ਓਟਵਾ, 11 ਫਰਵਰੀ (ਪੋਸਟ ਬਿਊਰੋ) : ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਉੱਤਰੀ ਕੈਰੋਲੀਨਾ ਤੋਂ ਰਿਪਬਲਿਕਨ, ਸਾਬਕਾ ਡਿਪਲੋਮੈਟ ਤੇ ਫਿਜ਼ੀਸ਼ੀਅਨ ਐਲਡੋਨਾ ਜ਼ੀ. ਵੌਸ ਨੂੰ ਕੈਨੇਡਾ ਲਈ ਅਮਰੀਕਾ ਦਾ ਅੰਬੈਸਡਰ ਨਿਯੁਕਤ ਕੀਤਾ ਹੈ।
ਵੌਸ ਉਹ ਅਹੁਦਾ ਸਾਂਭਣ ਜਾ ਰਹੀ ਹੈ ਜਿਹੜਾ ਗਰਮੀਆਂ ਤੋਂ ਖਾਲੀ ਪਿਆ ਸੀ। ਇਸ ਸਮੇਂ ਉਹ ਵਾੲ੍ਹੀਟ ਹਾਊਸ ਫੈਲੋਸਿ਼ਪਸ ਉੱਤੇ ਟਰੰਪ ਦੇ ਕਮਿਸ਼ਨ ਦੀ ਵਾਈਸ ਚੇਅਰ ਹੈ। ਇਸ ਤੋਂ ਪਹਿਲਾਂ ਉਹ ਰਿਪਬਲਿਕ ਆਫ ਐਸਟੋਨੀਆ ਵਿੱਚ ਅਮਰੀਕਾ ਦੀ ਅੰਬੈਸਡਰ ਸੀ। ਇਸ ਤੋਂ ਪਹਿਲਾਂ ਉਹ ਡਾਕਟਰ ਵਜੋਂ ਵੀ ਕੰਮ ਕਰ ਚੁੱਕੀ ਹੈ।
ਬੀਐਨਐਨ ਬਲੂਮਬਰਗ ਅਨੁਸਾਰ ਵੌਸ ਤੇ ਉਸ ਦੇ ਪਤੀ ਲੁਈ ਡੀਜੌਏ ਜੀਓਪੀ ਦੇ ਫੰਡਰੇਜ਼ਰ ਵੀ ਹਨ। ਉਹ ਰਿਪਬਲਿਕਨ ਨੈਸ਼ਨਲ ਕਮੇਟੀ ਦੀ ਮੈਂਬਰ ਵੀ ਹੈ ਤੇ ਇਸ ਤੋਂ ਪਹਿਲਾਂ ਨੌਰਥ ਕੈਰੋਲੀਨਾ ਦੇ ਡਿਪਾਰਟਮੈਂਟ ਆਫ ਹੈਲਥ ਐਂਡ ਹਿਊਮਨ ਸਰਵਿਸਿਜ਼ ਦੀ ਸੈਕਟਰੀ ਵਜੋਂ ਵੀ ਸੇਵਾ ਨਿਭਾਅ ਚੱੁਕੀ ਹੈ। ਪੋਲੈਂਡ ਵਿੱਚ ਪੈਦਾ ਹੋਈ ਵੌਸ, ਇੱਕ ਹੋਰ ਜੀਓਪੀ ਡੋਨਰ ਕੈਲੀ ਕ੍ਰਾਫਟ ਦੀ ਥਾਂ ਲੈ ਰਹੀ ਹੈ। ਕ੍ਰਾਫਟ ਨੂੰ ਸੰਯੁਕਤ ਰਾਸ਼ਟਰ ਵਿੱਚ ਅਮਰੀਕਾ ਦੀ ਅੰਬੈਸਡਰ ਨਿਯੁਕਤ ਕੀਤਾ ਗਿਆ ਹੈ।
ਦੂਜੇ ਪਾਸੇ ਅਗਸਤ ਵਿੱਚ ਡੇਵਿਡ ਮੈਕਨੌਟਨ ਵੱਲੋਂ ਅਹੁਦਾ ਛੱਡੇ ਜਾਣ ਤੋਂ ਬਾਅਦ ਕੈਨੇਡਾ ਵੱਲੋ ਅਜੇ ਤੱਕ ਅਮਰੀਕਾ ਦੇ ਅੰਬੈਸਡਰ ਵਜੋਂ ਕਿਸੇ ਨੂੰ ਨਿਯੁਕਤ ਨਹੀਂ ਕੀਤਾ ਗਿਆ ਹੈ। ਡਿਪਟੀ ਅੰਬੈਸਡਰ ਕਰਸਟਿਨ ਹਿਲਮੈਨ ਅਮਰੀਕਾ ਵਿੱਚ ਕੈਨੇਡਾ ਦੀ ਕਾਰਜਕਾਰੀ ਅੰਬੈਸਡਰ ਵਜੋਂ ਸੇਵਾ ਨਿਭਾਅ ਰਹੀ ਹੈ।