ਬੇਗੂਸਰਾਏ (ਬਿਹਾਰ), 16 ਫਰਵਰੀ (ਪੋਸਟ ਬਿਊਰੋ)- ਕੱਟੜ ਹਿੰਦੂਤਵ ਲਈ ਜਾਣੇ ਜਾਂਦੇ ਕੇਂਦਰੀ ਮੰਤਰੀ ਅਤੇ ਭਾਜਪਾ ਦੇ ਸਥਾਨਕ ਪਾਰਲੀਮੈਂਟ ਮੈਂਬਰ ਗਿਰੀਜਾ ਸਿੰਘ ਵੱਲੋਂ ਭੀਮ ਰਾਓ ਅੰਬੇਦਕਰ ਦਾ ਬੁੱਤ ‘ਅਸ਼ੁੱਧ' ਕੀਤੇ ਜਾਣ ਮਗਰੋਂ ਸੀ ਪੀ ਆਈ (ਭਾਰਤੀ ਕਮਿਊਨਿਸਟ ਪਾਰਟੀ) ਅਤੇ ਰਾਸ਼ਟਰੀ ਜਨਤਾ ਦਲ (ਆਰ ਜੇ ਡੀ) ਦੇ ਕੁਝ ਕਾਰਕੁਨਾਂ ਨੇ ਬੁੱਤ ਨੂੰ ਗੰਗਾ ਜਲ ਨਾਲ ਨੁਹਾ ਕੇ ਸ਼ੁੱਧ ਕੀਤਾ। ਇਹ ਘਟਨਾ ਜ਼ਿਲੇ ਦੇ ਬਲੀਆ ਬਲਾਕ ਦੇ ਅੰਬੇਡਕਰ ਪਾਰਕ ਵਿੱਚ ਵਾਪਰੀ, ਜਿੱਥੇ ਗਿਰੀਰਾਜ ਸਿੰਘ ਵੱਲੋਂ ਸ਼ੁੱਕਰਵਾਰ ਨੂੰ ਬੁੱਤ 'ਤੇ ਫੁੱਲ ਮਾਲਾਵਾਂ ਪਾਈਆਂ ਗਈਆਂ ਸਨ।
ਗਿਰੀਰਾਜ ਸਿੰਘ ਨਾਗਰਿਕਤਾ ਸੋਧ ਐਕਟ ਦੇ ਹੱਕ ਵਿੱਚ ਰੱਖੀ ਰੈਲੀ ਵਿੱਚ ਜਾਣ ਤੋਂ ਪਹਿਲਾਂ ਇਥੇ ਰੁਕੇ ਅਤੇ ਬੁੱਤ ਨੂੰ ਹਾਰ ਪਹਿਨਾਏ ਸਨ, ਜਿਸ ਤੋਂ 24 ਘੰਟਿਆਂ ਬਾਅਦ ਸੀ ਪੀ ਆਈ ਦੇ ਸਥਾਨਕ ਆਗੂ ਸਨੋਜ ਸਰੋਜ ਅਤੇ ਆਰ ਜੇ ਡੀ ਦੇ ਵਿਕਾਸ ਪਾਸਵਾਨ ਅਤੇ ਰੂਪ ਨਾਰਾਇਣ ਪਾਸਵਾਨ ਪਵਿੱਤਰ ਜਲ ਦੀ ਬਾਲਟੀ ਭਰ ਕੇ ਲਿਆਏ ਅਤੇ ਬੁੱਤ 'ਤੇ ਗੰਗਾਜਲ ਛਿੜਕ ਕੇ ‘ਜੈ ਭੀਮ’ ਦਾ ਉਚਾਰਨ ਕਰਨ ਲੱਗੇ। ਇਨ੍ਹਾਂ ਨੇ ਇਸ ਪ੍ਰੋਗਰਾਮ ਦੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ਉਤੇ ਸਾਂਝੀ ਕੀਤੀ ਹੈ, ਜਿਸ ਵਿੱਚ ਇਹ ਕਹਿ ਰਹੇ ਹਨ ਕਿ ਗਿਰੀਰਾਜ ਸਿੰਘ ਨੇ ਕੱਲ੍ਹ ਇਥੇ ਆ ਕੇ ਵਾਤਾਵਰਣ ਗੰਦਾ ਕਰ ਦਿੱਤਾ ਅਤੇ ਉਸ ਨੇ ਆਪਣੇ ਭਾਸ਼ਣ ਵਿੱਚ ਕਿਹਾ ਕਿ ਬਲੀਆ ਮਿੰਨੀ ਪਾਕਿਸਤਾਨ ਬਣ ਗਿਆ ਹੈ। ਕੇਂਦਰੀ ਮੰਤਰੀ ਉਤੇ ਮਨੂਵਾਦ ਦਾ ਸਮਰਥਕ ਹੋਣ ਦੇ ਦੋਸ਼ ਲਾ ਕੇ ਉਨ੍ਹਾਂ ਕਿਹਾ ਕਿ ਅੰਬੇਡਕਰ ਨੇ ਜਿਨ੍ਹਾਂ ਕੁਰੀਤੀਆਂ ਵਿਰੁੱਧ ਲੜਾਈ ਲੜੀ ਸੀ, ਗਿਰੀਰਾਜ ਸਿੰਘ ਨੇ ਉਨ੍ਹਾਂ ਕੁਰੀਤੀਆਂ ਦਾ ਸਮਰਥਨ ਕੀਤਾ ਤੇ ਉਨ੍ਹਾਂ ਨੇ ਬੁੱਤ ਉੱਤੇ ਫੁੱਲ ਮਾਲਾਵਾਂ ਪਾ ਕੇ ਅਸ਼ੁੱਧ ਕੀਤਾ ਹੈ।
ਇਸ ਬਾਰੇ ਭਾਜਪਾ ਦੇ ਜ਼ਿਲਾ ਪ੍ਰਧਾਨ ਰਾਜ ਕਿਸ਼ੋਰ ਸਿੰਘ ਨੇ ਦੋਸ਼ ਲਾਇਆ ਕਿ ਇਹ ਲੋਕ ਸੀ ਏ ਏ ਦਾ ਵਿਰੋਧ ਕਰਨ ਦੇ ਨਾਂਅ ਉਤੇ ਅਜਿਹਾ ਮਾਹੌਲ ਪੈਦਾ ਕਰ ਰਹੇ ਹਨ ਕਿ ਇਸ ਨੇ 1947 ਦੇ ਵੰਡ ਤੋਂ ਪਹਿਲਾਂ ਦੇ ਰੌਲੇ ਦੀ ਯਾਦ ਦਿਵਾ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।