ਜਲੰਧਰ, 17 ਫਰਵਰੀ (ਪੋਸਟ ਬਿਊਰੋ)- ਸਾਧੂ ਦੇ ਭੇਸ ਵਿੱਚ ਠੱਗ ਨੇ ਆਪਣੇ ਤਿੰਨ ਸਾਥੀਆਂ ਦੇ ਨਾਲ ਮਿਲ ਕੇ ਗੋਪਾਲ ਨਗਰ ਦੀ ਮਹਿਲਾ ਨੀਲਮ ਦੇ ਚਾਰ-ਚਾਰ ਤੋਲੇ ਦੇ ਦੋ ਸੋਨੇ ਦੇ ਕੰਗਣ ਲੁੱਟ ਲਏ।
ਪਤਾ ਲੱਗਾ ਹੈ ਕਿ ਸੋਨੇ ਦੇ ਕੰਗਨ ਲੈ ਕੇ ਠੱਗ ਨੇ ਮਹਿਲਾ ਦੇ ਰੁਮਾਲ ਵਿੱਚ ਬੱਜਰੀ ਪਾ ਕੇ ਕਿਹਾ, ਇਸ ਨੂੰ ਇਥੇ ਨਹੀਂ, ਆਪਣੇ ਘਰ ਜਾ ਕੇ ਮੰਦਰ ਵਿੱਚ ਖੋਲ੍ਹ ਕੇ ਦੇਖਣਾ, ਖੂਬ ਕਿਰਪਾ ਹੋਵੇਗੀ। ਠੱਗ ਦੀਆਂ ਗੱਲਾਂ ਵਿੱਚ ਆਈ ਮਹਿਲਾ ਨੇ ਘਰ ਪਹੁੰਚ ਕੇ ਰੁਮਾਲ ਦੇਖਿਆ ਤਾਂ ਉਸ ਵਿੱਚ ਬਜਰੀ ਅਤੇ ਅਖਬਾਰੀ ਕਾਗਜ਼ ਦੇ ਟੁੱਕੜੇ ਸਨ। ਨੀਲਮ ਨੇ ਥਾਣਾ ਦੋ ਦੀ ਪੁਲਸ ਨੂੰ ਸ਼ਿਕਾਇਤ ਕੀਤੀ ਹੈ। ਇਹ ਮਾਮਲਾ ਵਰਕਸ਼ਾਪ ਚੌਕ ਦੇ ਨੇੜੇ ਸ਼ਨੀਵਾਰ ਦੁਪਹਿਰ ਦਾ ਹੈ। ਨੀਲਮ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਵਰਕਸ਼ਾਪ ਚੌਕ ਦੇ ਨੇੜੇ ਆਟੋ 'ਚੋਂ ਉਤਰ ਕੇ ਘਰ ਜਾ ਰਹੀ ਸੀ। ਇੰਨੇ ਵਿੱਚ ਉਨ੍ਹਾਂ ਦੇ ਕੋਲ ਇੱਕ ਸਾਧੂ ਆਇਆ। ਉਸ ਨੇ ਹਲਕਾ ਸੰਤਰੀ ਰੰਗ ਦਾ ਚੋਲਾ ਪਾਇਆ ਹੋਇਆ ਸੀ। ਕੋਲ ਆ ਕੇ ਉਸ ਨੇ ਕਿਹਾ ਕਿ ਰਾਧਾ ਸਵਾਮੀ ਆਸ਼ਰਮ ਜਾਣਾ ਹੈ, ਰਸਤਾ ਦੱਸ ਦਿਓ। ਨੀਲਮ ਨੇ ਕਿਹਾ ਕਿ ਉਸ ਨੂੰ ਨਹੀਂ ਪਤਾ। ਇੰਨੇ ਵਿੱਚ ਬਾਈਕ ਉਤੇ ਦੋ ਨੌਜਵਾਨ ਆਏ ਅਤੇ ਕਹਿਣ ਲੱਗੇ ਕਿ ਇਹ ਬਾਬਾ ਬੜਾ ਪਹੁੰਚਿਆ ਹੋਇਆ ਸੰਤ ਹੈ। ਉਸ ਨੇ ਤੁਹਾਡੇ ਨਾਲ ਖੁਦ ਆ ਕੇ ਗੱਲ ਕੀਤੀ ਹੈ। ਤੁਸੀਂ ਤਾਂ ਖੁਸ਼ਕਿਸਮਤ ਹੋ। ਨੀਲਮ ਉਨ੍ਹਾਂ ਦੀਆਂ ਗੱਲਾਂ ਵਿੱਚ ਆ ਕੇ ਦੋਵਾਂ ਨਾਲ ਦੋਸ਼ੀ ਬਾਬੇ ਕੋਲ ਚਲੀ ਗਈ। ਦੋਸ਼ੀ ਬਾਬਾ ਦਾ ਗੁਣਗਾਨ ਕਰ ਕੇ ਨੀਲਮ ਨੂੰ ਆਪਣੀਆਂ ਗੱਲਾਂ ਵਿੱਚ ਲਾਉਣ ਲੱਗੇ। ਇੰਨੇ ਵਿੱਚ ਬਾਬਾ ਨੇ ਥੈਲੇ ਵਿੱਚੋਂ ਰੁਮਾਲ ਕੱਢਿਆ ਅਤੇ ਨੀਲਮ ਨੂੰ ਕੋਈ ਸੋਨੇ ਦੀ ਚੀਜ਼ ਰੱਖਣ ਲਈ ਕਿਹਾ। ਨੀਲਮ ਨੇ ਮਨ੍ਹਾ ਕੀਤਾ ਤਾਂ ਠੱਗ ਦੇ ਸਾਥੀਆਂ ਨੇ ਦਬਾਅ ਪਾਉਂਦੇ ਹੋਏ ਕਿਹਾ, ਰੱਖ ਦਿਓ ਅਜੇ ਦੋ ਹਨ, ਬਾਬਾ ਦੇ ਅਸ਼ੀਰਵਾਦ ਨਾਲ ਚਾਰ ਹੋ ਜਾਣਗੇ। ਨੀਲਮ ਨੇ ਸੋਨੇ ਦੇ ਕੰਗਣ ਰੁਮਾਲ ਵਿੱਚ ਰੱਖ ਦਿੱਤੇ। ਠੱਗ ਨੇ ਰੁਮਾਲ ਵਿੱਚ ਅਖਬਾਰ ਦੇ ਪਾਟੇ ਹੋਏ ਟੁਕੜੇ ਪਾ ਦਿੱਤੇ। ਨੀਲਮ ਰੁਮਾਲ ਖੋਲ੍ਹ ਕੇ ਦੇਖਣ ਲੱਗੀ ਤਾਂ ਠੱਗ ਨੇ ਕਿਹਾ, ਰੁਮਾਲ ਘਰ ਦੇ ਮੰਦਰ ਵਿੱਚ ਹੀ ਖੋਲ੍ਹਣਾ, ਕੋਈ ਕਮੀ ਨਹੀਂ ਰਹੇਗੀ। ਨੀਲਮ ਉਸ ਦੀਆਂ ਗੱਲਾਂ ਵਿੱਚ ਆ ਗਈ ਅਤੇ ਘਰ ਆ ਕੇ ਰੁਮਾਲ ਖੋਲ੍ਹਿਆ ਤਾਂ ਉਸ ਵਿੱਚ ਬਜਰੀ-ਪੱਥਰ ਸਨ।