ਪੋਰਟ-ਓ-ਪ੍ਰਿੰਸ, 17 ਫਰਵਰੀ (ਪੋਸਟ ਬਿਊਰੋ)- ਕੈਰੇਬੀਆਈ ਦੇਸ਼ ਹੈਤੀ ਵਿੱਚ ਇੱਕ ਅਮਰੀਕੀ ਐੱਨ ਜੀ ਓ ਦੇ ਟਿਕਾਣੇ ਵਿੱਚ ਭਿਆਨਕ ਅੱਗ ਲੱਗ ਗਈ। ਇਸ ਹਾਦਸੇ ਵਿੱਚ 15 ਬੱਚਿਆਂ ਦੀ ਮੌਤ ਹੋ ਗਈ।
ਇੱਕ ਸਮਾਚਾਰ ਏਜੰਸੀ ਦੀ ਰਿਪੋਰਟ ਮੁਤਾਬਕ ਅਮਰੀਕਾ ਦੀ ਇੱਕ ਗੈਰ ਲਾਭਕਾਰੀ ਈਸਾਈ ਸੰਸਥਾ ਵੱਲੋਂ ਹੈਤੀ ਵਿੱਚ ਚਲਾਏ ਜਾਂਦੇ ਦੋ ਮੰਜ਼ਿਲਾ ਯਤੀਮਖਾਨੇ ਵਿੱਚ ਅੱਗ ਲੱਗਣ ਕਾਰਨ ਘੱਟੋ-ਘੱਟ 15 ਬੱਚਿਆਂ ਦੀ ਮੌਤ ਹੋ ਗਈ। ਏਜੰਸੀ ਈਫੇ ਦੇ ਮੁਤਾਬਕ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਪੋਰਟ-ਓ-ਪ੍ਰਿੰਸ ਦੇ ਬਾਹਰੀ ਇਲਾਕੇ ਵਿੱਚ ਯਤੀਮਖਾਨੇ ਵਿੱਚ ਅੱਗ ਲੱਗਣ ਕਾਰਨ ਦੋ ਬੱਚਿਆਂ ਦੀ ਮੌਤ ਉਨ੍ਹਾਂ ਦੇ ਕਮਰੇ ਵਿੱਚ ਹੋ ਗਈ ਅਤੇ 13 ਹੋਰ ਨੇ ਸਾਹ ਲੈਣ ਵਿੱਚ ਤਕਲੀਫ ਹੋਣ ਕਾਰਨ ਨੇੜਲੇ ਹਸਪਤਾਲ ਵਿਚ ਦਮ ਤੋੜ ਦਿੱਤਾ। ਅਧਿਕਾਰੀ ਨੇ ਕਿਹਾ, ਬਦਕਿਸਮਤੀ ਨਾਲ ਫੇਰਮਥ ਹਸਪਤਾਲ, ਜਿੱਥੇ ਬੱਚਿਆਂ ਨੂੰ ਭਰਤੀ ਕੀਤਾ ਗਿਆ ਸੀ, ਜ਼ਿਆਦਾ ਕੁਝ ਨਹੀਂ ਕਰ ਸਕਿਆ।
ਬੱਚੇ ਹਸਪਤਾਲ ਲਿਜਾਣ ਤੋਂ ਪਹਿਲਾਂ ਹੀ ਗੰਭੀਰ ਸਥਿਤੀ ਵਿੱਚ ਸਨ। ਦੋ ਮੰਜ਼ਿਲਾ ਇਮਾਰਤ ਵਿੱਚ ਹਾਲਵੇ ਵਿੱਚ ਇੱਕ ਬੋਰਡ 'ਤੇ ਛੱਡੀ ਗਈ ਮੋਮਬੱਤੀ ਨੂੰ ਅੱਗ ਲੱਗਣ ਦਾ ਮੁੱਖ ਕਾਰਨ ਦੱਸਿਆ ਜਾ ਰਿਹਾ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਅੱਗ ਇਮਾਰਤ ਦੇ ਜ਼ੀਰੋ ਗਰਾਊਂਡ ਫਲੋਰ ਤੋਂ ਫੈਲੀ ਤੇ ਇੱਕ ਬੈਡਰੂਮ ਅਤੇ ਹੋਰ ਕਮਰੇ ਬੁਰੀ ਤਰ੍ਹਾਂ ਤਬਾਹ ਹੋ ਗਏ। ਧੂੰਏਂ ਨੇ ਦੂਜੀ ਮੰਜ਼ਿਲ ਨੂੰ ਵੀ ਪ੍ਰਭਾਵਤ ਕੀਤਾ ਜਿੱਥੇ ਹੋਰ ਬੈਡਰੂਮ ਸਥਿਤ ਸਨ। 66 ਬੱਚਿਆਂ ਦੀ ਸਮਰੱਥਾ ਵਾਲੇ ਯਤੀਮਖਾਨੇ ਨੂੰ ਪਿਛਲੇ ਚਾਲੀ ਸਾਲਾਂ ਤੋਂ ਪੈਨਸਿਲਵੇਨੀਆ ਦੇ ਇੱਕ ਈਸਾਈ ਸੰਗਠਨ ਚਰਚ ਆਫ ਬਾਈਬਲ ਅੰਡਰਸਟੈਂਡਿੰਗ ਵੱਲੋਂ ਚਲਾਇਆ ਜਾ ਰਿਹਾ ਹੈ।