ਹਿੰਦੀ ਸਿਨੇਮਾ ਲਗਾਤਾਰ ਪ੍ਰਸੰਗਿਕ ਅਤੇ ਨਵੇਂ ਮੁੱਦਿਆਂ ਨੂੰ ਖਾਸ ਤੌਰ 'ਤੇ ਉਠਾ ਰਿਹਾ ਹੈ। ਤਾਜ਼ਾ ਮਿਸਾਲ ਅਨੁਭਵ ਸਿਨਹਾ ਦੇ ਨਿਰਦੇਸ਼ਨ ਵਾਲੀ ਫਿਲਮ ‘ਥੱਪੜ’ ਹੈ। ਉਸ ਵਿੱਚ ਔਰਤਾਂ ਦੇ ਸਨਮਾਨ ਦਾ ਮੁੱਦਾ ਉਠਾਇਆ ਗਿਆ ਹੈ। ਕੇਂਦਰੀ ਮੰਤਰੀ ਸਮ੍ਰਿਤੀ ਇਰਾਨੀ ਨੇ ਤਾਪਸੀ ਪੰਨੂ ਦੀ ਫਿਲਮ ‘ਥੱਪੜ’ ਬਾਰੇ ਸੋਸ਼ਲ ਮੀਡੀਆ ਉੱਤੇ ਅਹਿਮ ਸਵਾਲ ਪੁੱਛੇ ਹਨ। ‘ਥੱਪੜ' ਦੇ ਟਰੇਲਰ ਨੂੰ ਸੋਸ਼ਲ ਮੀਡੀਆ 'ਤੇ ਸਾਂਝਾ ਕਰਦੇ ਹੋਏ ਸਮ੍ਰਿਤੀ ਨੇ ਲਿਖਿਆ, ‘ਕਿੰਨੇ ਲੋਕਾਂ ਨੇ ਸੁਣਿਆ ਹੈ ਕਿ ਔਰਤ ਨੂੰ ਹੀ ਐਡਜਸਟ ਕਰਨਾ ਪੈਂਦਾ ਹੈ? ਕਿੰਨੇ ਲੋਕ ਸੋਚਦੇ ਹਨ ਕਿ ਮਾਰ-ਕੁਟ ਸਿਰਫ ਗਰੀਬ ਔਰਤਾਂ ਦੇ ਪਤੀ ਕਰਦੇ ਹਨ? ਕਿੰਨੇ ਲੋਕ ਮੰਨਦੇ ਹਨ ਕਿ ਪੜ੍ਹਿਆ ਲਿਖਿਆ ਆਦਮੀ ਕਦੇ ਹੱਥ ਨਹੀਂ ਚੁੱਕਦਾ? ਕਿੰਨੇ ਲੋਕ ਆਪਣੀਆਂ ਲੜਕੀਆਂ ਅਤੇ ਨੂੰਹਾਂ ਨੂੰ ਕਹਿੰਦੇ ਹਨ ਕਿ ਕੋਈ ਗੱਲ ਨਹੀਂ ਬੇਟਾ, ਅਜਿਹਾ ਤਾਂ ਸਾਡੇ ਨਾਲ ਵੀ ਹੋਇਆ ਹੈ, ਪਰ ਦੇਖੋ ਅੱਜ ਅਸੀਂ ਕਿੰਨੇ ਖੁਸ਼ ਹਾਂ? ਮੈਂ ਸ਼ਾਇਦ ਨਿਰਦੇਸ਼ਕ ਦੀ ਰਾਜਸੀ ਵਿਚਾਰਧਾਰਾ ਦਾ ਸਮਰਥਨ ਨਾ ਕਰਾਂ ਜਾਂ ਕੁਝ ਅਭਿਨੇਤਾਵਾਂ ਤੋਂ ਕੁਝ ਮੁੱਦਿਆਂ ਬਾਰੇ ਅਸਹਿਮਤ ਰਹਾਂ, ਪਰ ਇਹ ਇੱਕ ਅਜਿਹੀ ਕਹਾਣੀ ਹੈ, ਜਿਸ ਨੂੰ ਮੈਂ ਪੱਕਾ ਦੇਖਾਂਗੀ ਅਤੇ ਉਮੀਦ ਕਰਾਂਗੀ ਕਿ ਲੋਕ ਇਸ ਨੂੰ ਆਪਣੇ ਪਰਵਾਰ ਦੇ ਨਾਲ ਦੇਖਣ।’ ਸਮ੍ਰਿਤੀ ਨੇ ਅੱਗੇ ਲਿਖਿਆ, ‘ਇੱਕ ਔਰਤ ਨੂੰ ਮਾਰਨਾ ਸਹੀ ਨਹੀਂ ਹੈ, ਇੱਕ ਵੀ ਥੱਪੜ ਨਹੀਂ।’ ਤਾਪਸੀ ਨੇ ਸਮ੍ਰਿਤੀ ਦਾ ਸ਼ੁਕਰੀਆ ਅਦਾ ਕਰਦੇ ਹੋਏ ਲਿਖਿਆ ਹੈ ਕਿ ਸਾਨੂੰ ਤੁਹਾਨੂੰ ਇਹ ਫਿਲਮ ਦਿਖਾ ਕੇ ਖੁਸ਼ੀ ਹੋਵੇਗੀ। ਮੈਂ ਖੁਸ਼ ਹਾਂ ਕਿ ਇਸ ਮੁੱਦੇ ਬਾਰੇ ਅਸੀਂ ਸਭ ਇਕੱਠੇ ਹਾਂ।
ਅਨੁਭਵ ਸਿਨਹਾ ਨੇ ਲਿਖਿਆ, ‘ਸਮ੍ਰਿਤੀ ਜੀ, ਕਈ ਵਾਰ ਜਦ ਅਸਹਿਮਤੀ ਨੂੰ ਨਾਜਾਇਜ਼ ਕਰਾਰ ਦਿੱਤਾ ਜਾਂਦਾ ਹੈ ਤਾਂ ਕਹਾਣੀ ਦੇ ਪ੍ਰਤੀ ਤੁਹਾਡੀ ਮਾਨਤਾ ਅਤੇ ਫਿਲਮ ਨਿਰਮਾਤਾ ਦੀ ਮੰਸ਼ਾ, ਰਾਜਨੀਤਕ ਅਸਹਿਮਤੀ ਤੋਂ ਉਪਰ ਉਠ ਜਾਂਦੀ ਹੈ। ਮੈਂ ਤੁਹਾਡੇ ਇਸ ਸਨੇਹ ਭਰੇ ਸ਼ਬਦਾਂ ਲਈ ਹਾਰਦਿਕ ਸਨਮਾਨ ਤੇ ਧੰਨਵਾਦ ਕਰਦਾ ਹਾਂ।” ਅਨੁਭਵ ਨੇ ਇਹ ਵੀ ਕਿਹਾ ਕਿ ਫਿਲਮ ਬਣ ਜਾਣ ਪਿੱਛੋਂ ਉਹ ਇਸ ਨੂੰ ਸਮ੍ਰਿਤੀ ਨੂੰ ਉਸ ਦੇ ਸਮੇਂ ਦੀ ਸਹੂਲਤ ਮੁਤਾਬਕ ਦਿਖਾਉਣਗੇ। ਇਸ ਦੇ ਲਈ ਉਹ ਉਨ੍ਹਾਂ ਦੇ ਦਫਤਰ ਦੇ ਲੋਕਾਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕਰਨਗੇ। ਫਿਲਮ 28 ਫਰਵਰੀ ਨੂੰ ਰਿਲੀਜ਼ ਹੋਵੇਗੀ।