ਲੰਡਨ, 20 ਫਰਵਰੀ, (ਪੋਸਟ ਬਿਊਰੋ)- ਸੈਂਟਰਲ ਲੰਡਨ ਦੀ ਇਕ ਮਸਜਿਦ ਵਿਚ ਅੱਜ ਚਾਕੂ ਨਾਲ ਹਮਲਾ ਕੀਤਾ ਗਿਆ ਹੈ, ਜਿਸ ਵਿਚ 70 ਸਾਲ ਦਾ ਇਕ ਬਜ਼ੁਰਗ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਿਆ। ਹਮਲੇ ਦੇ ਸ਼ੱਕੀ ਹਮਲਾਵਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਇਹ ਹਮਲਾ ਰੀਜੈਂਟ ਪਾਰਕ ਨੇੜੇ ਲੰਡਨ ਸੈਂਟਰਲ ਦੀ ਮਸਜਿਦ ਵਿਚ ਅੱਜ ਵੀਰਵਾਰ ਬਾਅਦ ਦੋਪਹਿਰ ਕੀਤਾ ਗਿਆ। ਜ਼ਖਮੀ ਵਿਅਕਤੀ ਨੂੰ ਐਮਰਜੰਸੀ ਸੇਵਾਵਾਂ ਨੇ ਹਸਪਤਾਲ ਪੁਚਾਇਆ ਹੈ ਤੇ ਉਹ ਖਤਰੇ ਤੋਂ ਬਾਹਰ ਹੈ। ਕੇਸ ਦੀ ਜਾਂਚ ਚੱਲ ਰਹੀ ਹੈ ਅਤੇ ਘਟਨਾ ਵਾਲੀ ਥਾਂ ਉੱਤੇ ਪੁਲਸ ਮੌਜੂਦ ਹੈ।
ਹਮਲੇ ਤੋਂ ਬਾਅਦ ਮਸਜਿਦ ਦੇ ਅੰਦਰ ਦੀਆਂ ਤਸਵੀਰਾਂ ਨੂੰ ਦੇਖ ਕੇ ਪਤਾ ਲੱਗਦਾ ਹੈ ਕਿ ਪੁਲਸ ਅਧਿਕਾਰੀਆਂ ਨੇ ਇਕ ਲਾਲ ਰੰਗ ਦੀ ਹੂਡੀ ਅਤੇ ਜੀਨਸ ਵਾਲੇ ਵਿਅਕਤੀ ਨੂੰ ਹੇਠਾਂ ਧੱਕਾ ਦੇ ਕੇ ਉਸ ਨੇ ਨੱਪ ਲਿਆ। ਤਸਵੀਰਾਂ ਵਿਚ ਉਹ ਆਦਮੀ ਨੰਗੇ ਪੈਰੀਂ ਦਿੱਸਦਾ ਹੈ। ਇਕ ਵੀਡੀਓ ਵਿਚ ਇਕ ਪਲਾਸਟਿਕ ਦੀ ਕੁਰਸੀ ਦੇ ਹੇਠਾਂ ਜ਼ਮੀਨ ਉੱਤੇ ਚਾਕੂ ਰੱਖਿਆ ਵੀ ਦਿੱਸਦਾ ਹੈ। ਇਸ ਹਮਲੇ ਦੇ ਇੱਕ ਚਸ਼ਮਦੀਦ ਅਬੀ ਤਾਵਿਕ ਨੇ ਕਿਹਾ ਕਿ ਸ਼ੱਕੀ ਹਮਲਾਵਰ ਪਿਛਲੇ ਕਈ ਮਹੀਨਿਆਂ ਤੋਂ ਰੋਜ਼ ਇਸ ਮਸਜਿਦ ਵਿਚ ਆਉਂਦਾ ਸੀ। ਉਨ੍ਹਾਂ ਦੱਸਿਆ ਕਿ ਉਹ ਜ਼ਖਮੀ ਹੋਏ ਬਜ਼ੁਰਗ ਦੇ ਪਿੱਛੇ ਖੜ੍ਹੋ ਕੇ ਨਮਾਜ ਪੜ੍ਹ ਰਿਹਾ ਸੀ ਅਤੇ ਅਚਾਨਕ ਉਸ ਨੇ ਉਨ੍ਹਾਂ ਨੂੰ ਚਾਕੂ ਮਾਰ ਦਿੱਤਾ।
ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਨੇ ਟਵੀਟ ਕਰ ਕੇ ਕਿਹਾ ਕਿ ਮੈਂ ਲੰਡਨ ਸੈਂਟਰਲ ਮਸਜਿਦ ਵਿਚ ਹੋਏ ਹਮਲੇ ਬਾਰੇ ਵਿਚ ਸੁਣ ਕੇ ਬੇਹੱਦ ਦੁਖੀ ਹਾਂ। ਇਹ ਬਹੁਤ ਚਿੰਤਾਜਨਕ ਹੈ। ਜ਼ਖਮੀਆਂ ਤੇ ਹਮਲੇ ਵਿਚ ਪ੍ਰਭਾਵਤ ਲੋਕਾਂ ਨਾਲ ਮੇਰੀਆਂ ਭਾਵਨਾਵਾਂ ਹਨ। ਮੁਸਲਿਮ ਕੌਂਸਲ ਆਫ ਬ੍ਰਿਟੇਨ ਦੇ ਮਿਕਦਾਦ ਵਰਸੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਮਸਜਿਦ ਦੇ ਅੰਦਰ ਮੌਜੂਦ ਲੋਕਾਂ ਤੋਂ ਪਤਾ ਲੱਗਾ ਕਿ ਹਮਲਾ ਓਦੋਂ ਹੋਇਆ, ਜਦੋਂ ਦੁਪਹਿਰ ਦੀ ਨਮਾਜ਼ ਦੀਆਂ ਤਿਆਰੀਆਂ ਚੱਲ ਰਹੀਆਂ ਸਨ। ਉਨ੍ਹਾਂ ਕਿਹਾ ਕਿ ਬੀਤੇ ਦਿਨੀਂ ਹੋਏ ਹਮਲਿਆਂ ਕਾਰਨ ਮੁਸਲਮਾਨ ਖਤਰੇ ਵਿਚ ਮਹਿਸੂਸ ਕਰਦੇ ਹਨ।