ਟੋਰਾਂਟੋ, 17 ਫਰਵਰੀ (ਪੋਸਟ ਬਿਊਰੋ) : ਐਤਵਾਰ ਰਾਤ ਨੂੰ ਥੌਰਨਹਿੱਲ ਮਾਲ ਦੇ ਬਾਹਰ ਗੋਲੀਆਂ ਚਲਾਉਣ ਵਾਲੇ ਨਕਾਬਪੋਸ਼ ਵਿਅਕਤੀ ਦੀ ਯੌਰਕ ਰੀਜਨਲ ਪੁਲਿਸ ਤੇਜ਼ੀ ਨਾਲ ਭਾਲ ਕਰ ਰਹੀ ਹੈ। ਇਸ ਗੋਲੀਕਾਂਡ ਵਿੱਚ 17 ਅਤੇ 30 ਸਾਲਾ ਵਿਅਕਤੀ ਜ਼ਖ਼ਮੀ ਹੋ ਗਏ।
ਗੋਲੀਆਂ ਚੱਲਣ ਦੀ ਰਿਪੋਰਟ ਮਿਲਣ ਤੋਂ ਠੀਕ ਪਹਿਲਾਂ ਰਾਤੀਂ 9:00 ਵਜੇ ਬਾਥਰਸਟ ਤੇ ਸੈਂਟਰ ਸਟਰੀਟਸ ਉੱਤੇ ਸਥਿਤ ਪ੍ਰੌਮੇਨੇਡ ਮਾਲ ਦੇ ਪਾਰਕਿੰਗ ਲੌਟ ਵਿੱਚ ਐਮਰਜੰਸੀ ਅਮਲੇ ਨੂੰ ਸੱਦਿਆ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਮੌਕੇ ਉੱਤੇ ਪਹੁੰਚਣ ਉੱਤੇ ਉਨ੍ਹਾਂ ਇੱਕ ਜ਼ਖ਼ਮੀ ਵਿਅਕਤੀ ਨੂੰ ਗ੍ਰੇਅ ਰੰਗ ਦੀ ਸੇਡਾਨ ਦੇ ਅੰਦਰ ਪਾਇਆ ਤੇ ਦੂਜਾ ਵਿਅਕਤੀ ਉਨ੍ਹਾਂ ਨੂੰ ਗੱਡੀ ਦੇ ਬਾਹਰ ਮਿਲਿਆ।
ਆਪਣਾ ਨਾਂ ਗੁਪਤ ਰੱਖਣ ਦੀ ਸ਼ਰਤ ਉੱਤੇ ਇੱਕ ਚਸ਼ਮਦੀਦ ਨੇ ਦੱਸਿਆ ਕਿ ਉਹ ਚਿੱਟੇ ਰੰਗ ਦੇ ਟੋਅ ਟਰੱਕ ਵਿੱਚ ਸੀ, ਜਿਸ ਉੱਤੇ ਯੂਨਾਈਟਿਡ ਟੋਇੰਗ ਦਾ ਲੋਗੋ ਲੱਗਿਆ ਹੋਇਆ ਸੀ। ਉਸ ਦੇ ਨਾਲ ਨਵਾਂ ਡਰਾਈਵਰ ਸੀ, ਜਿਸ ਨਾਲ ਉਹ ਟਰੇਨਿੰਗ ਕਰ ਰਿਹਾ ਸੀ ਜਦੋਂ ਉਹ ਕੰਪਨੀ ਦੇ ਮਾਲਕ ਨਾਲ ਮੁਲਾਕਾਤ ਕਰਨ ਲਈ ਪਾਰਕਿੰਗ ਲੌਟ ਵਿੱਚ ਪਹੁੰਚੇ। ਦੋ ਵਿਅਕਤੀ ਟੋਅ ਟਰੱਕ ਵਿਚੋਂ ਨਿਕਲੇ ਤੇ ਸੇਡਾਨ ਕੋਲ ਪਹੁੰਚੇ, ਐਨੇ ਨੂੰ ਹੀ ਇੱਕ ਗੋਲੀ ਸੇਡਾਨ ਦੇ ਅੰਦਰ ਬੈਠੇ ਵਿਅਕਤੀ ਨੂੰ ਲੱਗੀ ਤੇ ਦੂਜੀ ਨਵੇਂ ਟੋਅ ਟਰੱਕ ਡਰਾਈਵਰ ਨੂੰ ਲਗੀ।
ਚਸ਼ਮਦੀਦ ਨੇ ਦੱਸਿਆ ਕਿ ਬੰਦੂਕਧਾਰੀ ਹੋਰ ਗੋਲੀਆਂ ਚਲਾਉਣੀਆਂ ਚਾਹੁੰਦਾ ਸੀ ਪਰ ਉਸ ਕੋਲ ਗੋਲੀਆਂ ਮੱੁਕ ਗਈਆਂ। ਚਸ਼ਮਦੀਦ ਨੇ ਦਸਿਆ ਕਿ ਇਹ ਸਭ ਇੱਕ ਸਾਲ ਤੋਂ ਚੱਲ ਰਹੀ ਟੋਅ ਟਰਕ ਜੰਗ ਨਾਲ ਸਬੰਧਤ ਹੈ। ਸੇਡਾਨ ਦੇ ਦਰਵਾਜ਼ੇ ਟੱੁਟ ਕੇ ਮੌਕੇ ੳੱੁਤੇ ਹੀ ਰਹਿ ਗਏ, ਜਿਨ੍ਹਾਂ ਵਿੱਚੋਂ ਇੱਕ ਉੱਤੇ ਖੂਨ ਦੇ ਧੱਬੇ ਸਾਫ ਨਜ਼ਰ ਆ ਰਹੇ ਸਨ। ਇਸ ਵਾਰਦਾਤ ਸਮੇਂ ਮਾਲ ਬੰਦ ਸੀ। ਪੁਲਿਸ ਅਨੁਸਾਰ ਮਸ਼ਕੂਕ ਨੇ ਮਾਸਕ ਪਾਇਆ ਹੋਇਆ ਸੀ ਤੇ ਉਸ ਨੂੰ ਆਖਰੀ ਵਾਰੀ ਪੈਦਲ ਹੀ ਉੱਥੋਂ ਫਰਾਰ ਹੁੰਦਿਆਂ ਵੇਖਿਆ ਗਿਆ।