ਆਯੁਸ਼ਮਾਨ ਖੁਰਾਣਾ ਆਮ ਜ਼ਿੰਦਗੀ ਦੀਆਂ ਦਿੱਕਤਾਂ ਨਾਲ ਜੂਝਦੇ ਲੋਕਾਂ ਦੀਆਂ ਕਹਾਣੀਆਂ ਫਿਲਮਾਂ ਵਿੱਚ ਦਿਖਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਉਨ੍ਹਾਂ ਦੀ ਅਗਲੀ ਫਿਲਮ ‘ਸ਼ੁਭ ਮੰਗਲ ਜ਼ਿਆਦਾ ਸਾਵਧਾਨ’ ਸਮਲਿੰਗਤਾ ਉੱਤੇ ਹੈ। ਪਹਿਲੀ ਵਾਰ ਉਹ ਸਮਲਿੰਗੀ ਦਾ ਕਿਰਦਾਰ ਨਿਭਾਉਣਗੇ। ਇਸ ਫਿਲਮ ਦੇ ਟ੍ਰੇਲਰ ਵਿੱਚ ਇੱਕ ਜਗ੍ਹਾ ਆਯੁਸ਼ਮਾਨ ਸੁਪਰ ਹੀਰੋ ਦੇ ਕੱਪੜਿਆਂ ਵਿੱਚ ਨਜ਼ਰ ਆ ਰਹੇ ਹਨ। ਇਨ੍ਹੀਂ ਦਿਨੀਂ ਸੁਪਰ ਹੀਰੋ ਵਾਲੀਆਂ ਫਿਲਮਾਂ ਕਈ ਹੀਰੋਜ਼ ਕਰਨਾ ਚਾਹੁੰਦੇ ਹਨ, ਪਰ ਆਯੁਸ਼ਮਾਨ ਨੂੰ ਸੁਪਰ ਹੀਰੋ ਬਣਨ ਵਿੱਚ ਕੋਈ ਦਿਲਚਸਪੀ ਨਹੀਂ ਹੈ।
ਆਯੂਸ਼ਮਾਨ ਦਾ ਕਹਿਣਾ ਹੈ ਕਿ ਉਹ ਅਸਲੀਅਤ ਵਿੱਚ ਯਕੀਨ ਰੱਖਦੇ ਹਨ। ਉਸ ਦਾ ਕਹਿਣਾ ਹੈ ਕਿ ਉਹ ਆਮ ਆਦਮੀ ਨੂੰ ਸੁਪਰ ਹੀਰੋ ਵਾਂਗ ਪੇਸ਼ ਕਰਨਾ ਵੱਧ ਜ਼ਰੂਰੀ ਮੰਨਦੇ ਹਨ। ਉਸ ਦੇ ਮੁਤਾਬਕ ਸੁਪਰ ਹੀਰੋ ਵਾਲੀਆਂ ਫਿਲਮਾਂ ਕਰਨ ਤੋਂ ਵੱਧ ਆਮ ਆਦਮੀ ਦਾ ਆਤਮ ਵਿਸ਼ਵਾਸ ਵਧਾਉਣਾ ਜ਼ਰੂਰੀ ਹੈ। ਆਮ ਇਨਸਾਨ ਹੀਰੋ ਨੂੰ ਦੇਖ ਕੇ ਸੋਚਦਾ ਹੈ ਕਿ ਉਸ ਦੇ ਸਿਕਸ ਪੈਕ ਐਬਸ ਹਨ, ਉਹ ਕਲਾਬਾਜ਼ੀਆਂ ਲਾਉਂਦਾ ਹੈ, ਦਸ ਲੜਕਿਆਂ ਦੇ ਨਾਲ ਇਕੱਲੇ ਮੁਕਾਬਲਾ ਕਰਦਾ ਹੈ, ਪਰ ਇਹ ਅਸਲੀਅਤ ਵਿੱਚ ਨਹੀਂ ਹੁੰਦਾ। ਆਮ ਆਦਮੀ ਬਹੁਤ ਔਕੜਾਂ ਨਾਲ ਜੁੜਿਆ ਹੁੰਦਾ ਹੈ। ਉਨ੍ਹਾਂ ਕੰਪਲੈਕਸਿਸ ਨੂੰ ਉਹ ਾਪਣੀਆਂ ਫਿਲਮਾਂ ਰਾਹੀਂ ਦਿਖਾਉਣਾ ਚਾਹੰੁਦੇ ਹਨ।