ਸਲਮਾਨ ਖਾਨ ਨੇ ਇਸ ਸਾਲ ਜਨਵਰੀ ਵਿੱਚ ਆਪਣੀ ਅਗਲੀ ਫਿਲਮ ‘ਕਭੀ ਈਦ ਕਭੀ ਦਿਵਾਲੀ’ ਦਾ ਐਲਾਨ ਕੀਤਾ ਸੀ। ਇਸ ਵਿੱਚ ਸਲਮਾਨ ਖਾਨ ਦੇ ਇਲਾਵਾ ਬਾਕੀ ਦੀ ਕਾਸਟ ਦਾ ਐਲਾਨ ਹਾਲੇ ਨਹੀਂ ਕੀਤਾ ਗਿਆ, ਪਰ ਸੂਤਰਾਂ ਮੁਤਾਬਕ ਸਲਮਾਨ ਇਸ ਵਿੱਚ ਸੂਰਜ ਪੰਚੋਲੀ, ਆਯੁਸ਼ ਸ਼ਰਮਾ ਤੇ ਜ਼ਹੀਰ ਇਕਬਾਲ ਦੀ ਕਾਸਟਿੰਗ ਕਰਨਾ ਚਾਹੁੰਦੇ ਹਨ। ਉਹ ਖੁਦ ਇਸ ਫਿਲਮ ਦੇ ਲੀਡ ਰੋਲ ਵਿੱਚ ਹੋਣਗੇ ਅਤੇ ਇਨ੍ਹਾਂ ਤਿੰਨਾਂ ਦੇ ਕਿਰਦਾਰ ਫਿਲਮ ਵਿੱਚ ਭਾਵੇਂ ਛੋਟੇ ਹੋਣਗੇ, ਪਰ ਅਹਿਮ ਹੋਣਗੇ। ਮੇਕਰਸ ਇਸ ਫਿਲਮ ਲਈ ਕੁਝ ਅਜਿਹੇ ਚਿਹਰੇ ਤਲਾਸ਼ ਰਹੇ ਸਨ, ਜੋ ਐਕਸ਼ਨ ਦੇ ਨਾਲ ਹੀ ਕਾਮੇਡੀ ਵੀ ਕਰ ਸਕਣ ਅਤੇ ਇਸੇ ਦੌਰਾਨ ਸਲਮਾਨ ਨੇ ਉਨ੍ਹਾਂ ਨੂੰ ਇਨ੍ਹਾਂ ਤਿੰਨਾਂ ਦਾ ਨਾਂਅ ਸੁਝਾਇਆ। ਸਾਜਿਦ ਨੂੰ ਵੀ ਇਹ ਤਿੰਨੇ ਪ੍ਰਫੈਕਟ ਲੱਗੇ ਅਤੇ ਉਨ੍ਹਾਂ ਨੇ ਇਸ ਦੇ ਲਈ ਹਾਮੀ ਭਰ ਦਿੱਤੀ।
ਤਿੰਨੇ ਇਸ ਫਿਲਮ ਵਿੱਚ ਦੋਸਤ ਦੇ ਕਿਰਦਾਰ ਵਿੱਚ ਨਜ਼ਰ ਆਉਣਗੇ, ਜਿਹੜੇ ਸਲਮਾਨ ਦੇ ਕਿਰਦਾਰ ਦੀ ਮਦਦ ਕਰਦੇ ਹਨ। ਇਸ ਫਿਲਮ ਨੂੰ ਸਾਜਿਦ ਨਾਡਿਆਡਵਾਲਾ ਪ੍ਰੋਡਿਊਸ ਕਰਨਗੇ ਅਤੇ ਫਰਹਾਦ ਸਾਮਜੀ ਇਸ ਦੇ ਡਾਇਰੈਕਟਰ ਹੋਣਗੇ। ਸ਼ੂਟਿੰਗ ਇੱਕ ਦੋ ਮਹੀਨਿਆਂ ਤੱਕ ਸ਼ੁਰੂ ਹੋ ਜਾਵੇਗੀ। ਮਜ਼ੇਦਾਰ ਗੱਲ ਇਹ ਹੈ ਕਿ ਇਨ੍ਹਾਂ ਤਿੰਨਾਂ ਹੀ ਕਲਾਕਾਰਾਂ ਨੇ ਸਲਮਾਨ ਦੇ ਬੈਨਰ ਹੇਠ ਆਪਣਾ ਡੈਬਿਊ ਕੀਤਾ ਹੈ। ਸੂਰਜ ਨੇ 2015 ਵਿੱਚ ‘ਹੀਰੋ’, ਆਯੁਸ਼ ਨੇ 2018 ਵਿੱਚ ‘ਲਵਯਾਤਰੀ’ ਅਤੇ ਜ਼ਹੀਰ ਨੇ ਪਿਛਲੇ ਸਾਲ ‘ਨੋਟਬੁਕ’ ਰਾਹੀਂ ਇੰਡਸਟਰੀ ਵਿੱਚ ਕਦਮ ਰੱਖਿਆ ਸੀ।