ਅਰਾਵਲੀ, 16 ਜਨਵਰੀ (ਪੋਸਟ ਬਿਊਰੋ)- ਸਭ ਤੋਂ ਲੰਬੇ ਵਾਲਾਂ ਵਾਲੀ ਨਿਲਾਂਸ਼ੀ ਪਟੇਲ ਇਕ ਵਾਰ ਫਿਰ ਚਰਚਾ ਵਿੱਚ ਹੈ। 2018 ਵਿੱਚ ਆਪਣੇ ਲੰਬੇ ਵਾਲਾਂ ਲਈ ਗਿਨੀਜ਼ ਵਰਲਡ ਰਿਕਾਰਡ ਬਣਾ ਚੁੱਕੀ ਨਿਲਾਂਸ਼ੀ ਨੇ ਇਸ ਵਾਰ ਆਪਣਾ ਹੀ ਰਿਕਾਰਡ ਤੋੜ ਦਿੱਤਾ ਹੈ। ਗੁਜਰਾਤ ਦ ਅਰਾਵਲੀ ਦੀ ਵਸਨੀਕ ਨਿਲਾਂਸ਼ੀ ਦੇ ਵਾਲ ਅੱਜ ਕੱਲ੍ਹ 6 ਫੁੱਟ ਤੋਂ ਲੰਬੇ ਹਨ। 16 ਸਾਲ ਦੀ ਉਮਰ ਵਿੱਚ ਗਿਨੀਜ਼ ਵਰਲਡ ਰਿਕਾਰਡ ਬੁੱਕ ਵਿੱਚ ਨਾਂ ਦਰਜ ਕਰਾ ਚੁੱਕੀ ਨਿਲਾਂਸ਼ੀ 17 ਸਾਲ ਦੀ ਹੈ।
2018 ਵਿੱਚ ਗਿਨੀਜ਼ ਵਰਲਡ ਰਿਕਾਰਡ ਬੁੱਕ ਵਿੱਚ ਨਿਲਾਂਸ਼ੀ ਪਟੇਲ ਦਾ ਨਾਂ ਸਭ ਤੋਂ ਲੰਬੇ ਵਾਲਾਂ ਵਾਲੀ ਟੀਨੇਜਰ ਦੇ ਰੂਪ ਵਿੱਚ ਦਰਜ ਕੀਤਾ ਗਿਆ ਸੀ। ਓਦੋਂ ਨਿਲਾਂਸ਼ੀ ਦੇ ਵਾਲ 170.5 ਸੈਂਟੀਮੀਟਰ ਸਨ। ਅੱਜ ਕੱਲ੍ਹ ਉਸ ਦੇ ਵਾਲ 190 ਸੈਂਟੀਮੀਟਰ (6.23 ਫੁੱਟ) ਹਨ। ਨਿਲਾਂਸ਼ੀ ਦੱਸਦੀ ਹੈ, ‘ਜਦੋਂ ਮੈਂ 6 ਸਾਲ ਦੀ ਸੀ ਤਾਂ ਇਕ ਬਿਊਟੀਸ਼ਨ ਨੇ ਵਾਲ ਬਹੁਤ ਛੋਟੇ ਕੱਟ ਦਿੱਤੇ ਸਨ। ਇਸ ਦੇ ਬਾਅਦ ਮੈਂ ਕਦੇ ਵਾਲ ਨਹੀਂ ਕਟਵਾਏ ਅਤੇ ਮੇਰੇ ਪਰਿਵਾਰ ਨੇ ਵੀ ਕੁਝ ਸਮੇਂ ਬਾਅਦ ਮੇਰਾ ਫੈਸਲਾ ਮੰਨ ਲਿਆ। ਅੱਜਕੱਲ੍ਹ ਮੈਂ ਇਸ ਨੂੰ ਲਕੀ ਚਾਰਮ ਮੰਨਦੀ ਹਾਂ।` ਉਹ ਕਹਿੰਦੀ ਹੈ, ‘ਮੈਂ ਜਿੱਥੇ ਜਾਂਦੀ ਹੈ, ਲੋਕ ਮੇਰੇ ਨਾਲ ਸੈਲਫੀ ਕਲਿੱਕ ਕਰਨਾ ਚਾਹੁੰਦੇ ਹਨ। ਮੈਨੂੰ ਸੈਲੀਬ੍ਰਿਟੀ ਵਾਂਗ ਫੀਲਿੰਗ ਹੁੰਦੀ ਹੈ।`
ਦੋਬਾਰਾ ਗਿਨੀਜ਼ ਵਰਲਡ ਰਿਕਾਰਡ ਬਣਾਉਣ ਵਾਲੀ ਨਿਲਾਂਸ਼ੀ ਨੇ ਟੀਨੇਜਰ ਕੈਟੇਗਰੀ ਵਿੱਚ ਆਪਣਾ ਹੀ ਰਿਕਾਰਡ ਤੋੜ ਦਿੱਤਾ ਹੈ। ਉਸ ਦੀ ਮਾਂ ਕਹਿੰਦੀ ਹੈ ਕਿ ਇਨ੍ਹਾਂ ਵਾਲਾਂ ਲਈ ਬਹੁਤ ਮਿਹਨਤ ਕਰਨੀ ਪੈਂਦੀ ਹੈ। ਉਸ ਦੇ ਵਾਲਾਂ ਲਈ ਜ਼ਿਆਦਾ ਕਾਸਮੈਟਿਕ ਦੀ ਵਰਤੋਂ ਨਹੀਂ ਕੀਤੀ ਜਾਂਦੀ। ਵਾਲਾਂ ਨੂੰ ਬਚਾਉਣ ਲਈ ਹਫ਼ਤੇ ਵਿੱਚ ਸਿਰਫ਼ ਇਕ ਵਾਰ ਵਾਲ ਧੋਂਦੀ ਹੈ ਅਤੇ ਚੰਗੀ ਤਰ੍ਹਾਂ ਤੇਲ ਲਾਉਂਦੀ ਹੈ।