Welcome to Canadian Punjabi Post
Follow us on

29

March 2020
ਅੰਤਰਰਾਸ਼ਟਰੀ

ਲਾਹੌਰ ਦੇ ਐੱਸ ਐੱਸ ਪੀ ਅਤੇ ਸਾਬਕਾ ਅਟਾਰਨੀ ਜਨਰਲ ਅਗਵਾ

February 14, 2020 07:32 AM

ਲਾਹੌਰ, 13 ਫਰਵਰੀ, (ਪੋਸਟ ਬਿਊਰੋ)- ਪਾਕਿਸਤਾਨੀ ਪੰਜਾਬ ਵਿਚ ਲਾਹੌਰ ਸ਼ਹਿਰ ਦੇ ਐੱਸ ਐੱਸ ਪੀ ਮੁਫਖਾਰ ਅਦੀਲ ਅਤੇ ਸਾਬਕਾ ਅਟਾਰਨੀ ਜਨਰਲ ਸ਼ਾਹਬਾਜ਼ ਅਹਿਮਦ ਨੂੰ ਅਗਵਾ ਕਰ ਲਿਆ ਗਿਆ ਹੈ। ਪੁਲਿਸ ਕੇਸ ਦੀ ਜਾਂਚ ਕਰ ਰਹੀ ਹੈ, ਪ੍ਰੰਤੂ ਦੋਵਾਂ ਦਾ ਅਜੇ ਤਕ ਕੋਈ ਸੁਰਾਗ ਨਹੀਂ ਲੱਗ ਸਕਿਆ।
ਨਿਊਜ਼ ਇੰਟਰਨੈਸ਼ਨਲ ਅਖ਼ਬਾਰ ਵਿੱਚ ਵੀਰਵਾਰ ਨੂੰ ਛਪੀ ਖ਼ਬਰ ਅਨੁਸਾਰ ਜਿ਼ਲਾ ਲਾਹੌਰ ਪੁਲਸ ਦੇ ਐੱਸ ਐੱਸ ਪੀ ਅਦੀਲ ਅਤੇ ਸ਼ਾਹਬਾਜ਼ ਦੋਸਤ ਸਨ। ਪਿਛਲੇ ਹਫ਼ਤੇ ਸ਼ੱਕੀ ਹਾਲਾਤ ਵਿਚ ਕੁਝ ਅਣਪਛਾਤੇ ਲੋਕਾਂ ਨੇ ਇਨ੍ਹਾਂ ਦੋ ਜਣਿਆਂ ਨੂੰ ਅਗਵਾ ਕਰ ਲਿਆ। ਪੰਜਾਬ ਸੂਬੇ ਦੇ ਆਈ ਜੀ ਸ਼ੋਏਬ ਦਸਤਗੀਰ ਨੇ ਕੇਸ ਦੀ ਉੱਚ ਪੱਧਰੀ ਜਾਂਚ ਦਾ ਆਦੇਸ਼ ਦਿੱਤਾ ਹੈ। ਲਾਹੌਰ ਸ਼ਹਿਰ ਦੇ ਜੌਹਰ ਟਾਊਨ ਅਤੇ ਨਸੀਰਾਬਾਦ ਥਾਣਿਆਂ ਵਿਚ ਵੱਖ-ਵੱਖ ਕੇਸ ਦਰਜ ਕੀਤੇ ਗਏ ਹਨ। ਇਸ ਬਾਰੇ ਥਾਣਾ ਨਸੀਰਾਬਾਦ ਵਿੱਚ ਦਰਜ ਕੀਤੀ ਸ਼ਿਕਾਇਤ ਵਿਚ ਕਿਹਾ ਗਿਆ ਹੈ ਕਿ ਸ਼ਾਹਬਾਜ਼ ਸੱਤ ਫਰਵਰੀ ਨੂੰ ਆਪਣੇ ਦਫ਼ਤਰ ਤੋਂ ਨਿਕਲਣ ਪਿੱਛੋਂ ਨਜ਼ਰ ਨਹੀਂ ਆਏ। ਇਸੇ ਦਿਨ ਐੱਸ ਐੱਸ ਪੀ ਦੇ ਲਾਪਤਾ ਹੋਣ ਦੀ ਖ਼ਬਰ ਵੀ ਆਈ ਸੀ ਤੇ ਉਨ੍ਹਾਂ ਦੀ ਪਤਨੀ ਨੇ ਜੌਹਰ ਥਾਣੇ ਵਿਚ ਸ਼ਿਕਾਇਤ ਦਰਜ ਕਰਵਾਈ ਹੈ। ਅਦੀਲ ਦੀ ਸਰਕਾਰੀ ਗੱਡੀ ਇਕ ਸ਼ਾਪਿੰਗ ਮਾਲ ਦੇ ਬਾਹਰੋਂ ਮਿਲੀ ਹੈ। ਦੋਵਾਂ ਦੇ ਮੋਬਾਈਲ ਫੋਨ ਵੀ ਬੰਦ ਹਨ। ਪੁਲਿਸ ਸੂਤਰਾਂ ਮੁਤਾਬਕ ਅਦੀਲ ਪਿਛਲੇ ਕੁਝ ਦਿਨਾਂ ਤੋਂ ਕਿਸੇ ਕੇਸ ਦੀ ਗੁਪਤ ਜਾਂਚ ਕਰ ਰਹੇ ਸਨ। ਸਾਲ 2008 ਵਿਚ ਪੁਲਿਸ ਵਿੱਚ ਆਉਣ ਵਾਲੇ ਅਦੀਲ ਤੇ ਸ਼ਾਹਬਾਜ਼ ਚੰਗੇ ਦੋਸਤ ਸਨ।

Have something to say? Post your comment