ਟੋਰਾਂਟੋ, 17 ਜਨਵਰੀ (ਪੋਸਟ ਬਿਊਰੋ) : ਟੋਰਾਂਟੋ ਪੁਲਿਸ ਅਜਿਹੇ ਮਸ਼ਕੂਕ ਦੀ ਭਾਲ ਕਰ ਰਹੀ ਹੈ ਜਿਸ ਨੇ ਬੱੁਧਵਾਰ ਰਾਤ ਨੂੰ ਫਾਸਟ ਫੂਡ ਰੈਸਟੋਰੈਂਟ ਦੇ ਬਾਹਰ ਇੱਕ ਵਰਕਰ ਨੂੰ ਚਾਕੂ ਮਾਰ ਦਿੱਤਾ।
ਰਾਤੀਂ 11:30 ਵਜੇ ਤੋਂ ਠੀਕ ਪਹਿਲਾਂ ਕਾਰਲਿੰਗਵਿਊ ਡਰਾਈਵ ਨੇੜੇ ਡਿਕਸਨ ਰੋਡ ਉੱਤੇ ਐਮਰਜੰਸੀ ਅਮਲੇ ਨੂੰ ਸਬਵੇਅ ਸੈਂਡਵਿਚ ਲੋਕੇਸ਼ਨ ੳੱੁਤੇ ਸੱਦਿਆ ਗਿਆ। ਪੁਲਿਸ ਨੇ ਦੱਸਿਆ ਕਿ ਕਰਮਚਾਰੀ ਦੀ ਸੋਮਵਾਰ ਨੂੰ ਇਸੇ ਵਿਅਕਤੀ (ਮਸ਼ਕੂਕ) ਨਾਲ ਝੜਪ ਹੋਈ ਸੀ। ਮਸ਼ਕੂਕ ਨੇ ਦੁਕਾਨ ਦੇ ਦਰਵਾਜ਼ੇ ਦੇ ਸਾਹਮਣੇ ਗੱਡੀ ਲਿਆ ਕੇ ਖੜ੍ਹੀ ਕਰ ਦਿੱਤੀ ਸੀ, ਜਿਸ ਨਾਲ ਦੁਕਾਨ ਦਾ ਰਾਹ ਬੰਦ ਹੋ ਗਿਆ ਸੀ ਤੇ ਕਰਮਚਾਰੀ ਉਸ ਨੂੰ ਗੱਡੀ ਪਾਸੇ ਕਰਨ ਲਈ ਆਖ ਰਿਹਾ ਸੀ। ਇਸੇ ਗੱਲ ਨੂੰ ਲੈ ਕੇ ਦੋਵੇਂ ਉਲਝ ਗਏ।
ਬੁੱਧਵਾਰ ਰਾਤ ਨੂੰ ਉਹ ਵਿਅਕਤੀ ਰੈਸਟੋਰੈਂਟ ਉੱਤੇ ਪਰਤਿਆ ਤੇ ਦੋਵਾਂ ਵਿਚਾਲੇ ਫਿਰ ਝਗੜਾ ਹੋ ਗਿਆ ਜਿਸ ਦੇ ਨਤੀਜੇ ਵਜੋਂ ਮਸ਼ਕੂਕ ਨੇ ਕਰਮਚਾਰੀ ਦੀ ਛਾਤੀ ਵਿੱਚ ਛੁਰਾ ਮਾਰ ਦਿੱਤਾ। ਪੈਰਾਮੈਡਿਕਸ ਜ਼ਖ਼ਮੀ ਕਰਮਚਾਰੀ, ਜਿਸ ਦੀ ਉਮਰ 20 ਸਾਲ ਦੱਸੀ ਜਾਂਦੀ ਹੈ, ਨੂੰ ਗੰਭੀਰ ਪਰ ਸਥਿਰ ਹਾਲਤ ਵਿੱਚ ਹਸਪਤਾਲ ਲੈ ਕੇ ਗਏ। ਜਿੰਨੇ ਚਿਰ ਨੂੰ ਅਧਿਕਾਰੀ ਮੌਕੇ ੳੱੁਤੇ ਪਹੁੰਚੇ ਤਾਂ ਮਸ਼ਕੂਕ ਉੱਥੋਂ ਫਰਾਰ ਹੋ ਚੁੱਕਿਆ ਸੀ।
ਮਸ਼ਕੂਕ 40 ਸਾਲਾਂ ਦਾ ਸਿਆਹ ਨਸਲ ਦਾ ਵਿਅਕਤੀ ਦੱਸਿਆ ਜਾਂਦਾ ਹੈ ਜਿਸ ਨੇ ਲਾਲ ਰੰਗ ਦੀ ਹੁੱਡ ਵਾਲੀ ਜੈਕੇਟ ਪਾਈ ਹੋਈ ਸੀ। ਪੁਲਿਸ ਦਾ ਮੰਨਣਾ ਹੈ ਕਿ ਮਸ਼ਕੂਕ ਕਾਲੇ ਰੰਗ ਦੀ ਹਿੰਊਂਡਾਇ ਵਿੱਚ ਸੀ।