ਨਵੀਂ ਦਿੱਲ਼ੀ, 20 ਫਰਵਰੀ, (ਪੋਸਟ ਬਿਊਰੋ)- ਦੱਖਣੀ ਦਿੱਲੀ ਦੇ ਸ਼ਾਹੀਨ ਬਾਗ ਵਿੱਚ ਪ੍ਰਦਰਸ਼ਨ ਕਰਨ ਵਾਲੇ ਲੋਕਾਂ ਨਾਲ ਗੱਲਬਾਤ ਕਰਨ ਲਈ ਸੁਪਰੀਮ ਕੋਰਟ ਵੱਲੋਂ ਨਿਯੁਕਤ ਕੀਤੇ ਵਾਰਤਾਕਾਰ ਅੱਜ ਫਿਰ ਪਹੁੰਚੇ। ਉਹ ਇਨ੍ਹਾਂ ਲੋਕਾਂ ਨਾਲ ਗੱਲ ਕਰਨ ਲਈ ਲਗਾਤਾਰ ਕੋਸ਼ਿਸ਼ ਕਰ ਰਹੇ ਹਨ। ਇਸ ਦੌਰਾਨ ਇੱਕ ਵਾਰਤਾਕਾਰ ਨੇ ਉਨ੍ਹਾਂ ਨੂੰ ਚਿਤਾਵਨੀ ਵਾਲੇ ਲਹਿਜ਼ੇ ਵਿੱਚ ਕਿਹਾ ਕਿ ਜੇ ਤੁਹਾਡਾ ਇਹੀ ਵਤੀਰਾ ਰਿਹਾ ਤਾਂ ਅਸੀਂ ਕਲ੍ਹ ਤੋਂ ਨਹੀਂ ਆਵਾਂਗੇ।
ਅੱਜ ਦੀ ਗੱਲਬਾਤ ਵੇਲੇ ਜਦੋਂ ਵਾਰਤਾਕਾਰ ਇਹ ਕਹਿ ਰਹੇ ਸਨ ਕਿ ਆਮ ਲੋਕਾਂ ਲਈ ਸੜਕ ਖੋਲ੍ਹ ਦੇਣੀ ਚਾਹੀਦੀ ਹੈ ਤਾਂ ਇਕ ਪ੍ਰਦਰਸ਼ਨਕਾਰੀ ਰੋਣ ਲੱਗ ਗਿਆ। ਉਸ ਨੇ ਕਿਹਾ ਕਿ ਰੋਡ ਖੋਲ੍ਹਣ ਦੀ ਪਟੀਸ਼ਨ ਨਹੀਂ ਹੋਣੀ ਚਾਹੀਦੀ। ਇਸ ਉੱਤੇ ਵਾਰਤਾਕਾਰ ਸਾਧਨਾ ਰਾਮਚੰਦਰਨ ਨੇ ਨਰਾਜ਼ਗੀ ਪ੍ਰਗਟਾਈ ਤੇ ਕਿਹਾ ਕਿ ਤੁਸੀਂ ਕਿਹੋ ਜਿਹੇ ਨਾਗਰਿਕ ਹੋ, ਦੂਸਰਿਆਂ ਦੇ ਹੱਕ ਉੱਤੇ ਟਿੱਪਣੀ ਕਰਦੇ ਹੋ। ਰਾਮਚੰਦਰਨ ਨੇ ਕਿਹਾ ਅਸੀਂ ਇੱਥੇ ਸਿਰਫ ਇਸ ਉੱਤੇ ਗੱਲ਼ ਕਰਨ ਆਏ ਹਾਂ ਕਿ ਸੜਕ ਖੁੱਲ੍ਹਣੀ ਚਾਹੀਦੀ ਹੈ ਜਾਂ ਨਹੀਂ। ਦੂਸਰੇ ਵਾਰਤਕਾਰ ਸੰਜੇ ਹੇਗੜੇ ਨੇ ਕਿਹਾ ਕਿ ਸੁਪਰੀਮ ਕੋਰਟ ਨੇ ਆਖਿਆ ਹੈ ਕਿ ਸ਼ਾਹੀਨ ਬਾਗ ਇਸ ਦੇਸ਼ ਲਈ ਮਿਸਾਲ ਬਣਨੀ ਚਾਹੀਦੀ ਹੈ, ਲੋਕਾਂ ਦੀ ਪਰੇਸ਼ਾਨੀ ਮਿਲ ਕੇ ਦੂਰ ਕਰਾਂਗੇ। ਉਨ੍ਹਾਂ ਕਿਹਾ ਕਿ ਪ੍ਰੋਟੈਸਟ ਜਾਰੀ ਰਹੇ, ਪਰ ਰਸਤਾ ਖੋਲ੍ਹ ਦਿੱਤਾ ਜਾਵੇ। ਇਸ ਦਾ ਜਵਾਬ ਲੋਕਾਂ ਨੇ ਨਾ ਵਿੱਚ ਦਿੱਤਾ। ਇਸ ਉੱਤੇ ਸੰਜੇ ਹੇਗੜੇ ਨੇ ਕਿਹਾ ਕਿ ਸੁਪਰੀਮ ਕੋਰਟ ਦੇ ਰਹਿੰਦਿਆਂ ਤੁਹਾਡੇ ਪ੍ਰਦਰਸ਼ਨ ਨੂੰ ਕੋਈ ਪਰੇਸ਼ਨੀ ਨਹੀਂ ਆਵੇਗੀ।
ਵਾਰਤਾਕਾਰ ਸਾਧਨਾ ਰਾਮਚੰਦਰਨ ਨੇ ਪ੍ਰਦਰਸ਼ਨ ਕਰਨ ਵਾਲਿਆਂ ਨੂੰ ਪੁੱਛਿਆ ਕਿ ਕੀ ਇਹ ਰਾਹ ਖੁੱਲ੍ਹ ਸਕਦਾ ਹੈ। ਇਸ ਉੱਤੇ ਲੋਕਾਂ ਦਾ ਜਵਾਬ ਨਾਂਹ ਵਿੱਚ ਰਿਹਾ ਤਾਂ ਸਾਧਨਾ ਰਾਮਚੰਦਰਨ ਨੇ ਪੁੱਛਿਆ ਕੀ ਇਹ ਹੋ ਸਕਦਾ ਹੈ ਕਿ ਧਰਨਾ ਵੀ ਚੱਲਦਾ ਰਹੇ ਤੇ ਰਸਤਾ ਖੁੱਲ਼੍ਹ ਜਾਵੇ। ਅਸੀਂ ਇੱਥੇ ਨਾਗਰਿਕਤਾ ਸੋਧ ਕਾਨੂੰਨ ਅਤੇ ਐੱਨ ਆਰ ਸੀ ਦੀ ਗੱਲ ਕਰਨ ਨਹੀਂ ਆਏ, ਅਸੀਂ ਸਿਰਫ ਇਸ ਬਾਰੇ ਗੱਲ਼ ਕਰਾਂਗੇ ਕਿ ਕੀ ਸਭ ਦੀਆਂ ਸਮੱਸਿਆਵਾਂ ਦਾ ਹੱਲ ਨਹੀਂ ਹੋ ਸਕਦਾ।
ਵਰਨਣ ਯੋਗ ਹੈ ਕਿ ਨਾਗਰਿਕਤਾ ਸੋਧ ਕਾਨੂੰਨ ਤੇ ਰਾਸ਼ਟਰੀ ਨਾਗਰਿਕਤਾ ਰਜਿਸਟਰ (ਐੱਨ ਸੀ ਆਰ) ਦੇ ਵਿਰੋਧ ਵਿੱਚ ਸ਼ਾਹੀਨ ਬਾਗ ਵਿੱਚ 15 ਦਸੰਬਰ ਤੋਂ ਸ਼ੁਰੂ ਹੋਇਆ ਧਰਨਾ ਅੱਜ 66ਵੇਂ ਦਿਨ ਜਾਰੀ ਰਿਹਾ ਹੈ। ਇਸ ਪ੍ਰਦਰਸ਼ਨ ਨਾਲ ਦਿੱਲ਼ੀ ਤੋਂ ਨੋਇਡਾ ਨੂੰ ਜੋੜਨ ਵਾਲਾ ਰਸਤਾ ਪਿਛਲੇ ਦੋ ਮਹੀਨੇ ਤੋਂ ਵੀ ਵੱਧ ਸਮੇਂ ਤੋਂ ਬੰਦ ਹੈ ਤੇ ਵਾਹਨ ਚਾਲਕਾਂ ਨੂੰ ਕਾਫੀ ਲੰਮਾ ਮੋੜਾ ਕੱਟ ਕੇ ਆਉਣ ਦੀ ਪਰੇਸ਼ਾਨੀ ਹੋ ਰਹੀ ਹੈ।