ਪੰਚਕੂਲਾ, 19 ਜਨਵਰੀ, (ਪੋਸਟ ਬਿਊਰੋ)- ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਸਿੰਘ ਨਾਲ ਜੁੜੇ ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਮੈਨੇਜਰ ਰਣਜੀਤ ਸਿੰਘ ਦੇ ਕਤਲ ਕੇਸ ਵਿੱਚ ਸੀ ਬੀ ਆਈ ਦੀ ਬਹਿਸ ਪੂਰੀ ਹੋ ਗਈ ਹੈ। ਕੇਸ ਦੀ ਅਗਲੀ ਸੁਣਵਾਈ ਵੇਲੇ ਇਕ ਫਰਵਰੀ ਨੂੰ ਬਚਾਅ ਧਿਰ ਵੱਲੋਂ ਬਹਿਸ ਸ਼ੁਰੂ ਕੀਤੀ ਜਾਵੇਗੀ।
ਬੀਤੇ ਸ਼ਨਿਚਰਵਾਰ ਇਸ ਕੇਸ ਦੀ ਸੁਣਵਾਈ ਵੇਲੇ ਡੇਰਾ ਮੁਖੀ ਗੁਰਮੀਤ ਰਾਮ ਰਹੀਮ ਸਿੰਘ ਵੀਡੀਓ ਕਾਨਫਰੰਸ ਰਾਹੀਂ ਪੇਸ਼ ਹੋਏ ਸਨ ਤੇ ਹੋਰ ਦੋਸ਼ੀ ਜਸਵੀਰ, ਕ੍ਰਿਸ਼ਨ ਲਾਲ ਤੇ ਅਵਤਾਰ ਸਿੰਘ ਅਦਾਲਤ ਵਿੱਚ ਖ਼ੁਦ ਪੇਸ਼ ਹੋਏ। ਦੋਸ਼ੀ ਇੰਦਰਸੈਨ ਉਮਰ ਜ਼ਿਆਦਾ ਹੋਣ ਕਾਰਨ ਹਾਜ਼ਰੀ ਵੱਲੋਂ ਮਾਫ਼ੀ ਉੱਤੇ ਰਿਹਾ।
ਸੀ ਬੀ ਆਈ ਦੇ ਵਕੀਲ ਐੱਚ ਪੀ ਐੱਸ ਵਰਮਾ ਨੇ ਦੱਸਿਆ ਕਿ ਸ਼ਨੀਵਾਰ ਸੀ ਬੀ ਆਈ ਨੇ ਆਪਣੀ ਫਾਈਨਲ ਬਹਿਸ ਪੂਰੀ ਕਰ ਲਈ ਹੈ। ਅਗਲੀ ਸੁਣਵਾਈ ਵਿੱਚ ਬਚਾਅ ਧਿਰ ਵੱਲੋਂ ਫਾਈਨਲ ਬਹਿਸ ਸ਼ੁਰੂ ਹੋਵੇਗੀ। ਬਚਾਅ ਪੱਖ ਦੇ ਵਕੀਲ ਅਨਿਲ ਕੌਸ਼ਿਕ ਨੇ ਦੱਸਿਆ ਕਿ ਇਸ ਕੇਸ ਦੇ ਮੁਲਜ਼ਮ ਕ੍ਰਿਸ਼ਨ ਲਾਲ ਨੇ ਸ਼ਨਿਚਰਵਾਰ ਸੀ ਬੀ ਆਈ ਦੇ ਵਿਸ਼ੇਸ਼ ਜੱਜ ਅੱਗੇ ਪੇਸ਼ ਹੋ ਕੇ ਕੁਝ ਗੱਲਾਂ ਰੱਖੀਆਂ ਹਨ, ਪਰ ਉਸ ਸਮੇਂ ਕ੍ਰਿਸ਼ਨ ਲਾਲ ਅਤੇ ਜੱਜ ਇਕੱਲੇ ਅਦਾਲਤ ਰੂਮ ਵਿੱਚ ਸਨ, ਇਸ ਲਈ ਕੋਈ ਜਾਣਕਾਰੀ ਨਹੀਂ ਕਿ ਕ੍ਰਿਸ਼ਨ ਲਾਲ ਨੇ ਕੀ ਕਿਹਾ ਹੈ।
ਇਸ ਦੌਰਾਨ ਪੰਚਕੂਲਾ ਦੀ 25 ਅਗਸਤ 2017 ਦੀ ਹਿੰਸਾ ਵਾਲੇ ਕੇਸ ਵਿੱਚ ਡੇਰਾ ਮੁਖੀ ਨੂੰ ਧਿਰ ਬਣਾਉਣ ਲਈ ਚੀਫ਼ ਜੁਡੀਸ਼ਲ ਮੈਜਿਸਟਰੇਟ (ਸੀ ਜੇ ਐੱਮ) ਦੀ ਅਦਾਲਤ ਵਿੱਚ ਸ਼ਨਿਚਰਵਾਰ ਸੁਣਵਾਈ ਇਸ ਲਈ ਟਲ਼ ਗਈ ਕਿ ਸੀ ਜੇ ਐੱਮ ਰੋਹਿਤ ਵੱਤਸ ਦੀ ਤਰੱਕੀ ਹੋਣ ਕਾਰਨ ਉਨ੍ਹਾਂ ਨੇ ਕੇਸ ਸੁਣਨ ਤੋਂ ਇਨਕਾਰ ਕਰ ਦਿੱਤਾ। ਨਵੇਂ ਸੀ ਜੇ ਐੱਮ ਇਸ ਕੇਸ ਦੀ ਅਗਲੀ ਸੁਣਵਾਈ 3 ਫਰਵਰੀ ਨੂੰ ਕਰਨਗੇ। 25 ਅਗਸਤ 2017 ਨੂੰ ਹਿੰਸਾ ਬਾਰ ਅਰਜ਼ੀ ਵਿੱਚ ਡੇਰੇ ਦੇ ਸਾਬਕਾ ਡਰਾਈਵਰ ਖੱਟਾ ਸਿੰਘ ਨੇ ਕਿਹਾ ਹੈ ਕਿ ਉਸ ਦਿਨ ਰਾਮ ਰਹੀਮ ਦੇ ਇਸ਼ਾਰੇ ਉੱਤੇ ਹਿੰਸਾ ਹੋਈ ਸੀ। ਵੱਡੀ ਗਿਣਤੀ ਵਿੱਚ ਗੱਡੀਆਂ ਨੂੰ ਅੱਗ ਲਾਈ ਗਈ ਤੇ ਮੀਡੀਆ ਵਾਲਿਆਂ ਦਾ ਸਾਮਾਨ ਸਾੜਨ ਦੇ ਨਾਲ ਸਰਕਾਰੀ ਜਾਇਦਾਦ ਦਾ ਵੀ ਨੁਕਸਾਨ ਕੀਤਾ ਗਿਆ ਸੀ। ਡੇਰਾ ਮੁਖੀ ਨੇ ਆਪਣੇ ਹਮਾਇਤੀਆਂ ਨੂੰ ਸਾਜ਼ਿਸ਼ ਹੇਠ ਪੰਚਕੂਲਾ ਭੇਜਿਆ ਸੀ, ਜਿੱਥੇ ਅਦਾਲਤ ਨੇ ਜਦੋਂ ਉਸ ਨੂੰ ਦੋਸ਼ੀ ਠਹਿਰਾ ਦਿੱਤਾ ਤਾਂ ਉਸ ਨੇ ਦੰਗੇ ਕਰਾ ਦਿੱਤੇ ਸਨ। ਇਸ ਦੇ ਬਾਵਜੂਦ ਡੇਰਾ ਮੁਖੀ ਦਾ ਨਾਂਅ ਅੱਜ ਤਕ ਕਿਸੇ ਸਿ਼ਕਾਇਤ ਵਿੱਚ ਨਹੀਂ ਆਇਆ, ਇਸ ਲਈ ਉਸ ਨੂੰ ਧਿਰ ਬਣਾਇਆ ਜਾਵੇ।