ਇਨ੍ਹੀਂ ਦਿਨੀਂ ਫਿਲਮ ਨੂੰ ਸੁਰਖੀਆਂ ਵਿੱਚ ਬਣਾਈ ਰੱਖਣ ਲਈ ਨਿਰਮਾਤਾ ਅਤੇ ਅਭਿਨੇਤਾ ਫਿਲਮ ਦੇ ਸੈੱਟ ਨਾਲ ਜੁੜੀਆਂ ਖਬਰਾਂ ਸੋਸ਼ਲ ਮੀਡੀਆ 'ਤੇ ਸਾਂਝੀਆਂ ਕਰੀ ਜਾਂਦੇ ਹਨ। ਪਿਛਲੇ ਹਫਤੇ ਫਿਲਮ ‘ਸੂਰਿਆਵੰਸ਼ੀ’ ਤੋਂ ਜੈਕੀ ਸ਼ਰਾਫ ਦਾ ਲੁਕ ਸਾਂਝਾ ਕਰਨ ਦੇ ਬਾਅਦ ਸੈੱਟ ਤੋਂ ਨਵਾਂ ਵੀਡੀਓ ਸਾਹਮਣੇ ਆਇਆ ਹੈ। ਅਕਸ਼ੈ ਕੁਮਾਰ ਨੇ ਇਹ ਵੀਡੀਓ ਸੋਸ਼ਲ ਮੀਡੀਆ 'ਤੇ ਸਾਂਝਾ ਕੀਤਾ ਹੈ, ਜਿਸ ਵਿੱਚ ਕੈਟਰੀਨਾ ਕੈਫ ਸਫੇਦ ਸਲਵਾਰ ਸੂਟ ਵਿੱਚ ਸੈੱਟ 'ਤੇ ਝਾੜੂ ਲਾ ਰਹੀ ਹੈ। ਅਕਸ਼ੈ ਉਨ੍ਹਾਂ ਤੋਂ ਪੁੱਛਦੇ ਹਨ, ‘‘ਕੈਟਰੀਨਾ ਜੀ, ਤੁਸੀਂ ਕੀ ਕਰ ਰਹੇ ਹੋ?' ਜਵਾਬ ਵਿੱਚ ਕੈਟਰੀਨਾ ਕਹਿੰਦੀ ਹੈ, ‘ਸਾਫ ਸਫਾਈ।’
ਝਾੜੂ ਲਾਉਂਦੇ ਹੋਏ ਉਹ ਅਕਸ਼ੈ ਨੂੰ ਹਟਣ ਲਈ ਕਹਿੰਦੀ ਹੈ ਅਤੇ ਨਾ ਹਟਣ 'ਤੇ ਉਨ੍ਹਾਂ ਨੂੰ ਝਾੜੂ ਨਾਲ ਹੀ ਹਟਾਉਣ ਲੱਗਦੀ ਹੈ। ਇਸ 'ਤੇ ਅਕਸ਼ੈ ਪੁੱਛਦੇ ਹਨ, ‘ਤੁਸੀਂ ਮਾਰ ਕਿਉਂ ਰਹੇ ਹੋ?’ ਦੋਵਾਂ ਦੇ ਠਹਾਕਿਆਂ ਨਾਲ ਇਹ ਵੀਡੀਓ ਖਤਮ ਹੁੰਦਾ ਹੈ। ਇਸ ਵੀਡੀਓ ਦੇ ਨਾਲ ਕੈਟਰੀਨਾ ਨੂੰ ਟੈਗ ਕਰਦੇ ਹੋਏ ਅਕਸ਼ੈ ਨੇ ਲਿਖਿਆ, ‘‘ਸੂਰਿਆਵੰਸ਼ੀ ਦੇ ਸੈੱਟ 'ਤੇ ਦਿਸੀ ਸਵੱਛ ਭਾਰਤ ਮੁਹਿੰਮ ਦੀ ਨਵੀਂ ਬ੍ਰਾਂਡ ਅੰਬੈਸਡਰ।”
ਅਕਸ਼ੈ ਤੇ ਕੈਟਰੀਨਾ ‘ਹਮ ਕੋ ਦੀਵਾਨਾ ਕਰ ਗਏ’, ‘ਸਿੰਘ ਇਜ਼ ਕਿੰਗ’, ‘ਨਮਸਤੇ ਲੰਡਨ’ ਅਤੇ ‘ਦੇ ਦਨਾ ਦਨ’ ਵਰਗੀਆਂ ਕਈ ਫਿਲਮਾਂ ਵਿੱਚ ਇਕੱਠੇ ਕੰਮ ਕਰ ਚੁੱਕੇ ਹਨ। ਆਖਰੀ ਵਾਰ ਇਹ ਜੋੜੀ ‘ਤੀਸ ਮਾਰ ਖਾਂ’ ਵਿੱਚ ਆਈ ਸੀ। ਰੋਹਿਤ ਸ਼ੈੱਟੀ ਦੇ ਨਿਰਦੇਸ਼ਨ ਵਿੱਚ ਬਣ ਰਹੀ ‘ਸੂਰਿਆਵੰਸ਼ੀ’ 27 ਮਾਰਚ ਨੂੰ ਰਿਲੀਜ਼ ਹੋਵੇਗੀ। ਇਸ ਵਿੱਚ ਰਣਵੀਰ ਸਿੰਘ ਅਤੇ ਅਜੈ ਦੇਵਗਨ ਵੀ ਮਹਿਮਾਨ ਭੂਮਿਕਾ ਵਿੱਚ ਨਜ਼ਰ ਆਉਣਗੇ। ‘ਸੂਰਿਆਵੰਸ਼ੀ’ ਦੇ ਇਲਾਵਾ ਇਸ ਸਾਲ ਅਕਸ਼ੈ ਦੀ ਫਿਲਮ ‘ਲਛਮੀ ਬੰਬ’ ਅਤੇ ‘ਪ੍ਰਿਥਵੀਰਾਜ’ ਰਿਲੀਜ਼ ਹੋਣਗੀਆਂ।