ਕਰਾਚੀ, 17 ਫਰਵਰੀ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸਿੰਧ ਸੂਬੇ ਵਿੱਚ ਸੱਤਾਧਾਰੀ ਪਾਕਿਸਤਾਨ ਪੀਪਲਸ ਪਾਰਟੀ ਦੀ ਇੱਕ ਮਹਿਲਾ ਵਿਧਾਇਕ ਨੂੰ ਨੌਸ਼ਹਿਰਾ ਫਿਰੋਜ਼ ਜ਼ਿਲੇ ਵਿੱਚ ਗੋਲੀ ਮਾਰ ਕੇ ਮਾਰ ਦਿੱਤਾ ਗਿਆ ਹੈ।
ਸਿੰਧ ਸੂਬੇ ਦੀ ਪੁਲਸ ਨੇ ਦੱਸਿਆ ਕਿ ਰਾਜ ਵਿਧਾਨ ਸਭਾ ਦੀ ਮੈਂਬਰ ਸ਼ਹਿਨਾਜ਼ ਅੰਸਾਰੀ ਦੀ ਉਨ੍ਹਾਂ ਦੇ ਹੀ ਭਤੀਜੇ ਨੇ ਨੌਸ਼ਹਿਰਾ ਫਿਰੋਜ਼ ਦੇ ਦਰਿਆ ਖਾਨ ਵਿੱਚ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਹੈ। ਦੋਸ਼ੀ ਉਨ੍ਹਾਂ ਦੇ ਰਿਸ਼ਤੇਦਾਰ ਜਾਹਿਦ ਖੋਕਰ ਦਾ ਭਤੀਜਾ ਹੈ। ਖੋਕਰ ਦਾ ਪਿਛਲੇ ਦਿਨੀਂ ਦਿਹਾਂਤ ਹੋਇਆ ਸੀ। ਰਿਜ਼ਰਵ ਹਲਕੇ ਤੋਂ ਵਿਧਾਨ ਸਭਾ ਲਈ ਨਾਮਜ਼ਦ ਕੀਤੀ ਗਈ ਅੰਸਾਰੀ, ਖੋਕਰ ਦੇ 40ਵੇਂ (ਮੌਤ ਦੇ ਚਾਲੀ ਦਿਨ ਬਾਅਦ ਹੋਣ ਵਾਲੀ ਸ਼ੋਕ ਸਭਾ) ਵਿੱਚ ਸ਼ਾਮਲ ਹੋਣ ਗਈ ਤਾਂ ਇਹ ਹਮਲਾ ਹੋਇਆ। ਜੀਓ ਨਿਊਜ਼ ਨੇ ਡਾਕਟਰਾਂ ਦੇ ਹਵਾਲੇ ਨਾਲ ਖਬਰ ਦਿੱਤੀ ਹੈ ਕਿ ਉਨ੍ਹਾਂ ਨੂੰ ਇੱਕ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਸ ਦੇ ਮੁਤਾਬਕ ਅੰਸਾਰੀ ਨੇ ਉਨ੍ਹਾਂ ਦੇ ਅਤੇ ਖੋਕਰ ਦੇ ਭਤੀਜੇ ਦੇ ਵਿਚਾਲੇ ਤਣਾਅ ਦੇ ਬਾਵਜੂਦ ਸ਼ੋਕ ਸਭਾ ਵਿਚ ਜਾਣ ਦਾ ਫੈਸਲਾ ਲਿਆ। ਪੁਲਸ ਇਸ ਗੱਲ ਦਾ ਪਤਾ ਲਾਉਣ ਲਈ ਜਾਂਚ ਕਰ ਰਹੀ ਹੈ ਕਿ ਹਮਲੇ ਵਿੱਚ ਕਿੰਨੇ ਲੋਕ ਸ਼ਾਮਲ ਹਨ। ਸ਼ੁਰੂ ਦੀ ਰਿਪੋਰਟ ਵਿੱਚ ਸੰਕੇਤ ਮਿਲਿਆ ਕਿ ਹਮਲਾ ਜ਼ਮੀਨੀ ਝਗੜੇ ਕਾਰਨ ਹੋਇਆ ਹੈ। ਪੀ ਪੀ ਪੀ ਮੁਖੀ ਬਿਲਾਵਲ ਭੁੱਟੋ-ਜ਼ਰਦਾਰੀ ਨੇ ਅੰਸਾਰੀ ਦੀ ਹੱਤਿਆ ਦੀ ਸਖਤ ਨਿੰਦਾ ਕੀਤੀ ਹੈ।