ਓਨਟਾਰੀਓ, 21 ਫਰਵਰੀ (ਪੋਸਟ ਬਿਊਰੋ) : ਜਾਪਾਨ ਦੇ ਤੱਟ ਉੱਤੇ ਅਲੱਗ ਥਲੱਗ ਕਰਕੇ ਖੜ੍ਹਾਏ ਗਏ ਕੋਰੋਨਾਵਾਇਰਸ ਸੰਕ੍ਰਮਿਤ ਬੇੜੇ ਵਿੱਚ ਸਵਾਰ ਕੈਨੇਡੀਅਨਾਂ ਨੂੰ ਲੈ ਕੇ ਇੱਕ ਜਹਾਜ਼ ਕੈਨੇਡਾ ਪਰਤ ਆਇਆ ਹੈ। ਇਸ ਜਹਾਜ਼ ਵਿੱਚ ਵਾਪਿਸ ਲਿਆਂਦੇ ਗਏ ਕੈਨੇਡੀਅਨ ਕਿੰਨੇ ਕੁ ਸਿਹਤਮੰਦ ਹਨ ਇਸ ਦਾ ਜਾਇਜ਼ਾ ਕੈਨੇਡਾ ਦੇ ਉੱਘੇ ਸਿਹਤ ਅਧਿਕਾਰੀਆਂ ਵੱਲੋਂ ਲਾਇਆ ਜਾਵੇਗਾ।
ਸ਼ੁਰੂਆਤ ਵਿੱਚ ਸਰਕਾਰ ਨੇ ਆਖਿਆ ਸੀ ਕਿ ਜਾਪਾਨ ਤੋਂ ਕੈਨੇਡਾ ਲਿਆਂਦੇ ਜਾਣ ਵਾਲੇ ਨਾਗਰਿਕਾਂ ਨੂੰ 14 ਦਿਨ ਤੱਕ ਅਲੱਗ ਥਲੱਗ ਕਰਕੇ ਰੱਖਿਆ ਜਾਵੇਗਾ ਕਿਉਂਕਿ ਵਾਇਰਸ ਦੇ ਸਾਹਮਣੇ ਆਉਣ ਲਈ ਐਨੇ ਹੀ ਦਿਨਾਂ ਦਾ ਸਮਾਂ ਲੱਗਦਾ ਹੈ। ਸਿਹਤ ਮੰਤਰੀ ਪੈਟੀ ਹਾਜ਼ਦੂ ਨੇ ਵੀਰਵਾਰ ਨੂੰ ਆਖਿਆ ਕਿ ਇਨ੍ਹਾਂ ਯਾਤਰੀਆਂ ਨੂੰ ਜਾਪਾਨੀ ਅਧਿਕਾਰੀਆਂ ਵੱਲੋਂ ਪਹਿਲਾਂ ਜਾਂਚਿਆਂ ਜਾ ਚੱੁਕਿਆ ਹੈ ਇਸ ਲਈ ਇਸ ਦੀ ਸੰਭਾਵਨਾ ਜਿ਼ਆਦਾ ਹੈ ਕਿ ਕੈਨੇਡਾ ਪਰਤਣ ਉੱਤੇ ਇਨ੍ਹਾਂ ਕੈਨੇਡੀਅਨਾਂ ਨੂੰ ਜਲਦੀ ਛੱਡ ਦਿੱਤਾ ਜਾਵੇਗਾ। ਇਹ ਸਭ ਕੈਨੇਡਾ ਦੇ ਉੱਘੇ ਪਬਲਿਕ ਹੈਲਥ ਡਾਕਟਰਾਂ ਦੀ ਰਾਇ ਤੋਂ ਬਾਅਦ ਹੀ ਛੱਡਿਆ ਜਾਵੇਗਾ।
ਜਿਨ੍ਹਾਂ ਨੂੰ ਸਫਰ ਕਰਨ ਦੀ ਇਜਾਜ਼ਤ ਦਿੱਤੀ ਗਈ ਹੈ ਉਨ੍ਹਾਂ ਨੂੰ ਪੂਰਬੀ ਓਨਟਾਰੀਓ ਵਿੱਚ ਨਵ ਸੈਂਟਰ ਉੱਤੇ ਅਲੱਗ ਕਰਕੇ ਰੱਖਣ ਤੋਂ ਪਹਿਲਾਂ ਕੈਨੇਡੀਅਨ ਸੈਨਾਵਾਂ ਦੇ ਟ੍ਰੈਂਟਨ ਸਥਿਤ ਟਿਕਾਣੇ ੳੱੁਤੇ ਪਹੁੰਚਣ ਉੱਤੇ ਮੁੜ ਜਾਂਚਿਆ ਜਾਵੇਗਾ। ਹਰੇਕ ਯਾਤਰੀ ਨੂੰ ਯੋਕੋਹਾਮਾ ਵਿੱਚ ਖੜ੍ਹੇ ਬੇੜੇ ਵਿੱਚੋਂ ਨਿਕਲਣ ਤੇ ਟੋਕੀਓ ਦੇ ਹਾਨੇਦਾ ਏਅਰਪੋਰਟ ਪਹੁੰਚਣ ਲਈ ਸਰਕਾਰ ਵੱਲੋਂ ਜਾਰੀ ਕੀਤਾ ਗਿਆ ਫੇਸਮਾਸਕ ਦਿੱਤਾ ਗਿਆ ਹੈ ਤੇ ਰੰਗਦਾਰ ਰਿਸਟਬੈਂਡ ਵੀ ਦਿੱਤਾ ਗਿਆ ਹੈ।
ਜਿਹੜੇ 47 ਕੈਨੇਡੀਅਨ ਪਹਿਲਾਂ ਹੀ ਇਸ ਵਾਇਰਸ ਦੀ ਚਪੇਟ ਵਿੱਚ ਆ ਗਏ ਹਨ ਤੇ ਜਿਨ੍ਹਾਂ ਦੇ ਟੈਸਟ ਕੋਵਿਡ-19 ਦੇ ਸਬੰਧ ਵਿੱਚ ਪਾਜ਼ੀਟਿਵ ਆਏ ਹਨ ਉਨ੍ਹਾਂ ਨੂੰ ਇਲਾਜ ਲਈ ਜਾਪਾਨ ਵਿੱਚ ਹੀ ਰੱਖਿਆ ਜਾਵੇਗਾ।