਿੱਤਾ ਜਾਵੇਗਾ। ਇਹ ਫੈਸਲਾ ਐਫ ਏ ਟੀ ਐਫ ਦੇ ਕੌਮਾਂਤਰੀ ਸਹਿਯੋਗ ਗੁੱਪ (ਆਈ ਸੀ ਆਰ ਜੀ) ਦੀ ਬੈਠਕ 'ਚ ਲਿਆ ਗਿਆ। ਸੂਤਰਾਂ ਨੇ ਦੱਸਿਆ ਕਿ ਪਾਕਿਸਤਾਨ ਆਉਂਦੀ ਜੂਨ ਤੱਕ ‘ਸ਼ੱਕੀ ਸੂਚੀ' 'ਚ ਬਣਿਆ ਰਹੇਗਾ। ਐਫ ਏ ਟੀ ਐਫ ਨੇ ਆਪਣੇ ਮੈਬਰਾਂ ਨੂੰ ਪਾਕਿਸਤਾਨ ਦੇ ਸਾਰੇ ਕਾਰੋਬਾਰੀ ਰਿਸ਼ਤੇ ਅਤੇ ਵਿੱਤੀ ਲੈਣ ਦੇਣ 'ਤੇ ਨਜ਼ਰ ਰੱਖਣ ਨੂੰ ਵੀ ਕਿਹਾ ਹੈ।
ਪਾਕਿਸਤਾਨ ਦੀ ਇਮਰਾਨ ਖ਼ਾਨ ਦੀ ਅਗਵਾਈ ਵਾਲੀ ਸਰਕਾਰ ਨੇ ਜਨਤਾ ਨਾਲ ਵਾਅਦਾ ਕੀਤਾ ਸੀ ਕਿ ਉਹ ਫਰਵਰੀ ਵਿੱਚ ਐਫ ਏ ਟੀ ਐਫ ਦੀ ਸ਼ੱਕੀ ਸੂਚੀ 'ਚੋਂ ਬਾਹਰ ਨਿਕਲ ਜਾਵੇਗਾ। ਚੀਨ, ਮਲੇਸ਼ੀਆ ਅਤੇ ਤੁਰਕੀ (ਤਿੱਕੜੀ) ਦੀ ਮਦਦ ਨਾਲ ਪਾਕਿ ਇੱਕ ਵਾਰ ਫਿਰ ‘ਬਲੈਕਲਿਸਟ' ਹੋਣ ਤੋਂ ਬਚ ਗਿਆ ਪਰ ਉਸ ਨੂੰ ‘ਗ੍ਰੇ ਲਿਸਟ' ਤੋਂ ਬਚਾਉਣ ਲਈ 13 ਦੇਸ਼ਾਂ ਦੇ ਸਮਰਥਨ ਦੀ ਲੋੜ ਸੀ, ਜੋ ਉਸ ਨੂੰ ਨਹੀਂ ਮਿਲਿਆ।