ਬਾਪੌਲੀ, 17 ਫਰਵਰੀ (ਪੋਸਟ ਬਿਊਰੋ)- ਅਫਸਰਾਂ ਦੇ ਭੁੱਲ ਜਾਣ ਦੀਆਂ ਕਈ ਕਹਾਣੀਆਂ ਆਉਂਦੀਆਂ ਹਨ। ਇਸ ਵਾਰ ਇੱਕ ਕਰਮਚਾਰੀ ਨੂੰ ਰਿਟਾਇਰ ਕਰਨਾ ਭੁੱਲ ਜਾਣ ਦਾ ਮਾਮਲਾ ਪਤਾ ਲੱਗਾ ਹੈ।
ਬਾਪੌਲੀ ਬੀ ਡੀ ਪੀ ਓ ਦਫਤਰ ਵਿੱਚ ਚੌਥਾ ਦਰਜਾ ਕਰਮਚਾਰੀ (ਚਪੜਾਸੀ) ਹੇਮਰਾਜ ਨੇ 31 ਮਾਰਚ 2019 ਨੂੰ ਰਿਟਾਇਰ ਹੋਣਾ ਸੀ, ਪਰ ਉਹ ਹਾਲੇ ਤੱਕ ਸੇਵਾ ਵਿੱਚ ਹੈ। ਉਹ ਦਫਤਰ ਆਉਂਦਾ ਰਿਹਾ ਅਤੇ ਤਨਖਾਹ ਲੈਂਦਾ ਰਿਹਾ। ਉਸ ਦੇ ਬਾਰ ਅਚਾਨਕ ਗਲਤੀ ਦਾ ਪਤਾ ਲੱਗਾ ਤਾਂ ਅਫਸਰਾਂ ਨੇ ਗਲਤੀ ਮੰਨਣ ਦੀ ਥਾਂ ਇਹ ਦਾਅਵਾ ਕੀਤਾ ਕਿ ਜੋ ਤਨਖਾਹ ਕਰਮਚਾਰੀ ਨੇ ਵਾਧੂ ਲਈ ਹੈ, ਉਸ ਨੂੰ ਪੈਨਸ਼ਨ 'ਚੋਂ ਕੱਟੀ ਜਾਵੇਗੀ, ਪਰ ਕਰਮਚਾਰੀ ਹੇਮਰਾਜ ਦਾ ਕਹਿਣਾ ਹੈ ਕਿ ਉਸ ਦੀ ਇਸ ਵਿੱਚ ਕੀ ਗਲਤੀ ਹੈ, ਉਹ ਕੰਮ 'ਤੇ ਆਇਆ ਅਤੇ ਬਦਲੇ ਵਿੱਚ ਤਨਖਾਹ ਮਿਲੀ ਸੀ।
ਇਸ ਕਾਰਨ ਜਨਵਰੀ ਮਹੀਨੇ ਦੀ ਵੀ ਤਨਖਾਹ ਉਸ ਨੂੰ ਨਹੀਂ ਮਿਲੀ। ਹੇਮਰਾਜ ਨੇ ਕਿਹਾ ਕਿ ਗਲਤੀ ਅਫਸਰਾਂ ਨੇ ਕੀਤੀ ਹੈ, ਜਿਨ੍ਹਾਂ ਨੇ ਸਰਵਿਸ ਬੁੱਕ ਵਿੱਚ ਰਿਕਾਰਡ ਨਹੀਂ ਰੱਖਿਆ। ਉਸ ਨੂੰ 13 ਜਨਵਰੀ ਨੂੰ ਸਰਵਿਸ ਬੁਕ ਮਿਲੀ, ਉਸ ਨੂੰ ਦੋ ਹਜ਼ਾਰ ਰੁਪਏ ਵਿੱਚ ਤਿਆਰ ਕਰਵਾ ਕੇ 13 ਫਰਵਰੀ ਨੂੰ ਅਫਸਰਾਂ ਨੂੰ ਦਿੱਤੀ, ਪਰ ਉਸ ਨੂੰ ਵਿਭਾਗ ਨੇ ਅੱਗੇ ਨਹੀਂ ਭੇਜਿਆ। ਕਰਮਚਾਰੀਆਂ ਦੀ ਸੇਵਾ ਦੀ ਕਾਪੀ ਅਧਿਕਾਰੀਆਂ ਦੇ ਕੋਲ ਰਹਿੰਦੀ ਹੈ। ਕੌਣ ਕਦੋਂ ਰਿਟਾਇਰ ਹੋ ਰਿਹਾ ਹੈ, ਇਹ ਉਨ੍ਹਾਂ ਦੀ ਜ਼ਿੰਮੇਵਾਰੀ ਹੈ। ਨਿਯਮਾਂ ਅਨੁਸਾਰ ਕਰਮਚਾਰੀ ਦੀ ਉਚ ਅਧਿਕਾਰੀ ਵੱਲੋਂ ਸਰਵਿਸ ਬੁਕ ਲਿਖੀ ਜਾਂਦੀ ਹੈ। ਇਸ ਵਿੱਚ ਕਰਮਚਾਰੀ ਦਾ ਪੂਰਾ ਡਾਟਾ ਹੁੰਦਾ ਹੈ ਕਿ ਕਿਸ ਨੇ ਕਦੋਂ ਰਿਟਾਇਰ ਹੋਣਾ ਹੈ। ਉਸੇ ਆਧਾਰ 'ਤੇ ਸਰਵਿਸ ਬੁਕ ਸਮੇਂ-ਸਮੇਂ 'ਤੇ ਅਪਡੇਟ ਹੁੰਦੀ ਹੈ, ਪਰ ਇਸ ਕੇਸ ਵਿੱਚ ਸਰਵਿਸ ਬੁਕ ਦਾ ਰਿਕਾਰਡ ਹੀ ਅਫਸਰਾਂ ਨੇ ਨਹੀਂ ਰੱਖਿਆ।